32
¡Ba neza zrente̱ naca na chee̱ bénneaꞌDios ba bnite lawe̱ꞌ dul-la da gubágue̱ꞌ,
ne ba gudúe̱ꞌ zria da guzúa chee̱ꞌ!
2 ¡Ba neza zrente̱ naca na chee̱ bénneaꞌ
Dios quebe dxusebague̱ꞌ le̱ꞌ zria,
bénneaꞌ quebe dxezí xe̱ꞌe̱!
3 Gate quebe guxrúale̱paꞌ dul-la gubagaꞌ,
bedú lazraꞌ laweꞌ da gudxezraꞌ bedú zra.
4 Te zra ne chizrela bdeuꞌ nedaꞌ xel-laꞌ ziꞌ, Xran.
Bedú lazraꞌ ca dxebizre beaj nisa beuꞌ la.
5 Nadxa guxrúale̱paꞌ dul-la gubagaꞌ,
ne quebe bcachaꞌ zria da guzúa chiaꞌ.
Bechugu lazraꞌ guxrúale̱paꞌ na lau Lueꞌ, Xran,
naꞌ Lueꞌ bnite lauꞌ chee̱ dul-la gubagaꞌ.
6 Xúgute̱ bénneache chiuꞌ dxal-laꞌ xuluchálajle̱ne̱ꞌ Lueꞌ
gate de̱ lataj xelexezrelne̱ꞌ Lueꞌ, naꞌ gate zrin da ziꞌ da xaꞌ
da xelezaque̱ꞌ,
da gaca na ca tu xe̱gu nisa zren da dxedxuaj na,
naꞌ quebe bi gune na benneꞌ caꞌ.
7 Lueꞌ nacuꞌ ca tu lataj naga gaca gucache cuinaꞌ,
naꞌ gucache chawuꞌ nedaꞌ chee̱ quebe bi da sacaꞌ.
Tu gul-lazquezaꞌ zizraj ca bseláuꞌ nedaꞌ laweꞌ da dxuxúꞌ nedaꞌ.
8 Dxenná Xránadxu: “Guléꞌedaꞌ lueꞌ neza naga dxal-laꞌ tauꞌ.
Gusé̱dedaꞌ lueꞌ, ne guzéajniꞌidaꞌ lueꞌ ca dxal-laꞌ gunuꞌ.
9 Quebe gacuꞌ ca tu bzrinaꞌ u tu bea, be̱ quebe bi dxeléajniꞌibaꞌ,
bea caꞌ dxun na ba xen nna beꞌenuꞌ-baꞌ, naꞌ cuꞌu xia dxúꞌabaꞌ,
chee̱ gunuꞌ xelunbaꞌ ca dxaca lazruꞌ.”
10 Benneꞌ we̱n da cale̱la caꞌ dxun na ba xen
xeledée̱ꞌ lu da ziꞌ da xaꞌ.
Benneꞌ caꞌ dxuluxrén lazre̱ꞌ Xránadxu,
tu dxuxúezqueze̱ꞌ le̱ꞌ nen dute̱ xel-laꞌ zriꞌi lazreꞌ chee̱ꞌ.
11 Leꞌe, benneꞌ xrlátaje, le be, ne le sua lu da ba neza,
ne̱ chee̱ da be̱n Xránadxu, gúcale̱ne̱ꞌ leꞌe.
Nen dute̱ xel-laꞌ dxebé le gul-la, leꞌe, nácale li lazreꞌ lau Le̱ꞌ.