31
Dxuxrén lazraꞌ Lueꞌ, Xranaꞌ Dios.Quebe guꞌu lataj xeduéꞌedaꞌ.
Lu da xrlátaje chiuꞌ bselá nedaꞌ.
2 Bze̱ naga chiꞌa, ne bselá nedaꞌ.
Bze̱ chuchu nedaꞌ, ne bucúꞌuj nedaꞌ chee̱ laꞌ.
3 Nacuꞌ Benneꞌ dxuzé̱ chuchuꞌ nedaꞌ, ne dxucúꞌujuꞌ nedaꞌ.
laweꞌ da nacuꞌ li lazreꞌ guléꞌenuꞌ nedaꞌ neza,
ne gusiꞌu nedaꞌ neza naꞌ.
4 Bebéaj nedaꞌ lu xralaj da ba zaj nucueze̱ꞌ, chee̱ xele̱l-le̱ꞌ nedaꞌ.
Lueꞌ nacuꞌ Benneꞌ dxuxúe̱ꞌ nedaꞌ.
5 Lu naꞌu dxuzúaꞌ bénneꞌdu xuꞌa, Xran.
Lueꞌ bexáꞌawenuꞌ nedaꞌ, Dios li lazreꞌ.
6 Dxecuídedaꞌ benneꞌ caꞌ dxelebeza lazre̱ꞌ dios caꞌ
quebe bi zaj zaca.
Nedaꞌ dxebeza lazraꞌ Xranaꞌ Dios.
7 Béle̱ꞌe̱daꞌ, ne suaꞌ lu da ba neza laweꞌ da dxexache lazruꞌ nedaꞌ.
Caní dxunuꞌ laweꞌ da dxeléꞌequeznuꞌ ca da dxezaca ziꞌa.
Nézenuꞌ ca dxedéaꞌ lu da ba xaꞌ.
8 Quebe bdeuꞌ nedaꞌ lu naꞌ benneꞌ caꞌ dxeledábague̱ꞌ nedaꞌ.
Bze̱ chuchuꞌ nedaꞌ tu lataj chaweꞌ.
9 Bexache lazreꞌ nedaꞌ, Xranaꞌ Dios, laweꞌ da zuaꞌ lu da ba xaꞌ.
Ba bebizre nisa xuzru xiaj lawaꞌ laweꞌ da dxewíꞌine lazraꞌ
dute̱ bénneꞌdu xuꞌa, ne dute̱ be̱laꞌ dxen chiaꞌ
10 laweꞌ da dxedé xel-laꞌ nabán chiaꞌ lu da ba xaꞌ,
ne dxedéaꞌ iza chiaꞌ caꞌ dxebezre lazraꞌ.
Dxedú lazraꞌ laweꞌ da nabagaꞌ zria, naꞌ dxelelá zrita xuꞌa.
11 Xúgute̱ benneꞌ caꞌ dxeledábague̱ꞌ nedaꞌ dxelecuídene̱ꞌ nedaꞌ,
naꞌ benneꞌ walízr chiaꞌ dxuluzúe̱ꞌ nedaꞌ cheláꞌala,
naꞌ benneꞌ zaj núnbeꞌe̱ nedaꞌ dxelecuase̱ꞌ nedaꞌ.
Benneꞌ caꞌ dxeleléꞌene̱ꞌ nedaꞌ la neza dxuluzrúnnuje̱ꞌ naga zuaꞌ.
12 Benneꞌ caní ba gulal-la lazre̱ꞌ nedaꞌ ca dxelal-la lazre̱ꞌ
tu benneꞌ gate.
Nacaꞌ nedaꞌ ca tu xéꞌena xu da naláꞌa.
13 Dxendaꞌ dizraꞌ schanniꞌ da dxelenná benneꞌ zante̱ chiaꞌ,
naꞌ gátete̱ze zua da dxuchebe na nedaꞌ.
Dxácate̱ naꞌ dxelune̱ꞌ tuze dizraꞌ bi xelune̱ꞌ chiaꞌ,
ne zaj nune̱ꞌ xelútie̱ꞌ nedaꞌ.
14 Nedaꞌ dxuxrén lazraꞌ Lueꞌ, Xran.
Dxenníaꞌ nacuꞌ Lueꞌ Dios chiaꞌ.
15 Lu naꞌu Lueꞌ zaj xuꞌu zra chiaꞌ caꞌ.
Bselá nedaꞌ lu naꞌ benneꞌ caꞌ dxeledábague̱ꞌ nedaꞌ,
ne lu naꞌ benneꞌ caꞌ zaj nau ziꞌ xuzre̱ꞌ nedaꞌ.
16 Lu xel-laꞌ szren chiuꞌ bxue nedaꞌ, we̱n zrin chiuꞌ.
Lu xel-laꞌ dxexache lazreꞌ chiuꞌ bselá nedaꞌ.
17 Quebe guꞌu lataj xeduéꞌedaꞌ, Xran, laweꞌ da dxuláwizraꞌ Lueꞌ.
Be̱n xelexeduéꞌe benneꞌ caꞌ dxelebéaj xíchaje̱ꞌ Lueꞌ.
Be̱n xelezúa zrie̱ꞌ lu lataj ba xaꞌ.
18 Be̱n quebe gaca xelenné̱ benneꞌ caꞌ dxelezí xe̱ꞌe̱,
benneꞌ caꞌ dxelenné̱ꞌ da cale̱la chee̱ benneꞌ xrlátaje caꞌ,
da dxelenné̱ꞌ lu xel-laꞌ dxulucáꞌana szren cuina,
ne lu xel-laꞌ dxulucáꞌana ditaj benneꞌ caní.
19 Da zrente̱ naca xel-laꞌ zriꞌi lazreꞌ chiuꞌ da napuꞌ
chee̱ bi gunuꞌ chee̱ benneꞌ caꞌ dxelape̱ꞌ Lueꞌ ba láꞌana,
da naꞌ dxunuꞌ lau xúgute̱ bénneache
ne̱ chee̱ benneꞌ caꞌ dxelebeza lazre̱ꞌ Lueꞌ.
20 Lu da bagácheze naga zuꞌ Lueꞌ dxucachuꞌ benneꞌ caꞌ
chee̱ quebe bi xelún bénneache chee̱ꞌ.
Dxuzúꞌ benneꞌ caꞌ tu lu xuꞌu nagache
chee̱ quebe bi gun chee̱ꞌ xel-laꞌ wetil-la dizraꞌ chee̱ bénneache.
21 ¡Gaca ba Xránadxu Dios!
Lu xel-laꞌ dxexache lazreꞌ chee̱ꞌ be̱ne̱ꞌ da zrente̱
chee̱ gúcale̱ne̱ꞌ nedaꞌ tu lu xe̱zre naga guca wedil-la.
22 Gate naꞌ guzúa da dxuchebe nedaꞌ gunníaꞌ:
Zuaꞌ naga québedxa leꞌe Xranaꞌ nedaꞌ.
Lueꞌ bennuꞌ chiꞌa da gutaꞌ xuedaꞌ Lueꞌ gate naꞌ bláwizraꞌ Lueꞌ.
23 ¡Le zriꞌi Xránadxu, xúgute̱le leꞌe nácale benneꞌ chee̱ Lé̱queze̱ꞌ!
Xránadxu dxuxúe̱ꞌ benneꞌ caꞌ quebe dxulusane̱ꞌ Le̱ꞌ,
naꞌ dxuxunézrujle̱ꞌe̱ chee̱ benneꞌ caꞌ dxulucáꞌana szrene̱ꞌ Le̱ꞌ.
24 Le gutipa lázrele, xúgute̱le leꞌe dxebeza lázrele Xránadxu Dios,
naꞌ Le̱ꞌ guzé̱ chúchue̱ꞌ leꞌe.