37
Quebe suꞌ ste̱be ne̱ chee̱ da dxelún benneꞌ caꞌdxelune̱ꞌ da cale̱la,
ne quebe se̱ lazruꞌ da zaj nápale̱ꞌe̱ benneꞌ dxelune̱ꞌ da zrinnaj,
2 laweꞌ da xeledé chee̱ benneꞌ caꞌ ca dxaca chee̱ xíxreꞌdu caꞌ,
naꞌ gaca chee̱ benneꞌ caꞌ ca dxaca chee̱ xixreꞌ da nadxugu,
dxebizre na.
3 Bxren lazreꞌ Xránadxu Dios, ne be̱n da xrlátaje,
naꞌ súaquezuꞌ lu xe̱zr la xu, ne síꞌquezuꞌ ba neza da li.
4 Bezaca ba lazreꞌ nen Xránadxu,
naꞌ Le̱ꞌ gúnnaqueze̱ꞌ chiuꞌ da dxezá lazruꞌ.
5 Bzua cuinuꞌ lu naꞌ Xránadxu,
ne bxren lazreꞌ Le̱ꞌ, naꞌ Le̱ꞌ gune̱ꞌ ca da dxenabuꞌ.
6 Guléꞌene̱ꞌ da xrlátaje chiuꞌ ca tu xel-laꞌ naxaníꞌ,
ne da li lazreꞌ chiuꞌ ca laweꞌ zra.
7 Guzúa zrize lau Xránadxu, ne guleza lazre Le̱ꞌ.
Quebe suꞌ ste̱be ne̱ chee̱ benneꞌ dxeziꞌe̱ ba neza,
bénneaꞌ dxúnqueze̱ꞌ da cale̱la.
8 Bsan xel-laꞌ xichaj zraꞌa, ne quebe cuídenuꞌ.
Quebe sa lazruꞌ bi xusacuꞌ benneꞌ caꞌ dxelune̱ꞌ da cale̱la,
9 laweꞌ da guzría xiꞌ Dios benneꞌ caꞌ dxelune̱ꞌ da cale̱la.
Benneꞌ caꞌ dxelebeza lazre̱ꞌ Xránadxu, gaca chee̱ꞌ xe̱zr la xu.
10 Chadite te chee̱ benneꞌ caꞌ dxelune̱ꞌ da cale̱la.
Leꞌenuꞌ lizre lataj benneꞌ caꞌ, san québedxa zaj zre̱ꞌe̱ naꞌ.
11 Benneꞌ dxexruj lazreꞌ caꞌ gaca chee̱ꞌ xe̱zr la xu,
naꞌ xelexezaca ba lazre̱ꞌ lu xel-laꞌ dxebeza zri lazreꞌ zrente̱.
12 Benneꞌ dxelún da cale̱la dxelilaj lazre̱ꞌ bi xelune̱ꞌ
chee̱ benneꞌ xrlátaje,
ne lu xel-laꞌ dxelezráꞌa chee̱ꞌ xelagu lazxa benneꞌ caꞌ.
13 Xránadxu Dios guzrízrequeze̱ꞌ chee̱ benneꞌ caꞌ dxelune̱ꞌ
da cale̱la
laweꞌ da nézene̱ꞌ ba za zra cheajsé̱ chee̱ benneꞌ caꞌ.
14 Benneꞌ dxelune̱ꞌ da zrinnaj dxelebéaje̱ꞌ xia chee̱ꞌ,
ne dxuluzé̱ꞌ xaga nalá xécheꞌze chee̱ꞌ,
chee̱ xuluzría xiꞌe̱ benneꞌ xacheꞌ caꞌ, ne benneꞌ dxelexazrje̱ꞌ,
chee̱ xelútie̱ꞌ benneꞌ caꞌ dxelune̱ꞌ da li lazreꞌ.
15 Xia nalá chee̱ benneꞌ caꞌ chaze na lu lazrdáuqueze̱ꞌ,
naꞌ gáchajqueze xaga nalá xécheꞌze chee̱ꞌ.
16 Cháwedxa naca da du da de̱ chee̱ benneꞌ xrlátaje
ca da gunníꞌa da zaj napa zánete̱ benneꞌ dul-la caꞌ,
17 laweꞌ da welátequeze niꞌa naꞌ benneꞌ dxelúne̱ꞌ da zrinnaj.
Xránadxu náꞌqueze dxuxúe̱ꞌ benneꞌ xrlátaje caꞌ.
18 Nunbea Xránadxu ca zaj naca zra xelezúa benneꞌ
du lazreꞌ caꞌ,
naꞌ da zaj napa benneꞌ caꞌ xelezúa na chadía chacanna.
19 Quebe xelexeduéꞌene̱ꞌ gate quebe dxaca chaweꞌ chee̱
bénneache,
naꞌ lu zra chee̱ gubinaꞌ gataꞌ da xelawe̱ꞌ.
20 Xelebía xiꞌ benneꞌ dxelúne̱ꞌ da zrinnaj,
naꞌ benneꞌ caꞌ dxeledábagaꞌ Xránadxu,
ca dxaca chee̱ xiaj xixreꞌ caꞌ.
Xeledé chee̱ꞌ, ne xelexenitie̱ꞌ ca zren chee̱ xiꞌ.
21 Benneꞌ caꞌ dxelún da cale̱la tu da dxelenabe̱ꞌ tu chíꞌidauze,
ne quebe dxuluxunézruje̱ꞌ na,
naꞌ benneꞌ xrlátaje dxexache lazre̱ꞌ le̱ꞌ, ne dxunézruje̱ꞌ chee̱ꞌ.
22 Benneꞌ caꞌ dxeléꞌe Xránadxu le̱ꞌ chaweꞌ, gaca chee̱
benneꞌ caꞌ xe̱zr la xu,
naꞌ benneꞌ caꞌ quebe dxeléꞌene̱ꞌ chaweꞌ, xelebía xíꞌqueze̱ꞌ.
23 Da dxelún benneꞌ xrlátaje caꞌ zaj naca na da bleꞌe
Xránadxu le̱ꞌ, naꞌ dxeléꞌene̱ꞌ cháwedauꞌ ca da dxelune̱ꞌ.
24 Gate dxeleajchaze benneꞌ xrlátaje caꞌ quebe cheajlechaze̱ꞌ
tu chiꞌize laweꞌ da nuxru Xránadxu naꞌ benneꞌ caꞌ.
25 Benneꞌ cuideꞌ gucaꞌ, ne naꞌa ba gúxruaꞌ,
ne cabataꞌ bleꞌedaꞌ tu benneꞌ xrlátaje gusán Dios le̱ꞌ,
naꞌ quebe xeledá zriꞌine zre sue̱ꞌ xelebéaje̱ꞌ gunaꞌ.
26 Benneꞌ xrlátaje nigá tu dxexache lázrezqueze̱ꞌ,
ne dxunézruje̱ꞌ bi dxexazrje nu benneꞌ,
naꞌ zriꞌine zre sue̱ꞌ zaj naque̱ꞌ da ba neza chee̱ bénneache.
27 Québedxa gunuꞌ da cale̱la, san be̱n da xrlátaje,
naꞌ gaca bánquezuꞌ chadía chacanna,
28 laweꞌ da nazríꞌi Xránadxu da naca li lazreꞌ,
ne quebe dxusane̱ꞌ benneꞌ zaj de̱ꞌe̱ Le̱ꞌ.
Chadía chacanna tu guxúezqueze̱ꞌ benneꞌ caꞌ,
san guzría xiꞌe̱ xrtia ljwezre benneꞌ caꞌ dxelune̱ꞌ da cale̱la.
29 Benneꞌ xrlátaje caꞌ gaca chee̱ꞌ xe̱zr la xu nigá,
naꞌ xelezráꞌqueze̱ꞌ chadía chacanna lu xe̱zr la xu.
30 Benneꞌ xrlátaje dxuchálajqueze̱ꞌ da naca sina,
naꞌ ca dxuchiꞌe̱ naca na xrlátaje.
31 Da nadxixruj bea Dios tu xúꞌuzqueze na xichaj lázrdawe̱ꞌ.
Chee̱ le̱ naꞌ quebe cheajchaze bénneaꞌ.
32 Benneꞌ we̱n da zrinnaj dxenné̱ꞌe̱ benneꞌ xrlátaje,
ne dxune̱ꞌ ba xuzre gutie̱ꞌ le̱ꞌ.
33 Quebe gusán Xránadxu le̱ꞌ lu naꞌ benneꞌ we̱n da cale̱la naꞌ,
ne quebe guzría xiꞌe̱ le̱ꞌ gate dxuchiꞌe̱ chee̱ꞌ.
34 Guleza lazreꞌ Xránadxu, ne be̱n ca da ba gunné̱ꞌ,
naꞌ Le̱ꞌ chísaqueze̱ꞌ Lueꞌ chee̱ gaca chiuꞌ xe̱zr la xu nigá.
Gate xelebía xiꞌ benneꞌ dul-la caꞌ, naꞌ léꞌenuꞌ na.
35 Bleꞌedaꞌ tu benneꞌ we̱n da zrinnaj, nagáꞌane̱ꞌ szrente̱,
naꞌ guxánle̱ꞌe̱ da de̱ chee̱ꞌ ca dxegula tu xaga zrente̱.
36 Naꞌ gudé chee̱ꞌ, naꞌ québedxa zue̱ꞌ naꞌa.
Bexílajaꞌ le̱ꞌ, san quebe nu bezreldaꞌ.
37 Blaba lazreꞌ ca naca chee̱ benneꞌ li lazreꞌ,
ne gunnáꞌ benneꞌ xrlátaje
laweꞌ da naga cheajsé̱ gaca tu da ba neza chee̱ benneꞌ
dxebeze̱ꞌ zri lazreꞌ.
38 Benneꞌ dxelune̱ꞌ da cale̱la xelebía xíꞌqueze̱ꞌ.
Quebe nu chaꞌ xrtia ljwezre benneꞌ dxelune̱ꞌ da zrinnaj.
39 Xránadxu Dios guseláquezé̱ꞌ benneꞌ xrlátaje caꞌ,
naꞌ Le̱ꞌ gutipe̱ꞌ lazreꞌ benneꞌ caꞌ lu zra chee̱ da ste̱be.
40 Xránadxu Dios gácale̱ne̱ꞌ le̱ꞌ, ne guselé̱ꞌ le̱ꞌ.
Guselé̱ꞌ le̱ꞌ lu naꞌ benneꞌ caꞌ dxelune̱ꞌ da cale̱la,
naꞌ gune̱ꞌ gaca chaweꞌ chee̱ꞌ laweꞌ da buluxrén lazre̱ꞌ Le̱ꞌ.