35
Xran, bsizre benneꞌ caꞌ dxelenné̱ꞌ chiaꞌ.Gudíl-lale̱ benneꞌ caꞌ dxeledíl-lale̱ne̱ꞌ nedaꞌ.
2 Gudá gucuꞌujuꞌ nedaꞌ lu wedil-la,
ne gúcale̱ nedaꞌ.
3 Gude̱l-la xia chee̱ wedil-la chee̱ guzaguꞌ benneꞌ caꞌ
dxululague̱ꞌ nedaꞌ.
Guzre nedaꞌ nacuꞌ Benneꞌ dxuselé̱ꞌ nedaꞌ.
4 Be̱n xelexeduéꞌe, ne xeleque zréaje benneꞌ caꞌ
dxelaca lazre̱ꞌ xelútie̱ꞌ nedaꞌ.
Be̱n xuluzrunnuj, ne xelexeduéꞌe benneꞌ caꞌ dxelaca lazre̱ꞌ
xelune̱ꞌ chiaꞌ da cale̱la.
5 Be̱n xelaque̱ꞌ ca tu xizre be̱be da dxua beꞌ,
ne gusel-la gubáz chee̱ xabáa chiuꞌ chee̱ gulague̱ꞌ benneꞌ caꞌ.
6 Be̱n chul-la neza naga xeledée̱ꞌ, naꞌ gaca na naga xelebile̱ꞌ,
ne gusel-la gubáz chee̱ xabáa chiuꞌ chee̱ gulague̱ꞌ benneꞌ caꞌ.
7 Bulucache̱ꞌ tu xralaj chee̱ que̱la na nedaꞌ,
ne quegá bi nunaꞌ chee̱ꞌ.
Gule̱ne̱ꞌ tu xe̱dxu naga cheajcháziaꞌ nedaꞌ,
ne quegá bi de̱ da dxagu na zria chiaꞌ.
8 Gusel-la da guzría xi na benneꞌ caꞌ, ne quebe xeleque beꞌene̱ꞌ.
Be̱n que̱la xralaj chee̱ꞌ naꞌ lé̱queze̱ꞌ,
ne cheajlecházie̱ꞌ naga xelebía xiꞌe̱.
9 Nadxa béle̱ꞌe̱quezdaꞌ ca naca da nun Xránadxu Dios.
Suaꞌ lu da ba neza laweꞌ da bselé̱ꞌ nedaꞌ.
10 Xúgute̱ zrita xuꞌa xelenná na: Xran, ¿núzraqueze naca
ca nacuꞌ Lueꞌ?
Dxuseláuꞌ benneꞌ xacheꞌ lu naꞌ benneꞌ wál-ladxa ca le̱ꞌ,
ne benneꞌ dxexazrje lu naꞌ benneꞌ dxebane̱ꞌ da du de̱ chee̱ꞌ.
11 Belasa benneꞌ dxelexeche̱be̱ꞌ da we̱n lazreꞌ.
Gulawe̱ꞌ zria nedaꞌ chee̱ tu da quebe dxaca beꞌedaꞌ.
12 Belexebiꞌe̱ nedaꞌ da cale̱la chee̱ tu da xrlátaje da be̱naꞌ,
chee̱ xuluzúe̱ꞌ nedaꞌ lu da ba xaꞌ.
13 Nedaꞌ, gate quebe chaweꞌ gulezúe̱ꞌ, bewiꞌine lazraꞌ.
Be̱naꞌ gubasa da bsaca zi na nedaꞌ,
ne du lazraꞌ bláwizraꞌ Dios chee̱ xexune̱ꞌ benneꞌ caꞌ.
14 Bewiꞌine lazraꞌ chee̱ benneꞌ caꞌ ca dxunaꞌ chee̱
le saꞌ ljwezraꞌ, u chee̱ bi bíchequezaꞌ.
Guzúaꞌ lu da baxacheꞌ ca dxun benneꞌ chee̱ xrne̱ꞌe̱ gate dxatie̱ꞌ.
15 Gulebé benneꞌ caꞌ gate zuaꞌ lu da ba xaꞌ, ne belezrague̱ꞌ.
Belezraga benneꞌ dxeledábague̱ꞌ nedaꞌ,
benneꞌ we̱n da cale̱la, naꞌ chadite̱ gule̱l-le̱ꞌ nedaꞌ.
Tu belúezqueze̱ꞌ nedaꞌ, ne quebe gulezúa zrie̱ꞌ.
16 Bulusaca ziꞌe̱ nedaꞌ, ne belún le̱ꞌ chiaꞌ,
ne gulagu lazxe̱ꞌ lu xel-laꞌ dxelezráꞌa chee̱ꞌ nedaꞌ.
17 Xran, ¿ájate̱ schaꞌ guꞌu latja da dxelune̱ꞌ?
Bselá nedaꞌ lu naꞌ benneꞌ caní dxuluzría xiꞌe̱ nedaꞌ,
benneꞌ zaj naque̱ꞌ ca be̱zre xixreꞌ caꞌ.
18 Xapaꞌ Lueꞌ: Xcalenuꞌ, láwela benneꞌ zan caꞌ zaj
nadupe̱ꞌ chiuꞌ Lueꞌ.
Tu güe láꞌanazquezaꞌ Lueꞌ ládujla benneꞌ zan caꞌ.
19 Quebe guꞌu lataj xelebé benneꞌ caꞌ dxeledábague̱ꞌ nedaꞌ,
ne quebe bi nunaꞌ chee̱ꞌ.
Quebe guꞌu lataj xelún la benneꞌ caꞌ chiaꞌ,
benneꞌ dxelecuídene̱ꞌ nedaꞌ,
ne quebe bi de̱ da dxagu na zria chiaꞌ.
20 Benneꞌ caní quebe dxelaca lazre̱ꞌ xelezúe̱ꞌ lu
xel-laꞌ dxebeza zri lazreꞌ,
naꞌ lu xel-laꞌ dxelezí xe̱ chee̱ꞌ dxelenné̱ꞌ chee̱ benneꞌ caꞌ
dxelebeza zri lazre̱ꞌ lu xe̱zr la xu nigá.
21 Belún le̱ꞌ chiaꞌ.
Gulenné̱ꞌ: “¡E! ¡E! ¡Ba bléꞌentuꞌ da nune̱ꞌ!”
22 ¡Xran, ba bléꞌequeznuꞌ da dxelune̱ꞌ!
¡Quebe sua zriuꞌ!
¡Xran, quebe gusanuꞌ nedaꞌ!
23 ¡Guxasa, guzúa guchiꞌu chiaꞌ!
¡Gudá, Xranaꞌ Dios, chee̱ gácale̱nuꞌ nedaꞌ!
24 ¡Bchiꞌa chiaꞌ lu da xrlátaje chiuꞌ, Xranaꞌ Dios!
¡Quebe guꞌu benneꞌ caꞌ lataj xuluzrizre̱ꞌ chiaꞌ!
25 ¡Quebe guꞌu lataj xelenné̱ꞌ: “Ba guca da dxezá lázredxu!”
¡Quebe xelenné̱ꞌ: “Ba bendxu chie̱ꞌ!”
26 Be̱n xelexeduéꞌe, ne xeleque zréaje xúgute̱ benneꞌ caꞌ
dxelebene̱ꞌ gate bi dxaca chiaꞌ.
Bsiꞌe̱ xel-laꞌ stuꞌ, ne be̱n xelaca xala benneꞌ caꞌ
dxeledábague̱ꞌ nedaꞌ.
27 Be̱n xelúl-la, ne xelebé benneꞌ caꞌ zaj de̱ꞌe̱ nedaꞌ,
chee̱ xelennáqueze̱ꞌ: “Tu xegáꞌana szrénzqueze Xránadxu,
Bénneaꞌ dxezá lazre̱ꞌ sua lu xel-laꞌ dxebeza zri lazreꞌ
benneꞌ we̱n zrin chee̱ꞌ!”
28 Tu guchálajzquezaꞌ chee̱ da xrlátaje chiuꞌ,
ne chee̱ da dxue láꞌanaqueze na Lueꞌ te zra chizrela.