30
Gucáꞌana szrenaꞌ Lueꞌ, Xran, laweꞌ da bechisuꞌ nedaꞌ,ne quebe bnézrujuꞌ lataj benneꞌ caꞌ dxeledábague̱ꞌ nedaꞌ
xelún le̱ꞌ chiaꞌ.
2 Xranaꞌ Dios, bláwizraꞌ Lueꞌ, naꞌ bexunuꞌ nedaꞌ.
3 Xran, bseláuꞌ nedaꞌ lu lataj ba xaꞌ.
Bexunuꞌ nedaꞌ chee̱ quebe chuꞌa xe̱dxu ba.
4 Le gul-la chee̱ Xránadxu, leꞌe nácale benneꞌ cheé̱queze̱ꞌ.
Le xe̱ Le̱ꞌ: “Xcalenuꞌ”, ne dxajsá lázrele naque̱ꞌ láꞌazxa,
5 laweꞌ da tu chíꞌidauze dxezré̱ꞌe̱
san chadía chacanna zua xel-laꞌ zriꞌi lazreꞌ chee̱ꞌ.
Wabézredxu tu zreze, san che zílala wabéle̱ꞌe̱dxu.
6 Gate guzúa chawaꞌ gunníaꞌ: Quebe nu sequeꞌ gutá nedaꞌ,
7 laweꞌ da bze̱ chuchuꞌ nedaꞌ, Xran, ca tu xiꞌa zren,
ne bléꞌenuꞌ nedaꞌ cháwedauꞌ.
Gate bcache lauꞌ, naꞌ guzúaꞌ ste̱be.
8 Xran, guláwizraꞌ Lueꞌ, ne gataꞌ xuedaꞌ Lueꞌ.
9 ¿Bizra da ba neza gaca na chiuꞌ che gatiaꞌ,
ne chuꞌa xe̱dxu ba?
¿Güe láꞌanaꞌ Lueꞌ gate ba nacaꞌ xu xrte?
¿Waca nu guzendaꞌ da li chiuꞌ?
10 Bze̱ naga nedaꞌ, Xran, ne bexache lazreꞌ nedaꞌ.
Xran, gúcale̱ nedaꞌ.
11 Be̱nuꞌ bexaca xel-laꞌ dxebezre chiaꞌ xel-laꞌ wexáꞌa.
Bcuasuꞌ xel-laꞌ dxewíꞌine lazreꞌ chiaꞌ, ne bzuꞌ chiaꞌ xel-laꞌ dxebé.
12 Chee̱ le̱ naꞌ tu gúl-lazquezaꞌ chiuꞌ, laweꞌ da nacuꞌ
da ba neza chiaꞌ, ne quebe sua zríquezaꞌ.
Xranaꞌ Dios, tu güe láꞌanazquezaꞌ Lueꞌ chadía chacanna.