79
Dios, ba gulúꞌu benneꞌ xe̱zr la xu zituꞌ caꞌ lu xe̱zr la xuchee̱ bénneache chiuꞌ.
Bulucáꞌana dítaje̱ꞌ xudauꞌ láꞌazxa chiuꞌ.
Buluzría xiꞌe̱ xe̱zre Jerusalén.
2 Bulucáꞌane̱ꞌ be̱laꞌ dxen chee̱ we̱n zrin chiuꞌ caꞌ naga
gulagu be̱ zua xrila le̱ꞌ.
Be̱ xixreꞌ caꞌ gulágubaꞌ be̱laꞌ dxen chee̱ benneꞌ caꞌ
zaj naque̱ꞌ chiuꞌ.
3 Ca nisa bululálaje̱ꞌ dxen chee̱ benneꞌ caꞌ xúgute̱ lu neza
chee̱ xe̱zre Jerusalén,
ne quebe nu chiláꞌ benneꞌ gucache̱ꞌ benneꞌ caꞌ.
4 Benneꞌ xe̱zr la xu walizreꞌ chee̱ntuꞌ caꞌ
dxulucháchale̱ne̱ꞌ netuꞌ.
Benneꞌ zaj zre̱ꞌe̱ xe̱zre walízr caꞌ dxulucáꞌana dítaje̱ꞌ netuꞌ,
ne dxelún le̱ꞌ chee̱ntuꞌ.
5 ¿Bata cuézaqueze gaca caní chee̱ntuꞌ, Xran?
¿Tu chíꞌizqueze dxezraꞌu netuꞌ?
¿Tu chíꞌizqueze gaca xel-laꞌ dxezráꞌa chiuꞌ ca tu xiꞌ?
6 Bzraꞌa benneꞌ xe̱zr la xu caꞌ quebe zaj núnbeꞌe̱ Lueꞌ,
naꞌ benneꞌ xe̱zr la xu caꞌ quebe dxululáwizre̱ꞌ Lueꞌ,
7 laweꞌ da ba buluzría xiꞌe̱ zriꞌine zre sua Jacob,
ne bulucáꞌana dítaje̱ꞌ xuꞌu lizre benneꞌ caꞌ.
8 Quebe gusebaguꞌ netuꞌ ca naca da zrinnaj da belún
xra xrtauntuꞌ caꞌ.
Gudázega xexache lazruꞌ netuꞌ, laweꞌ da dxezraga láule̱ꞌe̱ntuꞌ.
9 Gúcale̱ netuꞌ, Dios, nacuꞌ Bénneaꞌ dxuselé̱ꞌ netuꞌ,
chee̱ gaca ba Lauꞌ.
Bselá netuꞌ, ne bnite lau dul-la nuntuꞌ chee̱ xegáꞌana szren Lauꞌ,
10 laweꞌ da xelenná bénneache: “¿Ga na Dios chee̱ benneꞌ caꞌ?”
Bebéaj lazreꞌ benneꞌ caꞌ belútie̱ꞌ we̱n zrin chiuꞌ caꞌ.
11 Caní be̱n chee̱ xeleléꞌe xúgute̱ benneꞌ chiuꞌ caꞌ zaj xuꞌe̱
lu naꞌ benneꞌ caꞌ dxeledábague̱ꞌ netuꞌ.
Dute̱ xel-laꞌ waca zren chiuꞌ bselá benneꞌ caꞌ ba zaj nachugue̱ꞌ
chee̱ꞌ xelatie̱ꞌ.
12 Bunezruj chee̱ benneꞌ xe̱zr la xu walizreꞌ chee̱ntuꞌ
caꞌ xegazre cueꞌ
ca da cale̱la da belune̱ꞌ, bulucáꞌana dítaje̱ꞌ Lueꞌ, Xran.
13 Netuꞌ, bénneache chiuꞌ, nácantuꞌ ca zrilaꞌ chiuꞌ caꞌ,
güe láꞌanaquezentuꞌ Lueꞌ chadía chacanna.
Tu cuen tu cuen zriꞌine zre suantuꞌ gúl-laquezentuꞌ da
güe láꞌanantuꞌ Lueꞌ.