83
¡Dios, quebe sua zriuꞌ!Quebe suꞌ zrize, Dios, ne quebe gusezxuj dxuꞌu,
2 laweꞌ da dxelebezre xaꞌa benneꞌ caꞌ dxeledábague̱ꞌ Lueꞌ,
ne dxulucáꞌana szren cuina benneꞌ caꞌ dxelecuídene̱ꞌ Lueꞌ.
3 Bagácheze ba zaj nune̱ꞌ tuze dizraꞌ bi xelune̱ꞌ chee̱ bénneache chiuꞌ,
ne ba zaj nune̱ꞌ bi xelune̱ꞌ chee̱ benneꞌ caꞌ dxuxúequezuꞌ Lueꞌ.
4 Gulenné̱ꞌ: “Le chuꞌu, guzría xidxu benneꞌ caꞌ
chee̱ québedxa xelaque̱ꞌ tu cueꞌ xe̱zr la xu,
ne québedxa nu sua benneꞌ cheajsá lazre̱ꞌ la Israel.”
5 Ba belune̱ꞌ tuze dizraꞌ.
Zaj nune̱ꞌ tuze dizraꞌ xeledábague̱ꞌ Lueꞌ
6 benneꞌ Edom caꞌ, ne benneꞌ Ismael caꞌ,
ne benneꞌ Moab caꞌ, ne benneꞌ zriꞌine zre sua caꞌ Agar,
7 ne benneꞌ Gebal caꞌ, ne benneꞌ Amón caꞌ, ne benneꞌ Amalec caꞌ,
ne benneꞌ Filistea caꞌ, ne benneꞌ zaj zre̱ꞌe̱ xe̱zre Tiro.
8 Cáꞌanqueze benneꞌ Asiria caꞌ zaj nune̱ꞌ le̱ꞌ tuze.
Xúgute̱ benneꞌ caní dxelune̱ꞌ zrin chee̱ zriꞌine zre sua Lot.
9 Be̱n chee̱ benneꞌ caní ca be̱nuꞌ chee̱ benneꞌ Madián caꞌ,
ne ca be̱nuꞌ chee̱ Sísara, ne ca be̱nuꞌ chee̱ Jabín dxuꞌa xe̱gu Cisón,
10 benneꞌ caꞌ gulátie̱ꞌ lu xe̱zr la xu Endor,
naꞌ belexaque̱ꞌ ca xrche̱ꞌe̱ be̱zre da gun na be̱be lu xe̱zr la xu.
11 Be̱n gaca chee̱ benneꞌ blau caꞌ chee̱ benneꞌ caní
ca guca chee̱ Oreb, ne chee̱ Zeeb,
ne be̱n gaca chee̱ benneꞌ dxelenná béꞌene̱ꞌ benneꞌ caní
ca guca chee̱ Zeba, ne chee̱ Zalmuna,
12 laweꞌ da gulenná benneꞌ caní: “Gaca chee̱dxu xe̱zr la xu
naga zaj zraꞌ bénneache chee̱ Dios.”
13 Dios chiaꞌ, be̱n xelaque̱ꞌ ca xizre be̱be da dxua beꞌ gate dxedube na.
Be̱n xelaque̱ꞌ ca xrlácue xia xéladu caꞌ da dxua beꞌ bdunuꞌ.
14 Ca dxun tu xiꞌ da dxuzezxe na tu xiꞌa zren,
ne ca dxun xiꞌ da dxuzezxe na tu din zren,
15 caꞌan gudáu ziꞌ xuzre benneꞌ caní tu lu beꞌ bdunuꞌ,
ne bchebe le̱ꞌ nen tu beꞌ bdunuꞌ chiuꞌ.
16 Be̱n xelexeduéꞌele̱ꞌe̱ne̱ꞌ,
ne be̱n xelape̱ꞌ Lueꞌ ba láꞌana, Xran.
17 Be̱n xeleque zréajene̱ꞌ ne xelezúa sté̱bele̱ꞌe̱ tu chíꞌizqueze.
Be̱n xelexegáꞌana dítaje̱ꞌ, ne xelexenítie̱ꞌ.
18 Be̱n xelexúnbeꞌe̱ nacuꞌ Lueꞌ Xránantuꞌ Dios.
Tuzuꞌ Lueꞌ nacuꞌ Dios zrente̱ laweꞌ dute̱ xe̱zr la xu.