33
Le be leꞌe, benneꞌ xrlátaje, lau Xránadxu Dios.Xrtante̱ naca lau Dios da dxelúe láꞌana benneꞌ xrlátaje caꞌ Le̱ꞌ.
2 Le gucáꞌana szren Dios nen da zríadiꞌi na du da dxínnele.
Le gúl-laqueze chee̱ꞌ nen da dxúl-lale̱nle,
ne nen tu da nua na chi du.
3 Le gul-la chee̱ Le̱ꞌ tu da cube.
Le gul-la cháwedauꞌ, quínnele dute̱ xel-laꞌ dxebé.
4 Li lazreꞌ naca xrtizraꞌ Xránadxu Dios,
naꞌ nune̱ꞌ dute̱ lu xel-laꞌ li lazreꞌ chee̱ꞌ.
5 Le̱ꞌ nazríꞌine̱ꞌ da naca xrlátaje, ne da naca du lazreꞌ.
Zaj núnbea bénneache xel-laꞌ dxexache lazreꞌ chee̱ Xránadxu
du gabíꞌi xe̱zr la xu.
6 Ne̱ chee̱ xrtizraꞌ Xránadxu Dios, be̱ne̱ꞌ xabáa,
naꞌ xúgute̱ belaj da zaj naláꞌ zran xabáa be̱ne̱ꞌ
nen beꞌ dxedxuaj dxuꞌe̱.
7 Le̱ꞌ dxuxutube̱ꞌ nísadauꞌ, ne dxexune̱ꞌ na ca tu xiꞌa nisa.
Dxegáꞌa chawe̱ꞌ nisa lu da situj caꞌ naga nucueze̱ꞌ chee̱ na.
8 Le zrebe Xránadxu Dios, xúgute̱le zrale xe̱zr la xu nigá.
Le zrebe lau Le̱ꞌ, xúgute̱le leꞌe zrale lu xe̱zr la xu
9 laweꞌ da gunne̱ze̱ꞌ, naꞌ guca xe̱zr la xu.
Gunná beꞌene̱ꞌ na, naꞌ zúaqueze na.
10 Xránadxu Dios dxune̱ꞌ dxexaca dácheze dizraꞌ zaj nun
bénneache xe̱zr la xu caꞌ,
ne dxune̱ꞌ dxelaca níteze da caꞌ zaj nune̱ꞌ xelune̱ꞌ.
11 Dizraꞌ ba nun Xránadxu Dios tu súazqueze
na chadía chacanna.
Da dxegúꞌu beꞌe̱ lu lázrdawe̱ꞌ tu wadíazqueze na
lau xúgute̱ bénneache.
12 Ba neza zrente̱ naca na chee̱ benneꞌ xe̱zr la xu caꞌ
Xránadxu naque̱ꞌ Dios chee̱ le̱ꞌ,
benneꞌ xe̱zr la xu caꞌ gucáꞌa Dios chee̱ xelaque̱ꞌ benneꞌ chee̱ꞌ.
13 Naga zue̱ꞌ xabáa chee̱ꞌ dxennáꞌ Xránadxu Dios,
naꞌ dxeléꞌene̱ꞌ xúgute̱ cuen bénneache.
14 Naga zue̱ꞌ lataj láꞌazxa chee̱ꞌ dxenné̱ꞌe̱,
naꞌ dxeléꞌene̱ꞌ ca zaj zraꞌ bénneache lu xe̱zr la xu.
15 Le̱ꞌ be̱ne̱ꞌ xichaj lázxdau xúgute̱ benneꞌ caꞌ,
naꞌ dxenné̱ꞌe̱ xúgute̱ da dxelune̱ꞌ.
16 Quebe la benneꞌ wenná bea ne̱ chee̱ benneꞌ
dxjaque̱ꞌ wedil-la zante̱ chee̱ꞌ,
ne quebe la benneꞌ wal-la ne̱ chee̱ xel-laꞌ wal-la da nape̱ꞌ.
17 Quebe nu benneꞌ le̱ꞌ ne̱ chee̱ bzrinaꞌ,
ne quebe nu la ne̱ chee̱ xel-laꞌ wal-la zren chee̱ꞌ.
18 Le naꞌ xque, dxuxúe Xránadxu Dios benneꞌ caꞌ dxelezrebe̱ꞌ Le̱ꞌ.
Dxuxúe̱ꞌ benneꞌ caꞌ dxelebeza lazre̱ꞌ Le̱ꞌ xexache lazre̱ꞌ le̱ꞌ
19 chee̱ guselé̱ꞌ le̱ꞌ lu xel-laꞌ gute,
ne chee̱ gugawe̱ꞌ le̱ꞌ gate dxaca gubinaꞌ.
20 Dxebeza lázredxu Xránadxu Dios.
Le̱ꞌ naque̱ꞌ Bénneaꞌ dxácale̱ne̱ꞌ dxiꞌu, ne dxucuꞌuje̱ꞌ dxiꞌu.
21 Chee̱ le̱ naꞌ du lázredxu béle̱ꞌe̱quezdxu lau Le̱ꞌ,
laweꞌ da tu dxuxrén lázrezquezdxu La láꞌazxa chee̱ꞌ.
22 Bexache lazreꞌ netuꞌ, Xránantuꞌ,
laweꞌ da dxebeza lázrentuꞌ Lueꞌ.