39
Nedaꞌ gunníaꞌ: Guxúe xanneꞌ cuinaꞌ chee̱ quebe gunaꞌ dul-lalu da guchálajaꞌ.
Tu guxúe xánnezquezaꞌ ca da guchálajaꞌ dxácate̱ naꞌ
zua benneꞌ we̱n da cale̱la naga zuaꞌ.
2 Guzúaꞌ zrize ca tu benneꞌ quebe dxaca nnie̱ꞌ,
ne québequeze bchálajaꞌ da xrlátaje,
naꞌ bzáladxa xel-laꞌ dxudía chiaꞌ.
3 Guca lázrdawaꞌ ca tu da dxala,
naꞌ lu da dxulaba lazraꞌ guca na ca tu xiꞌ.
Naꞌ gunabaꞌ lau Xránadxu, gunníaꞌ:
4 Xran, bleꞌe nedaꞌ da gaca chiaꞌ,
ne ájate̱ zra gaca banaꞌ.
Bzéajniꞌi nedaꞌ chadite̱ nazruzre gatiaꞌ.
5 Nunuꞌ chiaꞌ suaꞌ bábaze zra,
naꞌ iza chiaꞌ québequeze bi naca na lau Lueꞌ.
¡Da líqueze quebe bi zaj naca zra chee̱ xúgute̱ bénneache!
6 ¡Da líqueze zaj naca bénneache ca tu zrúl-laze!
¡Da líqueze dácheze naca zaj dxeꞌ bénneache gunne xue
chee̱ xel-laꞌ nabán chee̱ꞌ!
¡Dxulucúdie̱ꞌ xel-laꞌ gunníꞌa, ne quebe zaj nézene̱ꞌ
nu chee̱ gaca na!
7 Naꞌa, Xran, ¿bízraqueze cueza lazraꞌ?
Tuzuꞌ Lueꞌ dxal-laꞌ cueza lazraꞌ.
8 Bselá nedaꞌ lu xúgute̱ da zrinnaj da be̱naꞌ.
Quebe guꞌu lataj benneꞌ xala caꞌ xelún le̱ꞌ chiaꞌ.
9 Guzúaꞌ zrize, ne quebe bi bchálajaꞌ
laweꞌ da Luéꞌqueze be̱nuꞌ guca caní chiaꞌ.
10 Becáꞌa xízrawe̱ꞌ da bzuꞌ lu be̱laꞌ dxen chiaꞌ.
Bache gatiaꞌ lu da dxusacuꞌ nedaꞌ.
11 Dxudéuꞌ ba xaꞌ tu benneꞌ ba nun dul-la
chee̱ dxuzéajniꞌinuꞌ le̱ꞌ,
ne ca dxun béadu dxutebaꞌ ladxeꞌ dxuzría xiꞌu
da nazríꞌidxe bénneaꞌ.
¡Da líqueze quebe bi zaj naca zra chee̱ xúgute̱ bénneache!
12 Bene da dxenabaꞌ lau Lueꞌ, Xran,
ne bze̱ naga ca da dxuláwizraꞌ Lueꞌ.
Quebe suꞌ zrize gate zuaꞌ dxebezraꞌ lauꞌ
laweꞌ da nacaꞌ lau Lueꞌ ca tu benneꞌ dxedaze̱ꞌ, ne quebe de̱ lizre̱ꞌ,
ne nacaꞌ ca tu benneꞌ quebe de̱ xe̱zr la xu chee̱ꞌ
ca gulaca xra xrtawaꞌ caꞌ.
13 Bsan nedaꞌ chee̱ gataꞌ lataj xezíꞌ le dipaꞌ
nédxula ca xexáꞌa xenitiaꞌ.