80
Bene chee̱ntuꞌ, Lueꞌ dxuxúꞌ benneꞌ Israel caꞌ,Lueꞌ naꞌ, dxuxúꞌ zriꞌine zre sua José ca zrílaꞌdu caꞌ,
ne dxeꞌu lataj blau chiuꞌ da zua na láwela querubín caꞌ.
2 Bleꞌe xel-laꞌ szren chiuꞌ lau zriꞌine zre sua Efraín,
ne Benjamín, ne Manasés.
Bleꞌe xel-laꞌ waca chiuꞌ, ne gudá guseláuꞌ netuꞌ.
3 Beché̱ꞌ netuꞌ, Dios.
Bexache lazreꞌ netuꞌ, naꞌ lantuꞌ.
4 Xránantuꞌ Dios, napuꞌ dute̱ xel-laꞌ waca,
¿bata chajse̱queze zraꞌu netuꞌ,
ne quebe xennuꞌ ca da nábantuꞌ Lueꞌ?
5 Bzúale̱ꞌu netuꞌ lu xel-laꞌ dxewíꞌine lazreꞌ,
ne bzílale̱ꞌu nisa dxebézrentuꞌ.
6 Be̱ꞌu lataj xe̱zr la xu walizre caꞌ bulucáꞌana dítaje̱ꞌ netuꞌ,
naꞌ benneꞌ caꞌ dxeledábague̱ꞌ netuꞌ belún le̱ꞌ chee̱ntuꞌ.
7 Beché̱ꞌ netuꞌ, Dios, napuꞌ dute̱ xel-laꞌ waca.
Bexache lazreꞌ netuꞌ, naꞌ lantuꞌ.
8 Bebéajuꞌ tu zriguꞌ lba uva lu xe̱zr la xu Egipto da naca na
bénneache chiuꞌ.
Blaguꞌ benneꞌ xe̱zr la xu gulezré̱ꞌe̱ nigá, naꞌ guzuꞌ nigá
zriguꞌ lba uva naꞌ.
9 Gúꞌunuꞌ lba uva naꞌ chee̱ gula na.
Bdéle̱ꞌe̱ lue zriguꞌ lba uva naꞌ, naꞌ gucu na xe̱zr la xu naꞌ.
10 Gulúꞌu na zrul-la xúgute̱ xiꞌa caꞌ,
naꞌ zruze na caꞌ gulegúꞌu na zrul-la xaga cedro zren caꞌ.
11 Gulechiluj zruze na, belezrinte̱ na dxuꞌa nísadauꞌ,
ne belezrinte̱ na dxuꞌa xe̱gu Eufrates.
12 ¿Bizr chee̱ naꞌ gucáꞌu leꞌaj da naxechaj na le̱ na?
Naꞌa xúgute̱ benneꞌ dxeledé naꞌ dxelebane̱ꞌ da zixre chee̱ na.
13 Dxuluchuchu dxululéaj cuche xixreꞌ caꞌ lba uva naꞌ,
naꞌ be̱ xixreꞌ caꞌ dxelágubaꞌ na.
14 Bedá chee̱ntuꞌ, Dios, napuꞌ dute̱ xel-laꞌ waca.
Gunnáꞌ netuꞌ ga naꞌ zuꞌ xabáa, ne gudá xedajnnáꞌu lba uva chiuꞌ.
15 Gudá, guseláuꞌ lba uva nigá, da gúzaquezuꞌ.
Bechuj chee̱ lba uva naꞌ, ba bzua chuchuꞌ gaca na chiuꞌ.
16 Benneꞌ caꞌ dxeledábague̱ꞌ netuꞌ ba gulechúgue̱ꞌ lba naꞌ,
ne ba guládue̱ꞌ na xiꞌ.
Gunnáꞌ benneꞌ caꞌ lu xel-laꞌ dxezráꞌa chiuꞌ,
ne bzria xiꞌ benneꞌ caꞌ.
17 Bzua chuchu, ne bxue benneꞌ caꞌ ba gucaꞌu,
benneꞌ xe̱zr la xu naꞌ ba nuzúa chuchuꞌ.
18 Cabátadxa cueaj xíchajntuꞌ Lueꞌ xecha lasa.
Bcache chaweꞌ netuꞌ, naca bantuꞌ, naꞌ güe láꞌanantuꞌ Lauꞌ.
19 Xránantuꞌ Dios, napuꞌ dute̱ xel-laꞌ waca, beché̱ꞌ netuꞌ.
Bexache lazreꞌ netuꞌ, naꞌ lantuꞌ.