65
Naca chiuꞌ Lueꞌ, Dios, güe láꞌanantuꞌ Lueꞌ lu xe̱zre Sión,naꞌ guntuꞌ da guche̱be lázrentuꞌ chiuꞌ.
2 Lueꞌ dxénqueznuꞌ da dxuchálajle̱ntuꞌ Lueꞌ,
naꞌ xeleláꞌ lau Lueꞌ xúgute̱ bénneache.
3 Nabágale̱ꞌa da zrinnaj da be̱naꞌ,
san Lueꞌ dxunite lauꞌ ca da gudábagantuꞌ Lueꞌ.
4 Ba neza zrente̱ naca na chee̱ bénneaꞌ dxecaꞌu Lueꞌ,
ne dxenníuꞌ le̱ꞌ gaque̱ꞌ chiuꞌ, chee̱ súaqueze̱ꞌ lataj láꞌazxa chiuꞌ.
Xélajquezentuꞌ da xrlátaje da de̱ lizruꞌ, da caꞌ da zaj de̱
xudauꞌ láꞌazxa chiuꞌ.
5 Lu da xrlátaje chiuꞌ gunuꞌ da zaj naca zrente̱ gate gunuꞌ
ca da dxenábantuꞌ Lueꞌ, Dios, Benneꞌ dxuselé̱ꞌ netuꞌ.
Xúgute̱ bénneache zaj zraꞌ dute̱ xe̱zr la xu dxelebeza lazre̱ꞌ Lueꞌ,
ne cáꞌanqueze dxelebeza lazreꞌ benneꞌ dxeledée̱ꞌ
zítuꞌla laweꞌ nísadauꞌ.
6 Luéꞌqueze dxuzúa chuchuꞌ xiꞌa zren caꞌ nen xel-laꞌ waca chiuꞌ.
Nácaquezuꞌ Benneꞌ wal-la.
7 Dxebeche zriuꞌ nísadauꞌ gate dxelucu na,
ne schaga da dxelún xeajxruza chee̱ na.
Dxebeche zriuꞌ benneꞌ xe̱zr la xu gate dxeledábague̱ꞌ Lueꞌ.
8 Chee̱ le̱ naꞌ benneꞌ zaj zre̱ꞌe̱ dute̱ xe̱zr la xu
xelezrebe̱ꞌ ca naca da zrente̱ da dxunuꞌ.
Dxuzúꞌ lu da ba neza bénneache zaj zraꞌ du gabíꞌi xe̱zr la xu.
9 Dxennaꞌu xe̱zr la xu, ne dxesel-luꞌ nisa xiuj.
Dxunuꞌ dxúnnale̱ꞌe̱ na lina chee̱ na.
Nuzúaquezuꞌ lu xe̱zr la xu xe̱gu caꞌ da zaj de̱le̱ꞌe̱ na nisa.
Dxucuezuꞌ zruaꞌ za da xelagu bénneache,
ca ba núnquezuꞌ gaca na.
10 Dxesel-luꞌ nisa xiuj naga ba zaj nune̱ꞌ naꞌ.
Dxunuꞌ dxexaca na xu xaꞌa.
Dxuculu na nen nisa xiuj naꞌ.
Dxunuꞌ dxelegula chaweꞌ da du caꞌ ba zaj naxaza na.
11 Dxunuꞌ dxelexezíꞌ bénneache ba neza tu iza tu iza
ne̱ chee̱ da dxunézrujuꞌ,
naꞌ ca zaj naca beuj bza chiuꞌ dxelunna na xiuj
da dxun na dxelegula chaweꞌ da zaj naza bénneache.
12 Dxelunna na xiuj naga dxeledá be̱ xíxreꞌdu caꞌ da dxelágubaꞌ,
naꞌ dxelebé bénneache dxeleléꞌene̱ꞌ ca bane zaj zua xíꞌadu caꞌ.
13 Lacheꞌ caꞌ zaj zraꞌ zrilaꞌ caꞌ,
naꞌ dxuꞌa xé̱gudu caꞌ zaj naxaza zruaꞌ xtila,
naꞌ dxelebezre xaꞌa bénneache chiuꞌ dute̱ xel-laꞌ dxelebé,
ne dxelúl-laqueze̱ꞌ chiuꞌ.