71
Zaꞌa lauꞌ Lueꞌ, Xran, chee̱ guxruꞌ nedaꞌ.Be̱n québedxa xeduéꞌedaꞌ.
2 Gúcale̱ nedaꞌ, ne bselá nedaꞌ nen dute̱ da naca xrlátaje chiuꞌ.
Bze̱ naga chiꞌa, ne bselá nedaꞌ.
3 Nacuꞌ ca tu xiaj xre naga suaꞌ chaweꞌ, naꞌ waca xidaꞌ
naga zuꞌ te zra chizrela.
Gunná beꞌenuꞌ nu guselá nedaꞌ, laweꞌ da nacuꞌ Lueꞌ
ca tu xiaj xre naga dxaca dipa lazraꞌ.
4 Dios chiaꞌ, bselá nedaꞌ lu naꞌ benneꞌ caꞌ zaj nabéaj xíchaje̱ꞌ Lueꞌ,
ne lu naꞌ benneꞌ caꞌ dxelune̱ꞌ da cale̱la ne zaj naque̱ꞌ xichaj zraꞌa,
5 laweꞌ da dxebeza lazraꞌ Lueꞌ, Xranaꞌ Dios.
Nacuꞌ Bénneaꞌ dxuxúe̱ꞌ nedaꞌ gate nácateaꞌ bídauꞌte̱.
6 Lueꞌ núxruquezuꞌ nedaꞌ gate gúlajteaꞌ.
Lueꞌ be̱nuꞌ bdxuajaꞌ lu le̱ꞌe̱ xrnaꞌa.
¡Tu güe láꞌanazquezaꞌ Lueꞌ!
7 Belexebane benneꞌ zante̱ ca naca chiaꞌ,
ne ca naca chiuꞌ, dxuxúe xánniuꞌ nedaꞌ.
8 Be̱n tu gul-lazquezaꞌ da güe láꞌanaꞌ Lueꞌ,
ne gucáꞌana szrenaꞌ Lueꞌ du zra.
9 Quebe guzúꞌ nedaꞌ chaláꞌala gate ba guxrúaꞌ.
Gate ba bedú lazraꞌ, quebe gusanuꞌ nedaꞌ.
10 Benneꞌ dxeledábague̱ꞌ nedaꞌ dxelenné̱ꞌ chiaꞌ,
naꞌ benneꞌ caꞌ dxelezá lazre̱ꞌ xelútie̱ꞌ nedaꞌ belune̱ꞌ tuze dizraꞌ,
11 dxelenné̱ꞌ: “Ba bsan Dios le̱ꞌ.
Chéajdxu cheajté̱ladxu le̱ꞌ laweꞌ da québedxa nu zua
nu guselá le̱ꞌ.”
12 ¡Dios, quebe suꞌ zituꞌ naga zuaꞌ!
¡Dios chiaꞌ, gudázega gácale̱nuꞌ nedaꞌ!
13 ¡Be̱n xelexeduéꞌene̱ꞌ!
“Be̱n xelexenite benneꞌ caꞌ dxeledábague̱ꞌ nedaꞌ.”
“Be̱n xelezúa xel-laꞌ stuꞌ, ne xeleque zréaje benneꞌ caꞌ
dxelezá lazre̱ꞌ xelune̱ꞌ chiaꞌ da cale̱la.”
14 Nedaꞌ tu cueza lázrezquezaꞌ Lueꞌ,
ne tu güe láꞌanazquezaꞌ Lueꞌ.
15 Guzendaꞌ bénneache nacuꞌ xrlátaje,
ne tu guzénzquezdaꞌ le̱ꞌ ca da be̱nuꞌ bseláuꞌ nedaꞌ,
láqueze quebe nezdaꞌ bal-la lasa bseláuꞌ nedaꞌ.
16 Tu guchálajzquezaꞌ chee̱ da zrente̱ da be̱nuꞌ Lueꞌ,
Xranaꞌ Dios,
ne gusáꞌa lazreꞌ bénneache chee̱ da xrlátaje cheé̱quezuꞌ.
17 Dios, Lueꞌ bsé̱denuꞌ nedaꞌ gate nácateaꞌ bidauꞌte̱.
Dxuléꞌedaꞌ bénneache ca naca da zrente̱ da be̱nuꞌ.
18 Dios, quebe gusán lazruꞌ nedaꞌ gate bache guxrúaꞌ,
ne ba bguchaꞌ.
Be̱ꞌ nedaꞌ lataj guzendaꞌ zriꞌine zre suaꞌ ca naca
xel-laꞌ waca chiuꞌ,
ne guzendaꞌ bi za xelalaj ca naca xel-laꞌ wal-la chiuꞌ,
19 ne ca naca da xrlátaje chiuꞌ, da naca na da zrente̱, Dios.
Lueꞌ ba be̱nuꞌ da zaj nácale̱ꞌe̱ na zrente̱.
Dios, ¿Núzraqueze ca Lueꞌ?
20 Lueꞌ be̱nuꞌ gudéaꞌ lu da ste̱be zante̱, ne lu da cale̱la caꞌ,
naꞌ gunuꞌ xexaca banaꞌ, naꞌ da xula xechisuꞌ nedaꞌ lu xe̱dxu ba.
21 ¡Gucáꞌana szrendxuꞌ nedaꞌ,
ne xue zrénquezuꞌ nedaꞌ!
22 ¡Cáꞌanqueze güe láꞌanaquezaꞌ Lueꞌ, quínniaꞌ da gul-lale̱naꞌ!
¡Dios chiaꞌ, gúl-laquezaꞌ chee̱ da li chiuꞌ, quínniaꞌ
da duꞌ zríadiꞌi na du!
¡Nacuꞌ Benneꞌ Láꞌazxa chee̱ benneꞌ Israel caꞌ!
23 ¡Suaꞌ lu da ba neza gate gúl-laquezaꞌ chiuꞌ Lueꞌ,
ne béqueze bénneꞌdu xuꞌa, bénneꞌduꞌ bexaꞌu!
24 ¡Tu guchálajzquezaꞌ chee̱ da xrlátaje chiuꞌ te zra chizrela,
laweꞌ da be̱nuꞌ belexeduéꞌe, ne guleque zréaje
benneꞌ caꞌ belune̱ꞌ ba xuzre xelune̱ꞌ chiaꞌ da cale̱la!