42
Ca dxun bzrinaꞌ xixreꞌ dxebezre xaꞌabaꞌ laweꞌ dadxebílebaꞌ nisa,
caꞌ dxuláwizra bénneꞌdu xuꞌa da naca chiuꞌ, Dios.
2 Dxebile bénneꞌdu xuꞌa da naca chiuꞌ, Dios ban.
¿Bata gaca xidaꞌ chee̱ guzúa cuinaꞌ lau Dios?
3 Nisa xuzru xiaj lawaꞌ guca na ca xeta dxawaꞌ
te zra chizrela,
dxácate̱ naꞌ gulé̱ꞌe̱ nedaꞌ xúgute̱ zra: “¿Ga naꞌ Dios chiuꞌ?”
4 Dxajsá lazraꞌ chee̱ da caní, ne dxebezre lazraꞌ.
Dxajsá lazraꞌ ca guxáꞌale̱naꞌ benneꞌ zan caꞌ,
ne nuzúaꞌ laweꞌ le̱ꞌ lizre Dios.
Tu dxúl-lazquezdxu lu xel-laꞌ dxebé,
ne dxue láꞌanaquezdxu Dios lu laní.
5 ¿Bizr chee̱ naꞌ dxate niꞌa naꞌu, bénneꞌdu xuꞌa?
¿Bizr chee̱ naꞌ zuꞌ ste̱be lu xichaj lázrdawaꞌ?
Guleza lazreꞌ Dios laweꞌ da güe láꞌanaquezaꞌ Le̱ꞌ da xula.
Naque̱ꞌ Benneꞌ dxuselé̱ꞌ nedaꞌ, ne Dios chiaꞌ.
6 Dios chiaꞌ, ba nate niꞌa naꞌ bénneꞌdu xuꞌa
lu xichaj lázrdawaꞌ.
Chee̱ le̱ naꞌ dxajsá lazraꞌ chiuꞌ nigá zuaꞌ lu xe̱zr la xu
xechaláꞌa xe̱gu Jordán,
ne lu xe̱zr la xu chee̱ benneꞌ Hermón naga zua xiꞌa Mizar.
7 Ca schaga da dxun nísadauꞌ, ne da dxun tu bdua nisa
zren chiuꞌ, Dios,
caꞌ dxeque bénneꞌdu xuꞌa laweꞌ da dxusaca ziꞌ naꞌu nedaꞌ.
8 Te zra xexache lazreꞌ Xránadxu nedaꞌ,
naꞌ chizrela tu gúl-lazquezaꞌ da güe láꞌanaꞌ Le̱ꞌ,
ne tu guchálajle̱zquezaꞌ Dios,
Bénneaꞌ dxunne̱ꞌ xel-laꞌ nabán chiaꞌ.
9 Xapaꞌ Dios: Luéꞌqueze dxucuꞌujuꞌ nedaꞌ.
¿Bizr chee̱ naꞌ nal-la lazruꞌ nedaꞌ?
¿Bizr chee̱ naꞌ dxewíꞌine lazraꞌ laweꞌ da dxusaca ziꞌ
benneꞌ dxedábague̱ꞌ nedaꞌ?
10 Ca tu benneꞌ dxelé̱ꞌe̱ zrita xuꞌa, caꞌ dxelún benneꞌ caꞌ
chiaꞌ, dxelún le̱ꞌ chiaꞌ.
Tu zra tu zra dxelenné̱ꞌ chiaꞌ: “¿Ga naꞌ Dios chiuꞌ?”
11 ¿Bizr chee̱ naꞌ dxate niꞌa naꞌu, bénneꞌdu xuꞌa?
¿Bizr chee̱ naꞌ zuꞌ ste̱be lu xichaj lázrdawaꞌ?
Guleza lazreꞌ Dios laweꞌ da güe láꞌanaquezaꞌ Le̱ꞌ da xula.
Naque̱ꞌ Benneꞌ dxuselé̱ꞌ nedaꞌ, ne Dios chiaꞌ.