48
¡Zrente̱ naca Xránadxu!¡Naca chee̱ꞌ güe láꞌanale̱ꞌe̱dxu Le̱ꞌ
ga naca lu xe̱zre chee̱ Dios chee̱dxu,
da dxeꞌ na lu xiꞌa láꞌazxa chee̱ꞌ!
2 Sión, da naca na xiꞌa chee̱ Dios, naca na sibe, ne xrtante̱.
Naca na xe̱zre chee̱ Wenná Bea zrente̱,
da dxunna na xel-laꞌ dxebé dute̱ xe̱zr la xu nigá.
3 Dios ba bléꞌene̱ꞌ dxucache chawe̱ꞌ dxiꞌu,
lu xuꞌu zaca caꞌ chee̱ xe̱zre chee̱ꞌ naꞌ.
4 Belezraga benneꞌ wenná bea caꞌ,
naꞌ belelé̱ꞌe̱ chee̱ xeledíl-lale̱ne̱ꞌ xe̱zre nigá,
5 naꞌ gate beleléꞌene̱ꞌ na, naꞌ belexebánene̱ꞌ.
Belezrébe̱ꞌ, naꞌ buluzrúnnuje̱ꞌ.
6 Gulezré̱ꞌe̱ lu da ste̱be,
ne gulezúe̱ꞌ xel-laꞌ dxudía ca dxaca chee̱ tu nuꞌula
ba zua sane̱ꞌ bidauꞌ.
7 Gulaque̱ꞌ ca da caꞌ dxeledá laweꞌ nísadauꞌ dxexrite na
gate dxácale̱ꞌe beꞌ bdunuꞌ lu nísadauꞌ.
8 Bendxu ca da be̱n Dios, naꞌ naꞌa ba bleꞌedxu na,
ga naca lu xe̱zre chee̱ Xránadxu, nape̱ꞌ dute̱ xel-laꞌ waca,
da naca na xe̱zre chee̱ Xránadxu Dios.
Le̱ꞌ guzúa chawe̱ꞌ xe̱zre nigá chadía chacanna.
9 Ga naca lu xudauꞌ chiuꞌ Lueꞌ, Dios
dxajsá lázredxu ca naca xel-laꞌ zriꞌi lazreꞌ zren chiuꞌ.
10 Gátete̱ze naꞌ dxelúe láꞌana bénneache Lueꞌ,
naꞌ ca naca xel-laꞌ szren chiuꞌ dxezrín na
du gabíꞌi xe̱zr la xu.
Ca naca da xrlátaje dxenná beꞌu.
11 Xelebéle̱ꞌe̱ bénneache zaj zre̱ꞌe̱ Sión.
Xelebéle̱ꞌe̱ bénneache zaj zre̱ꞌe̱ xe̱zre caꞌ chee̱ Judá
ne̱ chee̱ da dxuchiꞌu chee̱ꞌ.
12 Leꞌe, bénneache chee̱ Dios, le chechaj dxuꞌa xe̱zre naꞌ,
ne le gulaba ca zaj naca xuꞌu sibe caꞌ,
da dxuluzé̱ chacha na xe̱zre naꞌ.
13 Le nnaꞌ xque ca naca zeꞌe zren naxechaj na xe̱zre naꞌ.
Le nnaꞌ xanneꞌ ca zaj naca xuꞌu wal-la chee̱ na,
chee̱ guzenle bi chee̱le ca naca xe̱zre naꞌ.
14 Dios nigá nácaqueze̱ꞌ Dios chee̱dxu chadía chacanna.
Le̱ꞌ tu guléꞌezquezne̱ꞌ dxiꞌu neza.