73
Da líqueze ba be̱n Dios da chaweꞌ chee̱ benneꞌ Israel caꞌ,benneꞌ caꞌ zaj naque̱ꞌ du lazreꞌ lau Dios.
2 Nedaꞌ ba guzúa cheajcháziaꞌ lu dul-la.
Ba guzúa gunaꞌ tu da zrinnaj,
3 laweꞌ da gucaꞌ zreꞌe lazreꞌ ne̱ chee̱ benneꞌ gunníꞌa caꞌ,
gate bleꞌedaꞌ ca dxelepe ban benneꞌ caꞌ zaj nabéaj xíchaje̱ꞌ Dios.
4 Benneꞌ caní quebe zaj zue̱ꞌ ste̱be chee̱ xel-laꞌ gute,
laweꞌ da zaj zúale̱ꞌe̱ chaweꞌ.
5 Quebe dxeledée̱ꞌ lu da ba xaꞌ ca da dxeledé xúgute̱ benneꞌ caꞌ,
ne quebe dxelezaca ziꞌe̱ ca da dxaca chee̱ xezícadxa bénneache.
6 Chee̱ le̱ naꞌ dxulucáꞌana szren cuine̱ꞌ.
Tu dxelexúbezquezne̱ꞌ dxelune̱ꞌ da cale̱la.
7 Dxelánnie̱ꞌ laweꞌ da dxelagu cháwele̱ꞌe̱.
Dxelezíle̱ꞌe̱ ca naca da dxelezá lazre̱ꞌ.
8 Dxelún le̱ꞌ chee̱ Dios, ne dxelenné̱ꞌ cale̱la ca da zrinnaj
da xelune̱ꞌ.
Dute̱ xel-laꞌ dxulucáꞌana szren cuina dxuluchálaje̱ꞌ da zrente̱.
9 Dxelenné̱ꞌ chee̱ da caꞌ zaj zua xabáa,
ne dxuluchálaje̱ꞌ ca benneꞌ zaj nape̱ꞌ dute̱ xe̱zr la xu.
10 Chee̱ le̱ naꞌ xúgute̱ bénneache dxelune̱ꞌ le̱ꞌ tu zren,
ne dxeleziꞌe̱ ca da dxelenná benneꞌ gunniꞌa caꞌ.
11 Dxelenná benneꞌ caꞌ dxelune̱ꞌ da cale̱la:
“¿Ájazra gaca neze Dios?
¿Dxeléꞌequeze Bénneaꞌ zue̱ꞌ naꞌala?”
12 Benneꞌ caní zaj naque̱ꞌ benneꞌ zaj nabéaj xíchaje̱ꞌ Dios,
naꞌ dxelepe bane̱ꞌ lu xe̱zr la xu, ne dxelaque̱ꞌ gunníꞌa.
13 Da líqueze, dácheze naca gucaꞌ du lazreꞌ,
ne quebe bi da cale̱la nunaꞌ.
14 Gudéaꞌ lu da ba xaꞌ tu zra tu zra,
ne gudéaꞌ xel-laꞌ ziꞌ xúgute̱ zra.
15 La nniaꞌ nedaꞌ: Guchálajaꞌ ca dxuluchalaj benneꞌ caꞌ,
naꞌ si xe̱ꞌa bénneachedu caꞌ chiuꞌ, Dios.
16 Gate blaba lazraꞌ chee̱ chéajniꞌidaꞌ da nigá,
guca na sté̱bele̱ꞌe̱ chiaꞌ nedaꞌ.
17 Gate guxuꞌa lu lataj láꞌazxa chee̱ Dios,
naꞌ guque beꞌedaꞌ da gaca chee̱ benneꞌ caꞌ gate cheajsé̱.
18 Da líqueze nunuꞌ chee̱ benneꞌ caꞌ cheajlecházie̱ꞌ,
ne gunuꞌ xelebía xíꞌqueze̱ꞌ.
19 Chadite̱ gulebía xíꞌqueze̱ꞌ.
Belexenite̱ꞌ lu xel-laꞌ gulezrébele̱ꞌe̱.
20 Zaj naque̱ꞌ ca tu da bleꞌedxu lu xe̱la da dxexenite na
gate dxexebandxu.
Caꞌan gaca, Xran, gate chasuꞌ, guzúꞌ chaláꞌala ca da
gulaca benneꞌ caꞌ.
21 Gate gucaꞌ zreꞌe lazreꞌ chee̱ benneꞌ caꞌ,
guzúa lázrdawaꞌ lu da ste̱be.
22 Laweꞌ da gucaꞌ xichaj zideꞌ, naꞌ quebe guxéajniꞌidaꞌ
gucaꞌ ca tu be̱ xixreꞌ lau Lueꞌ.
23 Tu guzúazquezaꞌ nen Lueꞌ, naꞌ gucaꞌu naꞌa xabe̱la.
24 Bsiꞌu nedaꞌ chee̱ gunaꞌ da dxuléꞌenuꞌ nedaꞌ,
naꞌ te nigá xezíꞌ lu naꞌu nedaꞌ lu xabáa chiuꞌ.
25 Quebe nu xetú zua chiaꞌ xabáa san tuzuꞌ Lueꞌ,
ne quebe nu xetú dxezá lazraꞌ lu xe̱zr la xu, san tuzuꞌ Lueꞌ.
26 Dxelexedú lazreꞌ be̱laꞌ dxen chiaꞌ, ne lázrdawaꞌ.
Dios naque̱ꞌ Benneꞌ dxutipe̱ꞌ lazraꞌ,
ne naque̱ꞌ da ba neza chiaꞌ chadía chacanna.
27 Benneꞌ caꞌ dxelexecuase̱ꞌ naga zuꞌ xelexenítie̱ꞌ.
Guzría xiꞌu xúgute̱ benneꞌ caꞌ xelexebeaj xíchaje̱ꞌ Lueꞌ.
28 Ca naca chiaꞌ nedaꞌ, dxaca chaweꞌ chiaꞌ laweꞌ da gubigaꞌ
lau Dios.
Tu dxebeza lázrezquezaꞌ Xránadxu Dios,
chee̱ guchálajquezaꞌ ca naca da zrente̱ da nune̱ꞌ.