77
Nen chiꞌa bláwizraꞌ Dios.Bláwizraꞌ Dios, naꞌ Le̱ꞌ buzé̱ nague̱ꞌ chiꞌa.
2 Guxuꞌa lau Xránadxu lu zra guzúaꞌ lu da ba xaꞌ.
Chizrela guchisa naꞌa lau Le̱ꞌ, ne quebe guzúa zriaꞌ.
Quebe be̱ꞌa lataj nu benneꞌ xue zrene̱ꞌ nedaꞌ.
3 Bsa lazraꞌ chee̱ Dios, ne guzúaꞌ ste̱be.
Gudawaꞌ zria lawe̱ꞌ, ne bedú lazraꞌ.
4 Begúe̱ꞌ bchigala chiaꞌ.
Guzúaꞌ sté̱bele̱ꞌe̱, ne quebe guca guchálajaꞌ.
5 Blaba lazraꞌ ca naca zra nédxute̱.
Ca naca iza zan caꞌ da ba guledé chee̱ na.
6 Bsa lazraꞌ ca naca da bil-laꞌ chizrélala,
ne blaba lázrequezaꞌ ca zaj naca na, naꞌ gunaba beꞌ xuꞌa:
7 ¿Guzúa Xránadxu dxiꞌu chaláꞌala tu chiꞌize
ne québedxa gácale̱ne̱ꞌ dxiꞌu?
8 ¿Cabátadxa xexache lazre̱ꞌ dxiꞌu?
¿Cabátadxa gune̱ꞌ ca da guche̱be lazre̱ꞌ?
9 ¿Gul-la lázrequeze Dios xexache lazre̱ꞌ dxiꞌu?
¿Dxezré̱ꞌe̱ dxiꞌu, naꞌ québedxa xexache lazre̱ꞌ dxiꞌu?
10 Nadxa gunníaꞌ: Caní dxunaꞌ laweꞌ da quebe chaweꞌ zuaꞌ.
Chee̱ le̱ naꞌ cheajsá lazraꞌ chee̱ xúgute̱ da zrente̱
da be̱n Dios zrente̱ lu iza ba guledé chee̱ na.
11 Cheajsá lazraꞌ chee̱ da zrente̱ caꞌ da be̱n Jah.
Aweꞌ, cheajsá lazraꞌ chee̱ da be̱nuꞌ nédxudaute̱ da caꞌ
dxexebánentuꞌ.
12 Gulaba lazraꞌ ca naca xúgute̱ da ba be̱nuꞌ,
ne guchálajaꞌ ca zaj naca da nunuꞌ.
13 Dios, láꞌazxa naca da dxusé̱denuꞌ netuꞌ ca guntuꞌ.
¿Zua xetú Dios naque̱ꞌ benneꞌ zren ca naca Dios chee̱ntuꞌ?
14 Lueꞌ nacuꞌ Dios, dxunuꞌ da caꞌ dxexebánentuꞌ.
Bléꞌenuꞌ xúgute̱ bénneache lu xe̱zr la xu ca zrente̱
naca xel-laꞌ waca chiuꞌ.
15 Nen xel-laꞌ waca chiuꞌ bexaꞌu bénneache chiuꞌ,
zriꞌine zre sua Jacob, ne zriꞌine zre sua José.
16 Xe̱gu nisa caꞌ beleléꞌen Lueꞌ, Dios.
Beleléꞌe xe̱gu nisa caꞌ Lueꞌ, naꞌ belezrébele̱ꞌe̱ na.
Cáꞌanqueze gulezúa ste̱be nísadauꞌ situj caꞌ.
17 Nisa xiuj zila bdxuaj na lu beuj bza caꞌ,
ne gulenné̱le̱ꞌe̱ guziuꞌ, ne gulé̱pele̱ꞌe̱ xesa.
18 Lu beꞌ bdunuꞌ ben guziuꞌ chiuꞌ da gunné̱le̱ꞌe̱ na.
Bulusaníꞌ xesa guziuꞌ ca naca xe̱zr la xu.
Guzúa ste̱be, ne guzrize xe̱zr la xu.
19 Laweꞌ nísadauꞌ guzaꞌu,
ne laweꞌ nisa zila caꞌ gudéquezuꞌ,
ne quebe naca bea naga bléajuꞌ.
20 Guche̱ꞌu bénneache chiuꞌ ca zrilaꞌ caꞌ
lu naꞌ Moisés, ne lu naꞌ Aarón.