72
¡Dios, be̱n guchiꞌa wenná bea da dxaca chee̱ntuꞌca dxuchíꞌaquezuꞌ Lueꞌ,
ne be̱n xelaca xrlátaje zriꞌine wenná bea naꞌ!
2 Nadxa le̱ꞌ guchiꞌa chee̱ bénneache chiuꞌ ca naca
da naca xrlátaje,
ne ca naca da li guchiꞌe̱ chee̱ benneꞌ chiuꞌ caꞌ zaj zue̱ꞌ
lu da ba xaꞌ.
3 Lu xiꞌa caꞌ xelebeza zri lazreꞌ bénneache chiuꞌ,
ne lu xíꞌadu caꞌ xelezúe̱ꞌ lu da naca chaweꞌ.
4 Guchiꞌe̱ chee̱ benneꞌ caꞌ zaj zue̱ꞌ lu da ba xaꞌ
lu xe̱zre chee̱ntuꞌ,
ne guselé̱ꞌ bidu caꞌ chee̱ benneꞌ caꞌ dxelexázrjene̱ꞌ,
ne guzría xiꞌe̱ benneꞌ caꞌ dxulusaca ziꞌe̱ bénneache.
5 Xelezrebe̱ꞌ Lueꞌ dxácate̱ ne zua gubizra,
ne beuꞌ laweꞌ tu cuen tu cuen bénneache.
6 Gaca wenná bea naꞌ ca nisa xiuj da dxaca naga ba nadín,
ne ca xrle̱ꞌe̱la da dxaca dxe̱la lu xe̱zr la xu.
7 Lu zra chee̱ wenná bea naꞌ gaca da xrlátaje,
ne xelebeza zri lazreꞌ bénneache dxácate̱ ne zua beuꞌ.
8 Nna beꞌe̱ dute̱ xe̱zr la xu,
ne dxuꞌa xe̱gu Eufrates, ga zrinte̱ dxuꞌa nísadauꞌ.
9 Lau le̱ꞌ xuluzú zribe benneꞌ caꞌ zaj zre̱ꞌe̱ xe̱zr la xu,
naꞌ guzéxruje̱ꞌ lazreꞌ benneꞌ guledábague̱ꞌ Le̱ꞌ.
10 Benneꞌ wenná bea chee̱ xe̱zr la xu Tarsis,
ne wenná bea caꞌ chee̱ tu tu cueꞌ xe̱zr la xu zituꞌ caꞌ
xelelé̱ꞌe̱ zaj nuꞌe̱ da xulunézruje̱ꞌ chee̱ꞌ,
naꞌ benneꞌ wenná bea chee̱ xe̱zr la xu Sabá,
ne wenná bea chee̱ Seba xulunézruje̱ꞌ chee̱ꞌ da gunníꞌa.
11 Xúgute̱ benneꞌ wenná bea caꞌ xuluzú zribe̱ꞌ lau le̱ꞌ,
naꞌ benneꞌ xúgute̱ cueꞌ xe̱zr la xu xelune̱ꞌ zrin chee̱ꞌ.
12 Le̱ꞌ guselé̱ꞌ benneꞌ caꞌ dxelexázrjene̱ꞌ,
benneꞌ dxululáwizre̱ꞌ le̱ꞌ,
ne guselé̱ꞌ benneꞌ caꞌ zaj zue̱ꞌ lu da ba xaꞌ,
ne quebe sua nu benneꞌ gácale̱ne̱ꞌ le̱ꞌ.
13 Xexache lazre̱ꞌ benneꞌ xacheꞌ caꞌ, ne benneꞌ caꞌ
dxelexázrjene̱ꞌ,
naꞌ guselé̱ꞌ benneꞌ xacheꞌ caꞌ chee̱ xelaca bane̱ꞌ.
14 Xexáꞌawe̱ꞌ benneꞌ xacheꞌ caꞌ lu naꞌ benneꞌ we̱n lazreꞌ caꞌ,
ne benneꞌ snia caꞌ.
Gune̱ꞌ ba xuzre guselé̱ꞌ benneꞌ caꞌ lu naꞌ benneꞌ caꞌ
dxelutie̱ꞌ benneꞌ.
15 Gaca ban wenná bea nigá,
naꞌ xulunézruje̱ꞌ chee̱ꞌ oro chee̱ xe̱zr la xu Sabá,
naꞌ tu xelenábazqueze bénneache Dios gácale̱ne̱ꞌ le̱ꞌ,
ne te zra chizrela xelenabe̱ꞌ Dios gune̱ꞌ gaca chaweꞌ
chee̱ wenná bea naꞌ.
16 Tu zrígadauze zruaꞌ xtila xelaze̱ꞌ lu xe̱zr la xu,
ne lu xíꞌadu caꞌ,
da cuíale̱ꞌe̱ na ca da dxebía lu xiꞌa Líbano,
naꞌ benneꞌ zaj zre̱ꞌe̱ lu xe̱zre caꞌ xelane̱ꞌ ca xixreꞌ ze̱ lu xe̱zr la xu.
17 Tu súazqueze la benneꞌ wenná bea naꞌ.
Tu xuluchálajzqueze̱ꞌ chee̱ la le̱ꞌ dxácate̱ ne zua gubizra.
Ne̱ chee̱ le̱ꞌ gaca da ba neza chee̱ bénneache xúgute̱
cueꞌ xe̱zr la xu,
naꞌ xelenné̱ꞌ chee̱ꞌ naca chee̱ꞌ da ba neza zrente̱.
18 Xrlátaje naca Xránadxu Dios, Dios chee̱ benneꞌ Israel caꞌ,
naꞌ tuze Le̱ꞌ dxune̱ꞌ da dxexebánedxu.
19 Xrlátaje naca La Le̱ꞌ da naca na da xabáa chadía chacanna,
naꞌ dute̱ xe̱zr la xu nigá xeleléꞌene̱ꞌ da xabáa chee̱ꞌ.
¡Caꞌan naca na, ne caꞌan gaca na!
20 Nigá dxexuzre xrtizraꞌ David, da dxuchálajle̱ne̱ꞌ Dios.
David nigá naque̱ꞌ zriꞌine Isaí.