40
Nen dute̱ xel-laꞌ zren lazreꞌ chiaꞌ guleza lazraꞌ Xranaꞌ Dios,naꞌ bze̱ nague̱ꞌ chiaꞌ, ne benne̱ꞌ da gunábedaꞌ Le̱ꞌ.
2 Bebéaje̱ꞌ nedaꞌ ca tu lu xe̱dxu situj, ne lu da naca
ca gunaꞌ guzraꞌ.
Bzue̱ꞌ niꞌa ca tu lu xiaj xre, ne beguꞌe̱ nedaꞌ neza li.
3 Be̱ne̱ꞌ dxul-laꞌ tu da cube da naca na da dxue láꞌanaꞌ
Xránadxu.
Benneꞌ zante̱ xeleléꞌene̱ꞌ da nigá dxune̱ꞌ, naꞌ xelezrebe̱ꞌ Le̱ꞌ,
ne xuluxrén lazre̱ꞌ Xránadxu Dios.
4 Ba neza zrente̱ naca na chee̱ bénneaꞌ dxuxrén lazre̱ꞌ
Xránadxu Dios,
ne quebe dxune̱ꞌ ca dxelún benneꞌ caꞌ dxulucáꞌana szrene̱ꞌ
bedáuꞌ xiaj xaga caꞌ,
ne quegá ca dxelún benneꞌ caꞌ dxelún lazre̱ꞌ.
5 Da zante̱ be̱nuꞌ, Xranaꞌ Dios, da dxebánentuꞌ,
ne ca zaj naca da dxezá lazruꞌ gunuꞌ chee̱ntuꞌ
quebe gaca gulábantuꞌ lau Lueꞌ.
Chela nu guzendaꞌ ca zaj naca na,
ne che guchálajaꞌ chee̱ na, quebe baben tu na.
6 Quebe dxezaca ba lazruꞌ béadu caꞌ gutiaꞌ lauꞌ,
u da gunnaꞌ Lueꞌ,
ne quebe gunabuꞌ béadu caꞌ guzézxeaꞌ lauꞌ, u dxen chee̱
béadu caꞌ da guzúaꞌ lauꞌ ne̱ chee̱ dula nabagaꞌ,
san gusálajuꞌ nagaꞌ chee̱ xendaꞌ chiꞌu.
7 Nadxa gunníaꞌ: Gunáꞌ xque, zaꞌa nedaꞌ.
Lu xiche láꞌazxa naxúaj na ca naca chiaꞌ.
8 Dxezaca ba lazraꞌ gunaꞌ ca da dxaca lazruꞌ Lueꞌ, Dios chiaꞌ,
naꞌ da nadxixruj beꞌu zua na lu xichaj lázrdawaꞌ.
9 Ca naca da xrlátaje chiuꞌ ba bzendaꞌ bénneache
naga zaj nazraga chiuꞌ bénneache zante̱.
Gunnáꞌ xque, quebe guzúa zriaꞌ,
ca nézqueznuꞌ Lueꞌ, Xranaꞌ Dios.
10 Quebe bcáchezaꞌ ca da xrlátaje chiuꞌ lu lázrdawaꞌ.
Ba bchálajquezaꞌ ca naca xel-laꞌ li lazreꞌ chiuꞌ,
ne ca dxuseláuꞌ bénneache.
Quebe guzúaꞌ zri ca naca xel-laꞌ dxexache lazreꞌ chiuꞌ,
ne ca naca da li chiuꞌ ládujla benneꞌ zante̱ zaj nazrague̱ꞌ chiuꞌ.
11 Xran, quebe chenuꞌ xexache lazruꞌ nedaꞌ.
Xel-laꞌ dxexache lazreꞌ chiuꞌ, ne da li chiuꞌ
tu dxelácale̱zqueze na nedaꞌ.
12 Laweꞌ da ba guléchajle̱ꞌe̱ da cale̱la caꞌ nedaꞌ,
da cale̱la caꞌ da ba nunaꞌ zaj zria na nedaꞌ,
naꞌ quebe gaca nnaꞌa naga zuꞌ.
Zaj naxándxa na ca zaj naca xicha xíchajaꞌ, naꞌ dxedú lazraꞌ.
13 Dxenabaꞌ lauꞌ, Xran, guseláuꞌ nedaꞌ.
Xran, be̱n ba xuzre gácale̱nuꞌ nedaꞌ.
14 Be̱n xelexeduéꞌe, ne xeleque zréaje
xúgute̱ benneꞌ caꞌ dxelaca lazre̱ꞌ xelútie̱ꞌ nedaꞌ.
Be̱n xeajxaca bzé̱bela, ne xelexeduéꞌe
benneꞌ caꞌ dxelezá lazre̱ꞌ xelune̱ꞌ chiaꞌ da cale̱la.
15 Be̱n xeleque zréaje̱ꞌ laweꞌ da belún zréaje̱ꞌ nedaꞌ
benneꞌ caꞌ gulé̱ꞌe̱ nedaꞌ: “E, e.”
16 Be̱n xelebé, ne xelezúe lu da ba neza xúgute̱ benneꞌ caꞌ
dxelebeze̱ꞌ Lueꞌ,
ne be̱n xelennáqueze benneꞌ caꞌ zaj nazríꞌine̱ꞌ Lueꞌ,
weselá chee̱ꞌ.
Xelenné̱ꞌ: “Xegáꞌana szrénqueze Xránadxu.”
17 Láqueze suaꞌ nedaꞌ lu da ba xaꞌ, ne lu da baxacheꞌ,
guxúequeze Xranaꞌ Dios ájala gune̱ꞌ chiaꞌ.
Nacuꞌ Benneꞌ dxácale̱ne̱ꞌ nedaꞌ, ne Benneꞌ weselá chiaꞌ.
Dios chiaꞌ, quebe chenuꞌ gácale̱nuꞌ nedaꞌ.