62
Tuze nen Dios dxebeza zri lazreꞌ bénneꞌdu xuꞌa.Lé̱queze̱ꞌ dxuselé̱ꞌ nedaꞌ.
2 Tuze Le̱ꞌ dxucuꞌuje̱ꞌ nedaꞌ, ne dxuselé̱ꞌ nedaꞌ.
Naque̱ꞌ Bénneaꞌ dxuxre̱ꞌ nedaꞌ, naꞌ quebe negue lazraꞌ.
3 ¿Ajate̱zchaꞌ gucuézale da gunle chee̱ tu benneꞌ,
naꞌ dxunle ba xen xúgute̱le guzría xile le̱ꞌ,
ca dxun tu benneꞌ dxuchínnaje̱ꞌ tu zeꞌe da ba de̱ chaláꞌala,
u tu leꞌaj da ba guzruꞌ?
4 Dxunle tuze dizraꞌ ájazra xebéajle nedaꞌ lu xel-laꞌ szren chiaꞌ.
Nazríꞌile da we̱n lazreꞌ.
Nen dxúꞌale dxenne̱le da xrlátaje, san xuꞌu lázrdaule da cale̱la.
5 Lueꞌ, bénneꞌdu xuꞌa, guleza lazreꞌ tuze Dios,
laweꞌ da naca Le̱ꞌ Bénneaꞌ dxebeza lazraꞌ.
6 Tuze Le̱ꞌ dxucuꞌuje̱ꞌ nedaꞌ, ne dxuselé̱ꞌ nedaꞌ.
Naque̱ꞌ Bénneaꞌ dxuxre̱ꞌ nedaꞌ, naꞌ quebe negue lazraꞌ.
7 Naca Dios Bénneaꞌ dxuselé̱ꞌ nedaꞌ, ne naque̱ꞌ da ba neza chiaꞌ.
Naca Dios Bénneaꞌ dxucuꞌuje̱ꞌ nedaꞌ, ne Benneꞌ dxuxre̱ꞌ nedaꞌ.
8 Le cueza lazreꞌ Le̱ꞌ tu chíꞌizqueze, leꞌe, bénneache.
Le xe̱ꞌe̱ ca da dxezá lázrele.
Naca Dios Bénneaꞌ dxuxre̱ꞌ dxiꞌu.
9 Da líqueze, da dácheze zaj naca bénneache,
ne ca tu da we̱n lazreꞌ benneꞌ zren caꞌ.
Quebe bi dxelé̱ꞌe̱ tu lu zrgúꞌunsa.
Zaj nácadxe̱ꞌ zraze ca tu beꞌ da dxecáꞌa lázredxu.
10 Quebe guxrén lázrele da sile gate dxexúbele,
ne quebe gucáꞌana szren cuínale chee̱ da caꞌ dxebanle.
Che dxegula xel-laꞌ gunníꞌa chee̱le, quebe xezaca ba lázrele
chee̱ da naꞌ.
11 Tu lásaze gunná Dios:
naꞌ chupa lasa bendaꞌ da nigá:
Chee̱ Dios naca xel-laꞌ waca.
12 Chiuꞌ Lueꞌ, Xran, naca xel-laꞌ dxexache lazreꞌ
laweꞌ da dxunézrujuꞌ lazruj chee̱ tu tu bénneache
cáte̱ze da zaj nune̱ꞌ.