64
Dios, bze̱ naga chiꞌa laweꞌ da zuaꞌ ste̱be dxuláwizraꞌ Lueꞌ.Bxue xel-laꞌ nabán chiaꞌ laweꞌ da dxezrebaꞌ bi xelún benneꞌ caꞌ
dxeledábague̱ꞌ nedaꞌ.
2 Bcache chaweꞌ nedaꞌ chee̱ quebe xelún benneꞌ we̱n
da cale̱la chiaꞌ ca da dxelezá lazre̱ꞌ,
ne chee̱ quebe xelún benneꞌ dxelún da zrinnaj chiaꞌ
ca da zaj nune̱ꞌ xelune̱ꞌ chiaꞌ.
3 Dizraꞌ dxuluchálaje̱ꞌ zaj naca na ca xia zaj nalále̱ꞌe̱ na,
ne dxelenné̱ꞌ schanniꞌ ca dxun tu benneꞌ dxusane̱ꞌ
xaga nalá xécheꞌze chee̱ꞌ.
4 Caní dxelenné̱ꞌ bagácheze chee̱ xelune̱ꞌ cheajlechaze
benneꞌ zaj naque̱ꞌ li lazreꞌ.
Chadite̱ dxelune̱ꞌ na, ne quebe bi dxelezrebe̱ꞌ.
5 Dxelune̱ꞌ ba xuzre xelune̱ꞌ da zrinnaj da zaj nune̱ꞌ xelune̱ꞌ,
naꞌ dxuluzúe̱ꞌ xralaj caꞌ chee̱ xele̱le̱ꞌ bénneache,
dxelenné̱ꞌ: “¿Nuzra leꞌe da dxundxu?”
6 Dxelílaje̱ꞌ ca zaj naca da zrinnaj xelune̱ꞌ,
ne dxelennáꞌ xánnie̱ꞌ ca zaj naca na.
Ca da zaj xuꞌu xichaj lázrdawe̱ꞌ zaj naca na sté̱bele̱ꞌe̱
ca zaj naca lázrdauqueze̱ꞌ.
7 Dios gune̱ꞌ benneꞌ caꞌ we̱ꞌ nen tu xaga nalá xécheꞌze chee̱ꞌ.
Chadite̱ xeluꞌe̱ xízrawe̱ꞌ zren caꞌ.
8 Dizraꞌ buluchalaj benneꞌ caꞌ xelún na cheajlecházie̱ꞌ,
naꞌ xelezrebe xúgute̱ bénneache gate xeleléꞌene̱ꞌ benneꞌ caꞌ.
9 Nadxa xelezrebe xúgute̱ bénneache, ne xuluzenne̱ꞌ
ca da nun Dios,
naꞌ xuluxúnbeꞌe̱ ca zaj naca da be̱ne̱ꞌ Le̱ꞌ.
10 Béqueze benneꞌ xrlátaje lau Xránadxu, ne guxrén lazre̱ꞌ Le̱ꞌ,
naꞌ xelezúa lu da ba neza xúgute̱ benneꞌ zaj naque̱ꞌ li lazreꞌ.