38
Xranaꞌ Dios, quebe til-luꞌ nedaꞌ lu xel-laꞌ dxezráꞌa chiuꞌ.Quebe gudéuꞌ nedaꞌ da ba xaꞌ lu xel-laꞌ snia chiuꞌ,
2 laweꞌ da belúe xaga nalá xécheꞌze chiuꞌ nedaꞌ,
naꞌ be̱ naꞌu nedaꞌ.
3 Quebe bi chaweꞌ zua be̱laꞌ dxen chiaꞌ laweꞌ da dxezraꞌu nedaꞌ,
ne quebe zaj zua zrita xuꞌa cháwedauꞌ laweꞌ da nunaꞌ dul-la.
4 Ca naca da zrinnaj da nunaꞌ ba zria cháqueze na xíchajaꞌ.
Zaj naca na chiaꞌ ca tu xuaꞌ zíꞌile̱ꞌe̱.
5 We̱ꞌ da zaj zria be̱l-laꞌ dxen chiaꞌ ba dxelelá na,
ne ba dxeluzru na,
da naꞌ dxaca chiaꞌ laweꞌ da be̱naꞌ da cale̱la.
6 Nucache lawaꞌ, ne dxexeduéꞌele̱ꞌe̱daꞌ,
ne dxebezre xachaꞌ te zra chizrela,
7 laweꞌ da ca naca be̱l-laꞌ dxen chiaꞌ dxelá na,
ne quebe bi chaweꞌ zua be̱laꞌ dxen chiaꞌ.
8 Nate niꞌa naꞌa, ne dxéquedaꞌ ba naxúzrujne zrita xuꞌa.
Dxebezre lazraꞌ laweꞌ da zua ste̱be lázrdawaꞌ.
9 Xran, ca naca da dxezá lazraꞌ zaj zua na nen Lueꞌ,
naꞌ da dxebezre lazraꞌ dxeléꞌequeznuꞌ Lueꞌ.
10 Dxate̱ lázrdawaꞌ, ne ba bedú lazraꞌ,
ne québedxa dxeléꞌedaꞌ cháwedauꞌ.
11 Dxelexebiga ljwezraꞌ, ne le saꞌ ljwezraꞌ caꞌ zítuꞌla
ne̱ chee̱ xízrawe̱ꞌ chiaꞌ,
naꞌ benneꞌ walízr chiaꞌ ba belexecuase̱ꞌ zítuꞌla.
12 Benneꞌ caꞌ dxelaca lazre̱ꞌ xelútie̱ꞌ nedaꞌ dxuluzale̱ꞌ xralaj,
naꞌ benneꞌ caꞌ dxelúe lazre̱ꞌ bi gaca chiaꞌ dxelenné̱ꞌ chiaꞌ
wabía xiꞌa, ne tu zaj zúaze̱ꞌ bi xulusaque̱ꞌ nedaꞌ.
13 Nedaꞌ quebe dxendaꞌ ca dxaca chee̱ tu benneꞌ cuezru,
ne nacaꞌ ca tu benneꞌ quebe dxaca nne̱ꞌ,
benneꞌ quebe dxexrá dxuꞌe̱.
14 Nacaꞌ ca tu benneꞌ quebe dxenne̱ꞌ,
bénneaꞌ quebe dxexeche̱be̱ꞌ,
15 laweꞌ da dxebeza lazraꞌ Lueꞌ, Xranaꞌ Dios.
Lueꞌ xeche̱buꞌ waláz chiaꞌ, Xranaꞌ Dios.
16 Gunniaꞌ: Quebe guꞌu lataj xelebene̱ꞌ ne̱ chee̱ da dxaca chiaꞌ.
Gate dxeajchaziaꞌ, quebe guꞌu le̱ꞌ lataj xulucáꞌana szren cuine̱ꞌ
laweꞌ da zuaꞌ lu da baxacheꞌ.
17 Ba zuaꞌ cheajcháziaꞌ,
ne tu dxelázqueze dute̱ be̱l-laꞌ dxen chiaꞌ.
18 Chee̱ le̱ naꞌ xrúale̱pequezaꞌ da cale̱la da be̱naꞌ,
ne xewine lazraꞌ ca naca dul-la da nabagaꞌ.
19 Benneꞌ caꞌ dxeledábague̱ꞌ nedaꞌ zaj zúaqueze̱ꞌ chaweꞌ,
ne zaj naque̱ꞌ benneꞌ wal-la.
Zaj naxánle̱ꞌe̱ benneꞌ caꞌ dxelecuídene̱ꞌ nedaꞌ,
ne quebe bi de̱ da dxagu na zria chiaꞌ lau le̱ꞌ.
20 Benneꞌ caꞌ dxelune̱ꞌ da cale̱la chee̱ benneꞌ caꞌ
dxelune̱ꞌ da xrlátaje
zaj naque̱ꞌ benneꞌ dxeledábague̱ꞌ nedaꞌ laweꞌ da
tu dxúnzquezaꞌ da xrlátaje.
21 Quebe gusanuꞌ nedaꞌ, Xranaꞌ Dios.
Dios chiaꞌ, quebe suꞌ zituꞌ naga zuaꞌ.
22 Be̱n ba xuzre gácale̱nuꞌ nedaꞌ, Xran.
Nacuꞌ Benneꞌ dxuselé̱ꞌ nedaꞌ.