47
¡Le capa naꞌle, leꞌe, xúgute̱ bénneache!¡Le güe láꞌana Dios nen dute̱ xel-laꞌ dxebé!
2 Dxal-laꞌ zrébedxu Xránadxu, nape̱ꞌ dute̱ xel-laꞌ szren.
Naque̱ꞌ Wenná Bea zren dxenná béꞌene̱ꞌ dute̱ xe̱zr la xu.
3 Bzue̱ꞌ benneꞌ xe̱zr caꞌ zran níꞌadxu.
Bzue̱ꞌ dxiꞌu chee̱ nna beꞌedxu zánete̱ cueꞌ xe̱zr la xu caꞌ.
4 Bequé̱ꞌe̱ tu xe̱zr la xu da gaca na chee̱dxu,
Da naca tu xe̱zr la xu xrtante̱ chee̱ zriꞌine zre sua Jacob,
benneꞌ caꞌ nazríꞌine̱ꞌ.
5 Dxegüén Dios naga dxeꞌe̱ dxenná beꞌe̱.
Dxelebezre luzu da dxulucuezre̱ꞌ gate dxegüén Xránadxu ga naꞌ.
6 ¡Le gul-la da gaca ba Dios!
¡Le gul-la!
¡Le gul-la da gaca ba Wenná Bea chee̱dxu!
¡Le gul-la!
7 ¡Dios naque̱ꞌ Wenná Bea dute̱ lu xe̱zr la xu nigá!
¡Le gul-la chee̱ꞌ nen dute̱ xel-laꞌ dxéajniꞌi chee̱le!
8 Dxeꞌ Dios naga dxenná beꞌe̱, lu lataj naꞌ naca na láꞌazxa.
Dxenná béꞌene̱ꞌ xúgute̱ cueꞌ xe̱zr la xu caꞌ.
9 Dxelezraga benneꞌ dxelenná béꞌene̱ꞌ xúgute̱ cueꞌ xe̱zr la xu
tu zren nen bénneache chee̱ Dios chee̱ Abraham.
10 Benneꞌ caꞌ dxelenná beꞌe̱ du gabíꞌi xe̱zr la xu
buludée̱ꞌ xel-laꞌ dxenná bea chee̱ꞌ lu naꞌ Dios.
Le̱ꞌ dxenná béꞌene̱ꞌ xúgute̱ benneꞌ wenná bea caꞌ.