63
1-2 Dios, Lueꞌ nacuꞌ Dios chiaꞌ.Dxebile bénneꞌdu xuꞌa da naca chiuꞌ,
naꞌ be̱laꞌ dxen chiaꞌ dxezá lazreꞌ na da naca chiuꞌ.
Naca chiaꞌ ca zúaquezaꞌ tu xe̱zr la xu bizre naga
quebe bi nisa de̱.
Dxaníꞌsiseze xidaꞌ lau Lueꞌ chee̱ leꞌedaꞌ xel-laꞌ waca chiuꞌ,
ne xel-laꞌ szren chiuꞌ,
cáte̱ze ba bleꞌedaꞌ da naca chiuꞌ lu lataj láꞌazxa chiuꞌ.
3 Cháwedxa naca xel-laꞌ dxexache lazreꞌ chiuꞌ
ca xel-laꞌ nabánqueze.
Chee̱ le̱ naꞌ güe láꞌanaquezaꞌ Lueꞌ.
4 Caníqueze nniaꞌ chiuꞌ da xrlátaje dxácate̱ naca banaꞌ.
Chee̱ gucáꞌana szrenaꞌ Lauꞌ chísaquezaꞌ naꞌa.
5 Xélaje bénneꞌdu xuꞌa da naca na ca be̱se zrita,
ne be̱laꞌ da dxánnele̱ꞌe̱,
naꞌ dute̱ xel-laꞌ dxebé güe láꞌanaquezaꞌ Lueꞌ
6 gate dxajsá lazraꞌ chiuꞌ, ne deaꞌ ga dxataꞌ,
ne gate dxulaba lazraꞌ ca naca chiuꞌ gate dxennazaꞌ chizrela.
7 Laweꞌ da dxácale̱nuꞌ nedaꞌ, béle̱ꞌe̱daꞌ cuituꞌ
ca dxelún bedxuj dxéꞌenedu caꞌ zran xrila bedzuj.
8 Naca bénneꞌdu xuꞌa Lueꞌ tuze.
Nen naꞌu wal-la nuxruꞌ nedaꞌ.
9 Benneꞌ caꞌ gulezá lazre̱ꞌ xuluzría xiꞌe̱ nedaꞌ
cheajlecházie̱ꞌ lataj ba xaꞌ.
10 Xelebía xiꞌe̱ lu xia nalá.
Xelaque̱ꞌ da xelagu becuꞌ xixreꞌ caꞌ.
11 Nedaꞌ, wenná bea, bedaꞌ lu da naca chee̱ Dios.
Xegáꞌana ba láꞌana nútete̱ze benneꞌ dxuluchínene̱ꞌ laꞌ,
laweꞌ da xelezxuj dxuꞌa benneꞌ caꞌ dxelenné̱ꞌ da we̱n lazreꞌ.