66
Le gucáꞌana szren Dios dute̱ xel-laꞌ dxebé,leꞌe zrale dute̱ xe̱zr la xu.
2 Le gul-la ca naca xel-laꞌ szren chee̱ le̱ꞌ.
Le gucáꞌana szrene̱ꞌ gate dxue láꞌanale Le̱ꞌ.
3 Le xe̱ Dios: “Dxebánele̱ꞌe̱quezentuꞌ ca zaj naca da nunuꞌ.”
Ne̱ chee̱ xel-laꞌ szren chee̱ xel-laꞌ waca chiuꞌ xuluzúa
xrtizruꞌ benneꞌ caꞌ dxeledábague̱ꞌ lueꞌ.
4 Xúgute̱ bénneache zaj zraꞌ dute̱ xe̱zr la xu xelúe
láꞌanaqueze̱ꞌ Lueꞌ, ne xelúl-laqueze̱ꞌ chiuꞌ.
Tu xelúl-lazqueze̱ꞌ chee̱ Láquezuꞌ.
5 Le da, léꞌele ca zaj naca da nun Dios.
Da zrébedxu zaj naca da be̱ne̱ꞌ chee̱ benneꞌ caꞌ
belune̱ꞌ da cale̱la.
6 Be̱ne̱ꞌ bexaca nísadauꞌ xu bizre.
Guledé bénneache chee̱ꞌ níꞌaze̱ꞌ naga nedxu de̱ tu xe̱gu situj.
Dxuꞌa nísadauꞌ naꞌ gubéle̱ꞌe̱dxu lau Dios.
7 Dute̱ xel-laꞌ waca chee̱ꞌ nna beꞌe̱ chadía chacanna.
Dxuxúequeze̱ꞌ ca da dxelún bénneache dute̱ xe̱zr la xu.
Benneꞌ dxeledábague̱ꞌ Le̱ꞌ quebe xelezruéꞌequezne̱ꞌ xel-laꞌ szren.
8 Leꞌe, bénneache, le gucáꞌana szren Dios chee̱dxu,
ne le guzén bénneache ca da dxue láꞌanale Le̱ꞌ.
9 Lé̱queze̱ꞌ bxue̱ꞌ dxiꞌu chee̱ naca bandxu,
ne quebe be̱ꞌe̱ lataj cheajcházedxu.
10 Luéꞌqueze bxuꞌ netuꞌ ca da be̱ntuꞌ, Dios.
Bdeuꞌ netuꞌ xel-laꞌ ziꞌ ca dxelún bénneache dxuludée̱ꞌ
xia plata lu xiꞌ chee̱ xegáꞌana chawe na.
11 Be̱nuꞌ xeajchúꞌuntuꞌ tu lu xralaj.
Bdaꞌu cúzruntuꞌ tu xua zíꞌile̱ꞌe̱.
12 Be̱nuꞌ guledé xíchajntuꞌ benneꞌ zaj zrie̱ꞌ bzrinaꞌ chee̱ꞌ caꞌ.
Gudentuꞌ tu lu xiꞌ, ne tu lu nisa situj,
naꞌ bebéajuꞌ netuꞌ, ne bzuꞌ netuꞌ tu lataj naga zúantuꞌ
lu da ba neza.
13 Chúꞌuquezaꞌ lu xuꞌu lizruꞌ chee̱ guzézxeaꞌ béadu caꞌ,
ne gunnaꞌ chiuꞌ ca da guche̱be lazraꞌ gunaꞌ,
14 da naꞌ guche̱be lazraꞌ ca da gunníaꞌ
gate guzúaꞌ lu da sté̱bele̱ꞌe̱.
15 Guzézxeaꞌ béadu caꞌ, be̱ dxelanne lauꞌ Lueꞌ,
ne gunaꞌ cuen zren chee̱ zrílaꞌdu caꞌ lauꞌ,
ne gutiaꞌ be̱zre caꞌ, ne chivo biu caꞌ lauꞌ.
16 Le da, xénele, xúgute̱le dxezrébele Dios,
naꞌ guzendaꞌ leꞌe ca da be̱ne̱ꞌ gúcale̱ne̱ꞌ nedaꞌ.
17 Du lazraꞌ bláwizraꞌ Le̱ꞌ,
ne bcaꞌana szrénquezaꞌ Le̱ꞌ.
18 La guzé̱ lazraꞌ tu da cale̱la,
quebe ben Xránadxu chiaꞌ.
19 Da líqueze bene Dios chiꞌa.
Bze̱ nague̱ꞌ ca da gunábedaꞌ Le̱ꞌ.
20 ¡Gaca báqueze Dios!
¡Quebe bzue̱ꞌ chaláꞌala da bchálajle̱naꞌ Le̱ꞌ,
san bexache lazre̱ꞌ nedaꞌ!