41
Ba neza zrente̱ naca na chee̱ bénneaꞌ dxeꞌe̱ gunne xuechee̱ benneꞌ xacheꞌ.
Lu zra gate zue̱ꞌ lu da ste̱be, guselá Xránadxu bénneaꞌ.
2 Xránadxu guxúequeze̱ꞌ le̱ꞌ, ne gunézruje̱ꞌ le̱ꞌ xel-laꞌ nabán.
Gaca na tu da ba neza zrente̱ chee̱ bénneaꞌ lu xe̱zr la xu nigá,
naꞌ quebe gudé Xránadxu le̱ꞌ lu naꞌ benneꞌ caꞌ dxeledábague̱ꞌ Le̱ꞌ.
3 Xránadxu Dios gúxruqueze̱ꞌ le̱ꞌ gate zúe̱ꞌ lu xel-laꞌ dxudía.
Gun chawe̱ꞌ dute̱ da naque̱ꞌ gate naꞌ quebe chaweꞌ zue̱ꞌ.
4 Gunníaꞌ: Xranaꞌ Dios, bexache lazreꞌ nedaꞌ.
Bexún bénneꞌdu xuꞌa laweꞌ da be̱naꞌ dul-la gate gudábagaꞌ Lueꞌ.
5 Benneꞌ caꞌ dxeledábague̱ꞌ nedaꞌ dxelenné̱ꞌ chiaꞌ da cale̱la.
Dxelenne̱ꞌ: “¿Bátala gate benneꞌ nigá, ne xenite le̱ꞌ?”
6 Che xedajlenné̱ꞌe̱ nedaꞌ, dxelún lazre̱ꞌ.
Dxelebéaje̱ꞌ nedaꞌ dizraꞌ chee̱ bi da cale̱la gaca xelenné̱ꞌ chiaꞌ,
naꞌ gate dxelexedxúaje̱ꞌ, naꞌ dxelexrúe̱ꞌ dizraꞌ naꞌ.
7 Gate dxelezraga benneꞌ dxelecuídene̱ꞌ nedaꞌ,
naꞌ tu dxelenné̱zqueze̱ꞌ chiaꞌ.
Tu dxuluchálajle̱zqueze̱ꞌ ljwezre̱ꞌ chiaꞌ nedaꞌ da naca
da cale̱la, dxelenné̱ꞌ:
8 “Ba guxúꞌe̱ tu xízrawe̱ꞌ da gute na le̱ꞌ,
ne québedxa xexásaqueze̱ꞌ ga naꞌ de̱ꞌ.”
9 Cáꞌanqueze bénneaꞌ guleza zri lazreꞌ nen nedaꞌ,
bénneaꞌ bxren lazraꞌ, naꞌ gudágule̱queze̱ꞌ nedaꞌ,
benneꞌ nigá dxedábagazegue̱ꞌ nedaꞌ.
10 Lueꞌ, Xranaꞌ Dios, bexache lazreꞌ nedaꞌ,
ne be̱n xexasaꞌ nedaꞌ,
naꞌ xunézrujaꞌ benneꞌ caꞌ ca da dxal-laꞌ xelezíꞌe̱.
11 Caníqueze nezdaꞌ ba be̱naꞌ da dxezaca ba lazruꞌ Lueꞌ,
chee̱ quebe bi xelebéle̱ benneꞌ caꞌ dxeledábague̱ꞌ nedaꞌ.
12 Ca naca chiaꞌ nedaꞌ, ba bé̱xruquezuꞌ nedaꞌ laweꞌ da
nacaꞌ du lazreꞌ,
ne ba bzuꞌ nedaꞌ lau Lueꞌ chadía chacanna.
13 ¡Gaca ba Xránadxu, Dios chee̱ benneꞌ Israel caꞌ
gaxuane iza, ne chadía chacanna!
¡Caꞌan naca na, ne caꞌan gaca na!