81
Lu dute̱ xel-laꞌ dxebé le gul-la chee̱ Dios, Bénneaꞌ dxutipe̱ꞌlázredxu.
Lu da ba neza chee̱le le cuezre xaꞌa lau Dios chee̱
zriꞌine zre sua Jacob.
2 Le gul-la, ne le capa xídedauꞌ.
Le quinne xrtan da con zríadiꞌi na du, ne da dxúl-lale̱nle.
3 Le gucuezre luzu da dxulucuezre̱ꞌ gate naca beuꞌ dxeꞌene,
da naca na zra nuzúadxu gundxu laní láꞌazxa.
4 Naca na tu da dxun na ba xen xelún benneꞌ Israel caꞌ,
da bdxixruj bea Dios xelún zriꞌine zre sua Jacob.
5 Bzue̱ꞌ na ca tu da guléꞌe lau na zriꞌine zre sua José
gate beledxúaje̱ꞌ lu xe̱zr la xu Egipto,
naga bendaꞌ tu xrtizraꞌ bénneache da quebe guxéajniꞌidaꞌ.
6 Gunná Dios: “Begúaꞌ xuaꞌ da buludé̱ꞌe̱ꞌ benneꞌ chiaꞌ caꞌ.
Bsezráꞌa benneꞌ chiaꞌ caꞌ da ziꞌi.”
7 Lu da ba xaꞌ da guzúale, bláwizrale nedaꞌ, naꞌ bseláꞌ leꞌe.
Beche̱baꞌ chee̱le naga nagachaꞌ lu beuj bza gate naꞌ
gunné̱le̱ꞌe̱ guziuꞌ,
naꞌ bxuaꞌ ájala gunle naga zaj de̱ beaj nisa zaj nazí le Meriba.
8 Le xene, bénneache chiaꞌ, naꞌ gusízredaꞌ leꞌe.
Leꞌe, benneꞌ Israel, che dxaca lázrele sile da dxenníaꞌ,
9 quebe gápale tu dios chee̱ benneꞌ xula,
ne quebe guzú zríbele lau tu dios chee̱ benneꞌ zituꞌ.
10 Nedaꞌ, Xránale, nacaꞌ Dios chee̱le.
Bebéajaꞌ leꞌe lu xe̱zr la xu Egipto.
Le salaj dxúꞌale, naꞌ gunnaꞌ da gágule.
11 Bénneache chiaꞌ quebe belúe lazre̱ꞌ da gunníaꞌ.
Benneꞌ Israel caꞌ quebe gulaca lazre̱ꞌ xelezíꞌ lu ne̱ꞌe̱ nedaꞌ.
12 Chee̱ le̱ naꞌ bsanaꞌ benneꞌ caꞌ laweꞌ da gulaque̱ꞌ
lázxdau zideꞌ.
Belune̱ꞌ ca da guléquene̱ꞌ xrlátaje.
13 Che la gulebéꞌ gunne xue bénneache chiaꞌ chee̱ da gunníaꞌ,
ne che la belún benneꞌ Israel ca da bleꞌedaꞌ le̱ꞌ,
14 naꞌ chadite̱ bzria xiꞌa benneꞌ guledábague̱ꞌ le̱ꞌ,
ne gudíl-lale̱naꞌ benneꞌ guledíl-lale̱ne̱ꞌ le̱ꞌ.
15 Che la belún benneꞌ Israel caní,
naꞌ benneꞌ caꞌ dxelecuídene̱ꞌ Xránadxu buluzúe̱ꞌ xrtizre̱ꞌ,
(san chadía chacanna zaj nabague̱ꞌ zria),
16 naꞌ Dios gune̱ꞌ xelawe̱ꞌ zruaꞌ xtila cháwedauꞌ,
ne gune̱ꞌ xelélajquezne̱ꞌ nen bzrínaꞌdauꞌ.