86
Bze̱ naga, Xran, ne bene chiaꞌ,laweꞌ da zuaꞌ lu da ba xaꞌ, ne dxexázrjedaꞌ.
2 Bxue nedaꞌ laweꞌ da nacaꞌ chiuꞌ.
Bselá nedaꞌ, Dios chiaꞌ, nacaꞌ we̱n zrin chiuꞌ,
ne dxuxrén lazraꞌ Lueꞌ.
3 Bexache lazreꞌ nedaꞌ, Xranaꞌ Dios,
laweꞌ da dxuláwizraꞌ Lueꞌ te zra chizrela.
4 Be̱n béle̱ꞌe̱daꞌ nedaꞌ, we̱n zrin chiuꞌ,
laweꞌ da dxuzúa cuinaꞌ lau Lueꞌ, Xran,
5 naꞌ Lueꞌ, Xran, nacuꞌ xrlátaje, ne dxunite lauꞌ chee̱ntuꞌ.
Zúate̱quezuꞌ xexache lazruꞌ benneꞌ caꞌ dxululáwizre̱ꞌ Lueꞌ.
6 Xranaꞌ Dios, bene da dxuchálajle̱naꞌ Lueꞌ,
ne bze̱ naga ca da dxenabaꞌ lauꞌ.
7 Lu zra suaꞌ lu da sté̱bele̱ꞌe̱ wanné̱quezaꞌ Lueꞌ,
laweꞌ da dxexeché̱bequezuꞌ Lueꞌ chiaꞌ.
8 Xran, quebe nu chiláꞌ Dios ca Lueꞌ,
ne quebe nu dxun ca da dxunuꞌ Lueꞌ.
9 Xeleláꞌ bénneache dute̱ xe̱zr la xu da be̱nuꞌ Lueꞌ,
naꞌ xelúe láꞌanaqueze̱ꞌ Lueꞌ, Xran,
ne xulucáꞌana szrene̱ꞌ Lauꞌ Lueꞌ,
10 laweꞌ da nacuꞌ Lueꞌ szren, ne dxunuꞌ da dxexebánentuꞌ.
Tuzuꞌ Lueꞌ nacuꞌ Dios.
11 Bse̱de nedaꞌ da dxaca lazruꞌ gunaꞌ, Xranaꞌ Dios,
naꞌ gunaꞌ ca naca da li chiuꞌ.
Gunná beꞌe lázrdawaꞌ chee̱ zrebaꞌ La cuinuꞌ.
12 Dute̱ lázrdawaꞌ güe láꞌanaquezaꞌ Lueꞌ, Xranaꞌ Dios,
ne gucáꞌana szrénquezaꞌ Lauꞌ chadía chacanna,
13 laweꞌ da zúate̱quezuꞌ xexache lazruꞌ nedaꞌ,
ne bseláuꞌ bénneꞌdu xuꞌa lu lataj ba xaꞌ.
14 Dios, belasa benneꞌ dxulucáꞌana szren cuine̱ꞌ,
ne dxeledábague̱ꞌ nedaꞌ,
naꞌ benneꞌ xichaj zraꞌa caꞌ belune̱ꞌ tuze dizraꞌ xelútie̱ꞌ nedaꞌ,
ne quebe dxelezrebe benneꞌ caꞌ Lueꞌ.
15 Lueꞌ, Xranaꞌ, nacuꞌ Dios dxexache lazruꞌ netuꞌ,
ne nacuꞌ zren lazreꞌ,
ne quebe dxezráꞌazeuꞌ, san zúate̱quezuꞌ xexache lazruꞌ netuꞌ,
ne nacuꞌ li lazreꞌ.
16 Gunnáꞌ ca naca chiaꞌ, ne bexache lazreꞌ nedaꞌ.
Be̱nna chiaꞌ nedaꞌ, we̱n zrin chiuꞌ, xel-laꞌ waca chiuꞌ,
naꞌ bxue nedaꞌ, zriꞌine nuꞌula we̱n zrin chiuꞌ.
17 Bleꞌe nedaꞌ tu da gaca bea na gaca chaweꞌ chiaꞌ,
ne be̱n xeleléꞌe benneꞌ caꞌ dxelecuídene̱ꞌ nedaꞌ da naꞌ,
ne be̱n xelexeduéꞌene̱ꞌ,
laweꞌ da nacuꞌ Lueꞌ, Xranaꞌ Dios, Bénneaꞌ gúcale̱ne̱ꞌ nedaꞌ,
ne bexúe zrene̱ꞌ nedaꞌ.