76
Zaj núnbea benneꞌ Judá caꞌ Dios,naꞌ ládujla benneꞌ Israel zrente̱ nácaqueze La Le̱ꞌ.
2 Lu xe̱zre Salem zua lataj láꞌazxa chee̱ꞌ.
Lu xe̱zre Sión zua naga zúaqueze̱ꞌ.
3 Lataj naꞌ gudíchaje̱ꞌ xaga nalá xécheꞌze caꞌ,
ne xia da dxucuꞌuj na benneꞌ lu wedil-la,
ne ca naca da dxuluchínene̱ꞌ lu wedil-la.
4 Benneꞌ xabáa nacuꞌ Lueꞌ,
ne Benneꞌ wál-ladxa ca xiꞌa zriꞌa caꞌ.
5 Xeajlechaze benneꞌ wal-la caꞌ, ne guláse dínnaje̱ꞌ.
Netú benneꞌ wal-la caꞌ quebe belexechisa ne̱ꞌe̱ chee̱
xelune̱ꞌ wedil-la.
6 Dios chee̱ benneꞌ Israel caꞌ, gate gudil-luꞌ benneꞌ caꞌ,
guláse dinnaj bzrinaꞌ caꞌ, ne benneꞌ gulebíe̱ꞌ-baꞌ.
7 Nacuꞌ Lueꞌ Benneꞌ zrébedxu.
¿Nu benneꞌ gaca se̱ꞌ lau Lueꞌ gate dxezraꞌu?
8 Xabáate̱ gunnáꞌu, naꞌ guchiꞌu chee̱ bénneache.
Dxelezrebe bénneache lu xe̱zr la xu, naꞌ dxelebeze̱ꞌ
9 zra seuꞌ Lueꞌ, Dios, chee̱ guchiꞌu chee̱ bénneache,
ne chee̱ guseláuꞌ xúgute̱ benneꞌ dxexruj lazreꞌ zaj
zre̱ꞌe̱ lu xe̱zr la xu.
10 Da líqueze xel-laꞌ dxelezráꞌa chee̱ bénneache
gaca na tu da gucáꞌana szren na Lueꞌ.
Guzúa zriuꞌ xel-laꞌ dxelezráꞌa chee̱ bénneache zaj nagáꞌane̱ꞌ.
11 Le che̱be lázrele da gunle chee̱ Dios,
naꞌ le gun da naꞌ chee̱ Xránadxu, Dios chee̱le.
Xúgute̱ benneꞌ zaj zre̱ꞌe̱ du gabiꞌila xelelé̱ꞌe̱,
naꞌ xulunézruje̱ꞌ da zaj nuꞌe̱ chee̱ Dios,
Bénneaꞌ dxezrébedxu.
12 Guzague̱ꞌ da xuꞌu lu xichaj lázxdau benneꞌ blau caꞌ.
Le̱ꞌ dxuchebe̱ꞌ benneꞌ wenná bea caꞌ zaj zre̱ꞌe̱ lu xe̱zr la xu.