49
Le xen da nigá, leꞌe, benneꞌ xúgute̱ cueꞌ xe̱zr la xu.Le guzé̱ nágale, leꞌe, benneꞌ dute̱ xe̱zr la xu,
2 leꞌe, benneꞌ blau, ne leꞌe, benneꞌ xezícadxa,
leꞌe, benneꞌ gunníꞌa, ne leꞌe, benneꞌ xacheꞌ.
3 Guchálajquezaꞌ xel-laꞌ sina,
ne guzéajniꞌidaꞌ leꞌe da xuꞌu lázrdawaꞌ.
4 Guzé̱ nagaꞌ tu dizraꞌ sina.
Gúl-laquezaꞌ chee̱ tu da nagache,
ne quinniaꞌ da zríadiꞌi na du che̱n.
5 ¿Bizr chee̱ naꞌ dxun na ba xen zrebaꞌ lu zra chee̱ da ste̱be,
gate naxechaj da cale̱la nedaꞌ da dxelún benneꞌ
dxeledábague̱ꞌ nedaꞌ?
6 Benneꞌ caꞌ dxuluxrén lazre̱ꞌ da zaj de̱ chee̱ꞌ,
ne dxulucáꞌana szren cuine̱ꞌ laweꞌ da zaj nápale̱ꞌe̱.
7 Quebe xelezéquene̱ꞌ xelexáꞌawe̱ꞌ le saꞌ ljwezre̱ꞌ,
ne quebe gaca xulunézruje̱ꞌ Dios da guselá na le̱ꞌ
8-9 chee̱ tu xelaca bánzqueze̱ꞌ,
ne chee̱ cabataꞌ xeluzru be̱l-laꞌ dxen chee̱ꞌ
laweꞌ da zrente̱ naca da dxexaꞌu na xel-laꞌ nabán chee̱ bénneache,
ne cabataꞌ sequeꞌ nu benneꞌ quízruje̱ꞌ na.
10 Xeleléꞌene̱ꞌ dxelátequeze benneꞌ sina caꞌ,
ne xelúzrue̱ꞌ cáte̱ze dxaca chee̱ benneꞌ xala caꞌ,
ne chee̱ benneꞌ lázrdau zideꞌ caꞌ,
naꞌ dxulucáꞌane̱ꞌ xel-laꞌ gunníꞌa chee̱ꞌ lu naꞌ benneꞌ xula caꞌ.
11 Dxeléquene̱ꞌ wazráqueze zriꞌine zre sue̱ꞌ chadía chacanna,
naꞌ xelexegáꞌana lizre̱ꞌ chee̱ xelaca na chee̱ xúgute̱ cuen
xrtia ljwezre̱ꞌ,
naꞌ dxeluꞌe̱ la xe̱zr la xu chee̱ꞌ caꞌ ca zaj nazí láqueze̱ꞌ.
12 Quebe xelexegáꞌanatequeze bénneache lu da ba láꞌana.
Zaj naque̱ꞌ ca be̱ xixreꞌ caꞌ, be̱ dxelátebaꞌ.
13 Ca da dxelune̱ꞌ naca na da xálaze,
naꞌ dxelexezaca ba lazreꞌ xrtia ljwezre̱ꞌ caꞌ nen da dxelennaze̱ꞌ.
14 Zaj naque̱ꞌ ca tu cueꞌ zrilaꞌ zjácabaꞌ lataj ba xaꞌ,
naga guxúe xel-laꞌ gute le̱baꞌ.
Benneꞌ xrlátaje caꞌ xelenná béꞌene̱ꞌ benneꞌ gunníꞌa caꞌ
gate zaꞌ chaníꞌ,
naꞌ xelebía xiꞌ da caꞌ gutaꞌ chee̱ꞌ,
naꞌ lataj ba xaꞌ gaca na naga tu xelezúazqueze̱ꞌ.
15 Dios xexáꞌawe̱ꞌ xel-laꞌ nabán chiaꞌ lu lataj ba xaꞌ
laweꞌ da xeché̱ꞌe̱ nedaꞌ naga zúaqueze̱ꞌ Le̱ꞌ.
16 Quebe suꞌ ste̱be gate nu benneꞌ dxezruéꞌene̱ꞌ xel-laꞌ gunníꞌa,
ne gate dxune̱ꞌ lizre̱ꞌ da zácale̱ꞌe̱dxa,
17 laweꞌ da gate gatie̱ꞌ quebe bi xexuꞌe̱,
ne quebe chéajle̱ xel-laꞌ gunníꞌa chee̱ꞌ le̱ꞌ.
18 Lácala dxácate̱ naca bane̱ꞌ dxe̱ cuine̱ꞌ zue̱ꞌ
lu da ba neza zrente̱,
naꞌ dxelúe láꞌana bénneache le̱ꞌ gate dxe̱pe bane̱ꞌ,
19 san chuꞌe̱ naga zaj zra xra xrtawe̱ꞌ caꞌ,
ne cabátadxa léꞌene̱ꞌ xel-laꞌ naxaníꞌ.
20 Bénneaꞌ dxelapa bénneache le̱ꞌ ba láꞌana san quebe
bi dxéajniꞌine̱ꞌ
naque̱ꞌ ca be̱ xixreꞌ caꞌ, be̱ dxelátebaꞌ.