36
Da zrinnaj da dxun benneꞌ dxuzúa chaláꞌala Diosdxuchálajle̱ na le̱ꞌ lu xichaj lázrdawe̱ꞌ.
Quebe dxezá lázrequeze̱ꞌ gape̱ꞌ Dios ba láꞌana.
2 Chee̱ le̱ naꞌ dxuléꞌe cuine̱ꞌ ca tu benneꞌ zrente̱.
Dxéquene̱ꞌ quebe dxeléꞌe Dios da zrinnaj da dxune̱ꞌ,
ne quebe dxecuide Dios le̱ꞌ.
3 Da tu dxuchálajzqueze̱ꞌ naca na da zrinnaj, ne da we̱n lazreꞌ.
Québedxa dxéajniꞌine̱ꞌ, ne québedxa dxune̱ꞌ da xrlátaje.
4 Dxulaba lazre̱ꞌ ca naca da cale̱la gune̱ꞌ gate de̱ꞌ naga dxateꞌ.
Xuꞌe̱ neza da quebe naca neza chaweꞌ.
Quebe dxecuídene̱ꞌ da cale̱la.
5 Xranaꞌ Dios, zrente̱ naca xel-laꞌ dxexache lazreꞌ chiuꞌ
da dxezrinte̱ na xabáa,
naꞌ dxezrinte̱ lu beuj xel-laꞌ li lazreꞌ chiuꞌ.
6 Da xrlátaje chiuꞌ naca na ca tu xiꞌa zren chiuꞌ,
naꞌ ca dxuchiꞌu naca na ca tu nísadauꞌ sítujte̱.
Xranaꞌ Dios, tu dxuxúezquezuꞌ bénneache, ne be̱ xixreꞌ caꞌ.
7 Xrdante̱ naca xel-laꞌ dxexache lazreꞌ chiuꞌ, Dios.
Chee̱ le̱ naꞌ dxuluxrén lazreꞌ bénneache Lueꞌ ca dxelún
bedxuj dxéꞌenedu caꞌ dxelexezrabaꞌ zran xrila bedxuj.
8 Welélajquezne̱ꞌ chee̱ da de̱le̱ꞌe̱ lizruꞌ,
naꞌ Lueꞌ gunézrujuꞌ xeléꞌaje̱ꞌ da naca ca tu xe̱gu da
naca na da dxezaca ba lazruꞌ Lueꞌ.
9 Naga zuꞌ Lueꞌ zua beaj naga dxalaj nisa da dxunna na
xel-laꞌ nabán.
Lu xel-laꞌ naxaníꞌ chiuꞌ waléꞌentuꞌ da naca leníꞌ.
10 Bexache lazreꞌ benneꞌ caꞌ zaj núnbeꞌe̱ Lueꞌ,
ne bzua chee̱ benneꞌ li lazreꞌ caꞌ da xrlátaje chiuꞌ.
11 Quebe guꞌu lataj tábaga benneꞌ dxucáꞌana szren cuina nedaꞌ,
ne quebe gutá benneꞌ dxun da cale̱la nedaꞌ.
12 Xeajlechaze benneꞌ caꞌ dxelune̱ꞌ da zrinnaj.
Lueꞌ be̱nuꞌ xeajlechaze benneꞌ caꞌ, naꞌ quebe gaca xelexase̱ꞌ.