34
Tu güe láꞌanazquezaꞌ Xránadxu Dios te zra chizrela.Tu gúl-lazquezaꞌ da güe láꞌana na Le̱ꞌ.
2 Xezaca ba lázrele̱naꞌ Xránadxu Dios.
Xelén benneꞌ dxexruj lazreꞌ da caní, naꞌ welebéle̱ꞌe̱ne̱ꞌ.
3 Le gucáꞌana szren Xránadxu Dios tu zren nen nedaꞌ,
naꞌ tu zren gucáꞌana szrendxu La láꞌazxa chie̱ꞌ.
4 Bláwizraꞌ Xránadxu Dios, naꞌ Le̱ꞌ benne̱ꞌ chiaꞌ,
ne bselé̱ꞌ nedaꞌ lu xúgute̱ da buluchebe na nedaꞌ.
5 Benneꞌ caꞌ gulebeza lazre̱ꞌ Le̱ꞌ beleléꞌene̱ꞌ da xabáa chee̱ꞌ,
ne quebe belexeduéꞌene̱ꞌ.
6 Nedaꞌ, benneꞌ xacheꞌ, bláwizraꞌ,
naꞌ ben Xránadxu Dios chiaꞌ,
ne bselé̱ꞌ nedaꞌ lu xúgute̱ da dxezaca ziꞌa.
7 Gubáz chee̱ Xránadxu zue̱ꞌ cuita benneꞌ caꞌ dxelezrebe̱ꞌ Le̱ꞌ,
naꞌ dxucuꞌuje̱ꞌ benneꞌ caꞌ.
8 Le guxúe xque, naꞌ léꞌele naca xrlátaje Xránadxu Dios.
Ba neza zrente̱ naca na chee̱ bénneaꞌ dxuxrén lazre̱ꞌ Le̱ꞌ.
9 Le zrebe Xránadxu Dios, leꞌe, nácale benneꞌ chee̱ Lé̱queze̱ꞌ,
laweꞌ da quee bi dxelexazrje benneꞌ caꞌ dxelezrebe̱ꞌ Le̱ꞌ.
10 Be̱zre xíxreꞌdu caꞌ dxelexázrjebaꞌ, ne dxeledunbaꞌ.
Benneꞌ caꞌ dxelebeza lazre̱ꞌ Xránadxu Dios
quebe bi da chaweꞌ xelexázrjene̱ꞌ.
11 Le da, bidauꞌ, ne le xen chiaꞌ.
Gusé̱dedaꞌ leꞌe chee̱ zrébele Xránadxu Dios.
12 ¿Nu benneꞌ ládujla leꞌe dxaca lazre̱ꞌ xegáꞌane̱ꞌ
lu xel-laꞌ nabán,
bénneaꞌ dxaca lazre̱ꞌ sue̱ꞌ zaneꞌ iza chee̱ léꞌene̱ꞌ da chaweꞌ?
13 Bxue xanneꞌ ca dxuchálajuꞌ chee̱ quebe nneuꞌ da cale̱la,
ne chee̱ quebe guchálajuꞌ da we̱n lazreꞌ.
14 Bsan da cale̱la da dxunuꞌ, naꞌ be̱n da xrlátaje.
Be̱n ba xuzre gapuꞌ xel-laꞌ dxebeza zri lazreꞌ,
ne be̱n ca naca chee̱ na.
15 Dxuxúe Xránadxu Dios benneꞌ caꞌ zaj naque̱ꞌ xrlátaje,
ne dxuzé̱ nague̱ꞌ da dxululáwizre̱ꞌ Le̱ꞌ.
16 Dxezráꞌa Xránadxu Dios benneꞌ caꞌ dxelune̱ꞌ da cale̱la,
chee̱ quebe sua nu benneꞌ chajsá lazre̱ꞌ
benneꞌ we̱n da cale̱la caꞌ.
17 Benneꞌ xrlátaje caꞌ dxululáwizre̱ꞌ Xránadxu Dios,
naꞌ Le̱ꞌ dxenne̱ꞌ chee̱ꞌ,
ne dxuselé̱ꞌ benneꞌ caꞌ lu xúgute̱ da dxelezaca ziꞌe̱.
18 Gágute̱ zua Xránadxu Dios naga zaj zraꞌ benneꞌ caꞌ
dxelexewiꞌine lazre̱ꞌ,
ne dxuselé̱ꞌ benneꞌ caꞌ dxelexewiꞌine lazre̱ꞌ.
19 Da zante̱ da dxezaca ziꞌ benneꞌ xrlátaje.
Dxuselá Xránadxu Dios bénneaꞌ lu xúgute̱ da caꞌ.
20 Le̱ꞌ dxuxúequeze̱ꞌ xúgute̱ zrita xuꞌe̱,
naꞌ netú zrita chee̱ꞌ quebe gachaj na.
21 Dul-la da dxun benneꞌ we̱n da cale̱la gute na le̱ꞌ,
naꞌ xelebía xiꞌ benneꞌ caꞌ dxelecuídene̱ꞌ benneꞌ xrlátaje.
22 Xránadxu Dios dxexáꞌawe̱ꞌ bénneꞌdu xuꞌu
benneꞌ we̱n zrin chee̱ꞌ caꞌ,
naꞌ xúgute̱ benneꞌ caꞌ dxuluxrén lazre̱ꞌ Le̱ꞌ
québequeze xelebía xiꞌe̱.