78
Le xen, leꞌe, bénneache chiaꞌ, ca da dxusé̱dedaꞌ.Le xen xanneꞌ ca da dxuchálajaꞌ.
2 Guchínedaꞌ dizraꞌ ca da dxuluchalaj benneꞌ sina caꞌ,
naꞌ guzéajniꞌidaꞌ leꞌe da caꞌ gulezúa na bagácheze gate nate,
3 da caꞌ bendxu, ne bé̱nbeadxu na,
da caꞌ belixru beꞌe xra xrtáudxu caꞌ dxiꞌu.
4 Quebe gucáchedxu na lau zríꞌinedxu caꞌ.
Guzénquezdxu zríꞌinedxu caꞌ ca naca xel-laꞌ szren
chee̱ Xránadxu,
ne ca naca xel-laꞌ waca chee̱ꞌ, ne ca zaj naca da zren caꞌ
da be̱ne̱ꞌ.
5 Bzue̱ꞌ tu da nadxixruj bea na da xelún benneꞌ Israel caꞌ,
ne da bdxixruj beꞌene̱ꞌ caꞌ da xelún zriꞌine zre sua Jacob.
Gunná béꞌene̱ꞌ xra xrtáudxu caꞌ xuluzenne̱ꞌ bi chee̱ꞌ caꞌ
ca naca da gunná béꞌene̱ꞌ,
6 chee̱ xelúnbea zríꞌine̱ꞌ bidu caꞌ za xelálajbeꞌ ca naca na,
naꞌ bi caní xuluzenbeꞌ zríꞌinebeꞌ da naꞌ,
7 chee̱ xuluxrén lázrebeꞌ Dios,
ne quebe xelal-la lázrebeꞌ da caꞌ be̱n Dios,
ne chee̱ xuluzúabeꞌ dizraꞌ da caꞌ gunná beꞌe̱.
8 Quebe xelácabeꞌ ca gulaca xra xrtáubeꞌ caꞌ.
Benneꞌ caꞌ quebe buluzúe̱ꞌ dizraꞌ chee̱ꞌ, ne guledábague̱ꞌ Le̱ꞌ,
ne quebe buluzúa chúchue̱ꞌ ca buluxrén lazre̱ꞌ Dios,
ne quebe gulaque̱ꞌ li lazreꞌ lu da naca chee̱ Dios lu
beꞌ zaj nácaqueze̱ꞌ.
9 Benneꞌ zríꞌine zre sua Efraín, benneꞌ zaj nuꞌe̱
da dxuluchínene̱ꞌ lu wedil-la
buluzrúnnuje̱ꞌ naga dxaca wedil-la.
10 Quebe belune̱ꞌ ca naca xel-laꞌ wezría da be̱n Dios,
ne quebe buluzúe̱ꞌ dizraꞌ da gunná béꞌene̱ꞌ.
11 Gulal-la lazre̱ꞌ da caꞌ be̱n Dios,
ne xel-laꞌ waca caꞌ bléꞌene̱ꞌ Le̱ꞌ.
12 Lau xra xrtawe̱ꞌ caꞌ be̱ne̱ꞌ xel-laꞌ waca caꞌ
lu xe̱zr la xu Egipto, ne lu xe̱zr la xu Zoán.
13 Gusalje̱ꞌ neza lu nísadauꞌ naga guledé benneꞌ caꞌ.
Be̱ne̱ꞌ nísadauꞌ naꞌ ca xiꞌa caꞌ chaláꞌa weaj.
14 Te zra bléꞌene̱ꞌ benneꞌ caꞌ neza nen tu beuj bza da xjácale̱ne̱ꞌ,
ne chizrela nen beuj bza da naca na ca tu xiꞌ.
15 Gulé̱ꞌe̱ xiaj caꞌ naga naca xu bizre,
naꞌ bxíꞌaje̱ꞌ benneꞌ caꞌ nisa da gulaj na le̱ꞌe̱ xiaj caꞌ
ca tu xe̱gu nisa.
16 Be̱ne̱ꞌ gulaj tu xe̱gu nisa le̱ꞌe̱ xiaj naꞌ,
naꞌ bzriluj na ca tu xe̱gu zren.
17 Lácala be̱ne̱ꞌ caní belúndxaqueze̱ꞌ dul-la lau Dios
le̱ꞌe̱ xixreꞌ laweꞌ lataj,
ne guledábague̱ꞌ Dios nape̱ꞌ dute̱ xel-laꞌ szren.
18 Gulegúꞌu lazre̱ꞌ xuluꞌzúa zrie̱ꞌ Dios.
Gulenabe̱ꞌ xelawe̱ꞌ ca da dxelezá lazreꞌ le̱ꞌ.
19 Gulenné̱ꞌ chee̱ Dios, gulenné̱ꞌ:
¿Wazeque Dios naꞌ gunne̱ꞌ da gágudxu le̱ꞌe̱ xixreꞌ nigá?
20 Da líqueze gulé̱ꞌe̱ xiaj naꞌ, naꞌ gulaj nisa naꞌ,
naꞌ bzriluj na ca tu xe̱gu zren.
¿Wazéquequezne̱ꞌ gunne̱ꞌ dxiꞌu xeta, ne gunne̱ꞌ be̱laꞌ
da gágudxu?
21 Chee̱ le̱ naꞌ bzraꞌa Xránadxu gate benne̱ꞌ da naꞌ,
ne gusel-le̱ꞌ xiꞌ da bzezxe na bal-la bénneache chee̱ꞌ,
naꞌ bsedxíꞌule̱ꞌe̱ xel-laꞌ dxezráꞌa chee̱ꞌ nen benneꞌ Israel caꞌ,
22 laweꞌ da quebe guléajle̱ꞌe̱ chee̱ Dios,
ne quebe buluxrén lazre̱ꞌ Le̱ꞌ guselé̱ꞌ le̱ꞌ.
23 Gunná béꞌene̱ꞌ beuj zran xabáa,
ne gusálaje̱ꞌ dxa xuꞌu chee̱ xabáa,
24 naꞌ be̱ne̱ꞌ bxinnaj xeta maná ca dxinnaj xiuj chee̱
gulagu benneꞌ chee̱ꞌ na.
Bnézruje̱ꞌ le̱ꞌ da naca ca zruaꞌ chee̱ xabáa.
25 Gulawe̱ꞌ da dxelagu gubáz chee̱ xabáa caꞌ.
Gusél-lale̱ꞌe̱ da gulawe̱ꞌ, naꞌ gulélajte̱quezene̱ꞌ.
26 Be̱ne̱ꞌ guca beꞌ da zaꞌ chaláꞌala naga dxalaj gubizra,
ne xel-laꞌ waca chee̱ꞌ be̱ne̱ꞌ guca beꞌ zaꞌ chaláꞌala
naga dxedé gubizra beuꞌ zaga,
27 naꞌ gusel-le̱ꞌ chee̱ benneꞌ caꞌ be̱laꞌ ca ze̱ bxrte xu,
béadu zaj zua xrila naxanbaꞌ ca xuzreꞌ da dxeꞌ dxuꞌa
tu xe̱gu zren.
28 Be̱ne̱ꞌ guléxrujbaꞌ chaleꞌaj chee̱ benneꞌ caꞌ.
Guléxrujbaꞌ dúte̱queze naga zaj zua xuꞌu xide chee̱ꞌ.
29 Gulawe̱ꞌ-baꞌ, ne gulélajquezene̱ꞌ.
Dios bnézruje̱ꞌ chie̱ꞌ ca naca da gulaca lazre̱ꞌ.
30 Gate quebe ne xelélajene̱ꞌ, ne ne dxelawe̱ꞌ-baꞌ,
31 bzraꞌa Dios benneꞌ caꞌ,
naꞌ be̱tie̱ꞌ benneꞌ zaj nácadxe̱ꞌ benneꞌ wal-la,
ne benneꞌ Israel caꞌ zaj nácadxe̱ꞌ benneꞌ waca.
32 Láqueze be̱ne̱ꞌ caní, naꞌ belúndxaqueze̱ꞌ dul-la,
ne láqueze beleléꞌene̱ꞌ xel-laꞌ waca caꞌ da be̱ne̱ꞌ,
quebe buluxrén lazre̱ꞌ Le̱ꞌ.
33 Chee̱ le̱ naꞌ guchugue̱ꞌ zra chee̱ benneꞌ caꞌ ca
tu beꞌ dxecáꞌadxu,
ne ca zaj naca iza da gulezúe̱ꞌ, bdee̱ꞌ le̱ꞌ lu da ziꞌ da xaꞌ.
34 Gate be̱tie̱ꞌ bal-la benneꞌ caꞌ, naꞌ xezícadxe̱ꞌ
belexaque̱ꞌ chee̱ Dios.
Belexebíꞌi lazre̱ꞌ, ne du lazre̱ꞌ buluchálajle̱ne̱ꞌ Le̱ꞌ.
35 Xeajlesá lazre̱ꞌ naca Dios Benneꞌ dxuxúe̱ꞌ le̱ꞌ,
ne Dios naꞌ nape̱ꞌ dute̱ xel-laꞌ szren naque̱ꞌ Bénneaꞌ
bxáꞌawene̱ꞌ le̱ꞌ,
36 san quebe guca li lazreꞌ da gulenné̱ꞌ
laweꞌ da belún lazre̱ꞌ lau Dios.
37 Quebe gulaque̱ꞌ li lazreꞌ nen Le̱ꞌ,
ne quebe belune̱ꞌ du lazreꞌ ca naca xel-laꞌ wezría chee̱ꞌ.
38 Dios bexache lazre̱ꞌ chee̱ benneꞌ caꞌ,
ne bnite lawe̱ꞌ dul-la belune̱ꞌ, ne quebe bzria xiꞌe̱ le̱ꞌ.
Zaneꞌ lásate̱ bzue̱ꞌ chaláꞌala xel-laꞌ dxezráꞌa chee̱ꞌ,
ne quebe bzre̱ꞌe̱ le̱ꞌ dute̱ ca da dxéquene̱ꞌ.
39 Xeajsá lazreꞌ Dios zaj naque̱ꞌ be̱laꞌ dxen.
Zaj naque̱ꞌ ca tu beꞌ da dxedé na, ne quebe xezrín na.
40 Zaneꞌ lasa guledábague̱ꞌ Le̱ꞌ le̱ꞌe̱ xixreꞌ laweꞌ lataj naꞌ,
ne zaneꞌ lasa buluzúe̱ꞌ Le̱ꞌ baxacheꞌ.
41 Zaneꞌ lasa buluzúe̱ꞌ Dios chaláꞌala,
ne buluché̱ꞌe̱ Dios láꞌazxa chee̱ benneꞌ Israel caꞌ.
42 Gulal-la lazre̱ꞌ ca naca xel-laꞌ waca zren chee̱ꞌ,
ne ca be̱ne̱ꞌ lu zra naꞌ bxáꞌawene̱ꞌ le̱ꞌ lu da ziꞌ da xaꞌ,
43 gate be̱ne̱ꞌ xel-laꞌ waca caꞌ lu xe̱zr la xu Egipto,
ne bléꞌene̱ꞌ da caꞌ da dxebánedxu lu xe̱zr la xu Zoán.
44 Bexune̱ꞌ xe̱gu chee̱ꞌ caꞌ dxen,
naꞌ québedxa guca da xeleꞌaj benneꞌ Egipto caꞌ.
45 Gusel-le̱ꞌ be̱ꞌa ládujla benneꞌ caꞌ, be̱ buludebaꞌ le̱ꞌ xel-laꞌ ziꞌ.
Gusel-le̱ꞌ bluzru caꞌ buluzría xibaꞌ xe̱zr la xu chee̱ꞌ.
46 Gusel-le̱ꞌ biche zu caꞌ gulágubaꞌ lina chee̱ꞌ,
ne buluzría xibaꞌ da zaj zua lu xe̱zr la xu chee̱ꞌ.
47 Gusel-le̱ꞌ xiaj bezxeꞌ zriꞌa da bzria xi na lba uva chee̱ꞌ caꞌ,
ne gusel-le̱ꞌ da zaga da bsebizre na xaga higo chee̱ꞌ caꞌ.
48 Gusel-le̱ꞌ xiaj bezxeꞌ zriꞌa da be̱te na be̱ xixreꞌ chee̱ꞌ caꞌ,
ne gusel-le̱ꞌ xesa da be̱te na zrilaꞌ chee̱ꞌ caꞌ.
49 Bdee̱ꞌ benne̱ꞌ Egipto caꞌ lu xel-laꞌ ziꞌ zren,
laweꞌ da bzráꞌale̱ꞌe̱ benneꞌ caꞌ,
naꞌ guca da caꞌ ca zánete̱ gubáz caꞌ chee̱ xel-laꞌ gute.
50 Quebe bzague̱ꞌ xel-laꞌ dxezráꞌa chee̱ꞌ,
ne quebe bnite lawe̱ꞌ chee̱ꞌ chee̱ quebe xelátie̱ꞌ,
san be̱tie̱ꞌ le̱ꞌ nen tu xízrawe̱ꞌ wal-la.
51 Be̱tie̱ꞌ bi biu nedxu chee̱ benneꞌ caꞌ,
bi biu nedxu caꞌ chee̱ benneꞌ Egipto caꞌ.
52 Nadxa beche̱ꞌe̱ benneꞌ chee̱ꞌ caꞌ ca tu benneꞌ
dxeche̱ꞌe̱ zrilaꞌ caꞌ,
ne bsiꞌe̱ le̱ꞌ le̱ꞌe̱ xixreꞌ laweꞌ lataj.
53 Bsiꞌe̱ le̱ꞌ zriꞌa chaweꞌ, ne quebe bi belezrebe̱ꞌ,
san gulate benneꞌ guledábague̱ꞌ Le̱ꞌ lu nísadauꞌ.
54 Beche̱ꞌe̱ le̱ꞌ lu xe̱zr la xu láꞌazxa chee̱ꞌ,
naga zua xiꞌa nigá da guca cheé̱queze̱ꞌ.
55 Bebéaje̱ꞌ benneꞌ zaj zre̱ꞌe̱ lu xe̱zr la xu naꞌ lau
benneꞌ chie̱ꞌ caꞌ,
naꞌ gulé̱ꞌe̱ xe̱zr la xu chee̱ꞌ cha chee̱ benneꞌ Israel caꞌ,
ne bzre̱ꞌe̱ le̱ꞌ lizre benneꞌ caꞌ bebéaje̱ꞌ.
56 Da xula buluzúe̱ꞌ Dios chaláꞌala, ne buluché̱ꞌe̱
Dios, nape̱ꞌ dute̱ xel-laꞌ szren.
Quebe buluzúe̱ꞌ dizraꞌ da caꞌ gunná beꞌene̱ꞌ le̱ꞌ.
57 Da xula guledábague̱ꞌ Dios ca belún xra xrtawe̱ꞌ caꞌ.
Gulaque̱ꞌ ca tu bdxequeꞌ xala chee̱ xaga nalá xécheꞌze.
58 Buluché̱ꞌe̱ Le̱ꞌ ne̱ chee̱ lataj caꞌ naga bulucáꞌana
szrene̱ꞌ bedáuꞌ xiaj xaga caꞌ,
ne ne̱ chee̱ bedáuꞌ xiaj xaga chee̱ꞌ caꞌ bzráꞌale̱ꞌe̱ Dios.
59 Bzraꞌa Dios gate bléꞌene̱ꞌ na,
naꞌ gucuídele̱ꞌe̱ne̱ꞌ benneꞌ chee̱ꞌ caꞌ, benneꞌ Israel.
60 Guleaj xíchaje̱ꞌ xuꞌu xide láꞌazxa chee̱ꞌ zua na xe̱zre Silo,
xuꞌu xide naꞌ guzuáqueze̱ꞌ ládujla benneꞌ caꞌ.
61 Be̱ꞌe̱ lataj belecáꞌa benneꞌ caꞌ dxeledábague̱ꞌ dxiꞌu
xiꞌina láꞌazxa chee̱ꞌ,
da naꞌ dxuléꞌe na xel-laꞌ waca, ne xel-laꞌ szren chee̱ꞌ.
62 Bzre̱ꞌe̱ benneꞌ chee̱ꞌ caꞌ,
naꞌ bdee̱ꞌ le̱ꞌ lu naꞌ benneꞌ caꞌ belútie̱ꞌ le̱ꞌ.
63 Benneꞌ wal-la caꞌ gulátie̱ꞌ lu wedil-la.
Quebe nu zraꞌ benneꞌ weguꞌ, benneꞌ xelezúale̱ne̱ꞌ
nuꞌula weguꞌ caꞌ.
64 Cáꞌanqueze gulate bxruze caꞌ lu wedil-la,
naꞌ nuꞌula chee̱ bxruze caꞌ quebe gulebezre xache̱ꞌ
chee̱ bxruze caꞌ.
65 Nadxa guca Xránadxu ca tu benneꞌ dxexebane̱ꞌ lu bchigala.
Guque̱ꞌ ca tu benneꞌ wal-la dxebezre xe̱ꞌe̱ gate ba néꞌaje̱ꞌ
xrise uva wal-la.
66 Naꞌ blague̱ꞌ benneꞌ guledábague̱ꞌ Le̱ꞌ,
ne bcaꞌane̱ꞌ le̱ꞌ cáꞌaze chadía chacanna.
67 Bzue̱ꞌ chaláꞌala zriꞌine zre sua José,
ne quebe bequé̱ꞌe̱ zriꞌine zre sua Efraín,
68 san bequé̱ꞌe̱ zriꞌine zre sua Judá,
ne xiꞌa Sión, da naꞌ nazríꞌile̱ꞌe̱ne̱ꞌ.
69 Lu xiꞌa naꞌ be̱ne̱ꞌ xudauꞌ láꞌazxa chee̱ꞌ,
da guca na ca naca da zua na xabáa.
Bzua chúchue̱ꞌ na chadía chacanna,
ca nácaqueze xe̱zr la xu nigá.
70 Bequé̱ꞌe̱ David, benneꞌ we̱n zrin chee̱ꞌ.
Bebéaje̱ꞌ le̱ꞌ naga zaj zraꞌ zrilaꞌ caꞌ.
71 Beche̱ꞌe̱ le̱ꞌ naga zue̱ꞌ dxuxúe̱ꞌ zrilaꞌ caꞌ zaj nache̱ꞌe̱baꞌ be̱dauꞌ,
chee̱ gaque̱ꞌ wenná bea, benneꞌ guxúe̱ꞌ bénneache chee̱ꞌ,
zriꞌine zre sua Jacob, benneꞌ zaj naque̱ꞌ benneꞌ Israel caꞌ.
72 Dute̱ xel-laꞌ du lazreꞌ chee̱ꞌ bxue̱ꞌ benneꞌ caꞌ.
Bxue̱ꞌ le̱ꞌ dute̱ xel-laꞌ waca zren chee̱ꞌ.