74
Dios, ¿tu chíꞌizqueze nuzúꞌ netuꞌ chaláꞌala?¿Dxezraꞌu netuꞌ, nácantuꞌ ca zrilaꞌ chiuꞌ caꞌ?
2 Bsá lazreꞌ bénneache chiuꞌ, benneꞌ caꞌ guziꞌu nédxudaute̱.
Benneꞌ caꞌ bexaꞌu chee̱ gunuꞌ xelaque̱ꞌ benneꞌ cheé̱quezuꞌ,
benneꞌ caꞌ zaj zre̱ꞌe̱ lu xiꞌa Sión nigá, naga zúaquezuꞌ Lueꞌ.
3 Gudá xedajnnáꞌu ca nabía xiꞌ xe̱zre nigá,
ne ca naca da cale̱la da belún benneꞌ caꞌ
dxeledábague̱ꞌ netuꞌ, lu lataj láꞌazxa chiuꞌ.
4 Dxelebezre xaꞌa benneꞌ caꞌ dxeledábague̱ꞌ Lueꞌ
laduj naga zaj nazraga bénneache chiuꞌ.
Zaj nuzúe̱ꞌ nigá da dxululéꞌe na xuꞌuntuꞌ lu naꞌ benneꞌ caꞌ.
5 Buluzría xiꞌe̱ xe̱zre nigá,
ca dxun tu benneꞌ dxine̱ꞌ ca naca xaga zaj ze̱ tu xiꞌa.
6 Naꞌa nen xa waga chee̱ꞌ caꞌ, ne nen xaga chee̱ꞌ caꞌ,
ba buluzría xiꞌe̱ ca naca lechítaje̱ chee̱ xudauꞌ chiuꞌ.
7 Ba buluzézxie̱ꞌ lataj láꞌazxa chiuꞌ.
Bulucáꞌana dítaje̱ꞌ xuꞌu lizruꞌ.
Buluchínnaje̱ꞌ na.
8 Lu lázrdawe̱ꞌ gulenné̱ꞌ: “Guzría xíꞌtegadxu na tu chiꞌize.”
Ba buluzézxie̱ꞌ xúgute̱ xuꞌu naga bezrágantuꞌ chiuꞌ
lu xe̱zr la xu chiuꞌ.
9 Québedxa dxeléꞌentuꞌ da laꞌaxza caꞌ da dxululéꞌe na
da guchísantuꞌ lu xe̱zr la xu chee̱ntuꞌ.
Québedxa nu chiláꞌ benneꞌ guchálaje̱ꞌ waláz chiuꞌ,
ne quebe nu zua ládujla netuꞌ, benneꞌ nézene̱ꞌ bátaqueze lantuꞌ.
10 Dios, ¿Báta cueza na xulucháchale̱ benneꞌ caꞌ netuꞌ,
benneꞌ caꞌ dxulusaca ziꞌe̱ netuꞌ?
¿Chadía chacanna welenné̱ benneꞌ dxeledábague̱ꞌ lueꞌ
schanniꞌ chee̱ Lauꞌ?
11 ¿Bizr chee̱ naꞌ quebe dxebéaj lazruꞌ benneꞌ caꞌ?
¿Bizr chee̱ naꞌ quebe dxuzría xiꞌu benneꞌ caꞌ dxelune̱ꞌ da cale̱la?
12 Lueꞌ, Dios, nacuꞌ Wenná Bea chiaꞌ nédxudaute̱.
Luéꞌqueze dxuseláuꞌ bénneache dute̱ xe̱zr la xu.
13 Xel-laꞌ waca chiuꞌ be̱nuꞌ nísadauꞌ chupa laꞌa.
Gulaꞌu xichaj be̱ schanniꞌ caꞌ lu nísadauꞌ.
14 Bzúzrujuꞌ xichaj be̱ schanniꞌ le̱baꞌ leviatán,
Naꞌ be̱nuꞌ gulagu be̱ xixreꞌ le̱baꞌ, bea caꞌ zaj zrabaꞌ lu xu bizre.
15 Be̱nuꞌ gulaj nisa beaj, ne nisa xe̱gu caꞌ.
Bsebizruꞌ xe̱gu zriꞌa caꞌ.
16 Chiuꞌ Lueꞌ naca te zra, ne cáꞌanqueze chiuꞌ naca dxe̱la.
Lueꞌ bzuꞌ beuꞌ, ne gubizra naga dxeledé na.
17 Lueꞌ bzuꞌ tu chiꞌize ca naca da zaj de̱ xe̱zr la xu nigá.
Lueꞌ be̱nuꞌ beuꞌ la caꞌ, ne beuꞌ zaga caꞌ.
18 Bsa lazreꞌ da nigá: Benneꞌ caꞌ dxeledábague̱ꞌ lueꞌ
ba zaj nun le̱ꞌ chiuꞌ Lueꞌ, Xran.
Benneꞌ xala caꞌ ba gulenné̱ꞌ schanniꞌ chee̱ Lauꞌ.
19 Quebe gusanuꞌ lu naꞌ benneꞌ zaj naque̱ꞌ ca be̱ snia caꞌ
benneꞌ caꞌ nazríꞌiquezuꞌ,
ne quebe gal-la lazruꞌ tu chiꞌize bénneache chiuꞌ zaj
zue̱ꞌ lu da ba xaꞌ.
20 Gunnáꞌ ca naca xel-laꞌ wezría da be̱nuꞌ,
laweꞌ da gátete̱ze naca chul-la lu xe̱zr la xu,
naꞌ zaj zraꞌ benneꞌ caꞌ dxelune̱ꞌ da zrinnaj.
21 Quebe guꞌu lataj xelegáꞌana lu xel-laꞌ stuꞌ benneꞌ
caꞌ zaj zue̱ꞌ lu da baxacheꞌ.
Benneꞌ dxelezaca ziꞌe̱, ne benneꞌ dxelexázrjene̱ꞌ
xelúe láꞌane̱ꞌ Lauꞌ.
22 ¡Guzé̱, Dios!
¡Be̱n ca ba gunnáuꞌ!
¡Bsa lazreꞌ ca dxelún benneꞌ xala caꞌ, dxelún le̱ꞌ chiuꞌ
te zra te zra!
23 Quebe gal-la lazruꞌ ca da gulenná benneꞌ caꞌ
dxeledábague̱ꞌ lueꞌ.
Da schaga dxelún benneꞌ caꞌ dxeledábague̱ꞌ Lueꞌ
tu dxénzqueze na.