51
Gúcale̱ nedaꞌ, Dios, lu dute̱ xel-laꞌ dxexache lazreꞌ chiuꞌ.Dute̱ xel-laꞌ dxexache lazreꞌ chiuꞌ bsula zria da nabagaꞌ.
2 Gudibe nedaꞌ ca naca da cale̱la da nunaꞌ,
ne bcaꞌana chaweꞌ nedaꞌ chee̱ dul-la da be̱naꞌ,
3 laweꞌ da dxexúnbeꞌa ca be̱naꞌ gudábagaꞌ Lueꞌ,
ne ca naca dul-la chiaꞌ tu dxáguze na zria nedaꞌ.
4 Lauꞌ Lueꞌ be̱naꞌ dul-la.
Aweꞌ, lauꞌ Luéꞌqueze, ne ba be̱naꞌ da cale̱la lauꞌ Lueꞌ.
Caní dxaca na chiaꞌ chee̱ gaca bea nacuꞌ xrlátaje lu da dxenníuꞌ,
ne nacuꞌ du lazreꞌ ca da dxuchiꞌu chee̱ bénneache.
5 Gunnáꞌ xque, báchequeze nabagaꞌ dul-la gate gúlajteaꞌ,
ne lu dul-la zúaquezaꞌ gate guzrán xrnaꞌa nedaꞌ.
6 Lueꞌ dxezá lazruꞌ sua da li lu xichaj lázrdawaꞌ,
ne lu xichaj lázrdawaꞌ ba bzéajniꞌinuꞌ nedaꞌ da naca sina.
7 Bcaꞌana chaweꞌ nedaꞌ nen da naꞌ dxuchínenuꞌ,
naꞌ xegáꞌanaꞌ xrlátaje.
Gudibe nedaꞌ, naꞌ gacaꞌ chíchedxa ca tu bezxeꞌ.
8 Be̱n xendaꞌ xel-laꞌ dxebé, ne da ba neza,
naꞌ xelexezíꞌ le dipa zrita xuꞌa, da ba gudíchajuꞌ.
9 Quebe gusá lazruꞌ ca naca dul-la da be̱naꞌ,
naꞌ bsula xúgute̱ da cale̱la da nunaꞌ.
10 Dios, bzua nedaꞌ tu lázrdawaꞌ xrlátaje,
ne bzua tu beꞌ li lazreꞌ lu xichaj lázrdawaꞌ.
11 Quebe gucuasuꞌ nedaꞌ lauꞌ Lueꞌ,
ne quebe xecaꞌu lu xichaj lázrdawaꞌ beꞌ láꞌazxa chiuꞌ.
12 Bexunna nedaꞌ xel-laꞌ dxebé chee̱ xel-laꞌ weselá chiuꞌ,
ne bzua chuchu beꞌ chaweꞌ da xuꞌa.
13 Nadxa gusé̱dedaꞌ benneꞌ caꞌ dxelune̱ꞌ da zrinnaj
ca dxaca lazruꞌ xelune̱ꞌ,
naꞌ benneꞌ dul-la caꞌ xelexexaque̱ꞌ chiuꞌ Lueꞌ.
14 Bselá nedaꞌ lu zria da nabagaꞌ, be̱tiaꞌ benneꞌ.
Lueꞌ Dios, nacuꞌ Dios dxuseláuꞌ nedaꞌ,
naꞌ gúl-laquezaꞌ chee̱ da xrlátaje nacuꞌ Lueꞌ.
15 Xran, gusalaj dxuꞌa,
naꞌ guzendaꞌ bénneache da dxue láꞌanaꞌ Lueꞌ.
16 Quebe dxaca lazruꞌ béadu caꞌ gutiaꞌ-baꞌ lauꞌ,
ne quebe dxaca lazruꞌ béadu caꞌ guzézxeaꞌ lauꞌ.
17 Da guzúadxu lau Dios da dxaca lazre̱ꞌ naca na
tu lázxdau dxexruj lazreꞌ.
Tu lázxdau dxexruj lazreꞌ, ne da dxexíaje lazreꞌ
quebe guzúꞌ chaláꞌala, Dios.
18 Dute̱ xel-laꞌ zriꞌi lazreꞌ chiuꞌ, be̱n gaca chaweꞌ chee̱
xe̱zre Sión.
Bsegula zeꞌe da nazechaj na xe̱zre Jerusalén.
19 Nadxa xezaca ba lazruꞌ nen béadu caꞌ gútentuꞌ lauꞌ
dute̱ da naca xrlátaje chee̱ntuꞌ,
ne béadu caꞌ, ne da du caꞌ guzézxentuꞌ lauꞌ.
Nadxa xelútie̱ꞌ béadu caꞌ lu cugu chiuꞌ.