50
Ba gunné̱ Xránadxu Dios, ne ba nutube̱ꞌ bénneachechee̱ dute̱ xe̱zr la xu,
benneꞌ zaj zre̱ꞌe̱ naga dxalaj gubizra,
ne benneꞌ zaj zre̱ꞌe̱ naga dxebía na.
2 Lu xiꞌa Sión, da naca na xrtánle̱ꞌe̱ ba bzaníꞌ Dios.
3 Xeláꞌ Dios chee̱dxu, ne quebe sua zrie̱ꞌ.
Gálajqueze xiꞌ lau Le̱ꞌ,
ne gácale̱ꞌe̱ beꞌ bdunuꞌ da chechaj na Le̱ꞌ.
4 Xutúbequeze̱ꞌ benneꞌ zaj zre̱ꞌe̱ xabáa naꞌala,
ne benneꞌ zaj zre̱ꞌe̱ xe̱zr la xu,
chee̱ guchiꞌe̱ chee̱ bénneache chee̱ꞌ.
5 Dxenné̱ꞌ: “Le xutube benneꞌ chiaꞌ caꞌ,
benneꞌ caꞌ belune̱ꞌ tu xel-laꞌ wezría nen nedaꞌ
da buluzúa chúchue̱ꞌ nen dxen chee̱ béadu caꞌ.”
6 Da zua xabáala guléꞌe lau na naque̱ꞌ xrlátaje,
laweꞌ da naca Dios Benneꞌ guchiꞌe̱ chee̱ bénneache.
7 Dxenné̱ꞌ: “Le xen, bénneache chiaꞌ, naꞌ guchálajaꞌ.
Le guzé̱ nágale, benneꞌ Israel, naꞌ nniaꞌ
da gagu na zria chee̱le.
Nedaꞌ, Dios, nacaꞌ Dios chee̱le.
8 Quebe til-laꞌ leꞌe ca naca béadu caꞌ bé̱tele lawaꞌ,
ne ca naca béadu caꞌ bzézxele,
da zaj zúaqueze na lawaꞌ nedaꞌ.
9 Quebe caꞌa lu naꞌale me̱du caꞌ,
ne chivo biu caꞌ, be̱ nápaquezle
10 laweꞌ da zaj naca chiaꞌ xúgute̱ be̱ xixreꞌ caꞌ,
ne zane gaxúa be̱ xixreꞌ zaj zrabaꞌ lu xíꞌadu caꞌ.
11 Xuꞌu lu naꞌa xúgute̱ be̱ zua xrila,
ne naca chiaꞌ xúgute̱ be̱ zaj naca banbaꞌ.
12 Chela nedaꞌ dxedunaꞌ, quebe xapaꞌ leꞌe caꞌ
laweꞌ da naca chiaꞌ xe̱zr la xu, ne xúgute̱ da de̱ lawe na.
13 ¿Dxun na ba xen gawaꞌ be̱laꞌ be̱zre caꞌ?
¿Xíꞌajaꞌ dxen chee̱ chivo biu caꞌ?
14 Le guzúa lau Dios da güe láꞌanale Le̱ꞌ
ne le gunezruj ca da guche̱be lázrele lau Dios szrente̱.
15 Bláwizra nedaꞌ lu zra zuꞌ lu da ziꞌ da xaꞌ,
naꞌ guseláꞌ lueꞌ, naꞌ lueꞌ gapuꞌ nedaꞌ ba láꞌana.”
16 Dios guzre̱ꞌ benneꞌ we̱n da cale̱la:
“¿Bi dxéquenuꞌ lueꞌ, dxuchálajuꞌ ca nadxixruj biꞌa,
ne dxenníuꞌ ca naca chee̱ xel-laꞌ wezría chiaꞌ?
17 Lueꞌ dxecuídenuꞌ nedaꞌ che dxusízredaꞌ lueꞌ,
ne dxuzúꞌ chaláꞌala dizraꞌ chiaꞌ.
18 Gate dxeléꞌenuꞌ gubán, naꞌ dxunuꞌ le̱ꞌ tu zren,
ne nacuꞌ tu zren benneꞌ caꞌ dxeledále̱ne̱ꞌ nuꞌula
quebe zaj naca zruꞌule̱ꞌ.
19 Dxuchálajquezuꞌ da cale̱la,
ne tu dxúnzquezuꞌ da we̱n lazreꞌ.
20 Tu dxenné̱zquezuꞌ da cale̱la chee̱ bi bíchequezuꞌ,
Ne dxaguꞌ zria chee̱ bi chee̱ xrnáꞌaquezuꞌ.
21 Da caní be̱nuꞌ, naꞌ nedaꞌ guzúaꞌ zrize.
Gúquenuꞌ nacaꞌ tu benneꞌ ca nacuꞌ lueꞌ.
Naꞌa wadíl-laquezaꞌ lueꞌ, ne guléꞌedaꞌ lueꞌ ca ba be̱nuꞌ.”
22 Le chéajniꞌi da nigá naꞌa, leꞌe dxal-la lázrele Dios.
Ga gaze guzuzruj Dios leꞌe, ne québedxa sua nu guselá leꞌe.
23 Bénneaꞌ guzúe̱ꞌ lawaꞌ da güe láꞌane̱ꞌ nedaꞌ gape̱ꞌ
nedaꞌ ba láꞌana,
naꞌ bénneaꞌ dxuxuchá cuine̱ꞌ chee̱ gune̱ꞌ da xrlátaje,
guléꞌedaꞌ le̱ꞌ ca guseláꞌ le̱ꞌ, nacaꞌ Dios chee̱ꞌ.