18
Nazríꞌidaꞌ Lueꞌ, Xran.Lueꞌ dxuzé̱ chuchuꞌ nedaꞌ.
2 Lueꞌ, Xran, nacuꞌ ca tu xiaj naga ze̱ chúchuaꞌ,
ne ca tu xuꞌu zren naga xuꞌu chawaꞌ, naꞌ nacuꞌ weselá chiaꞌ.
Dios chiaꞌ, Lueꞌ dxuzé̱ chuchuꞌ nedaꞌ, naꞌ guxrén lazraꞌ Lueꞌ.
Dxucuꞌujuꞌ nedaꞌ, ne dxuseláuꞌ nedaꞌ, ne dxucache chawuꞌ nedaꞌ.
3 Wanné̱quezaꞌ Xránadxu Dios,
Bénneaꞌ naca chee̱ꞌ güe láꞌanadxu Le̱ꞌ.
Le̱ꞌ guselé̱ꞌ nedaꞌ lu naꞌ benneꞌ caꞌ dxeledábague̱ꞌ nedaꞌ.
4 Guzúaꞌ lu da ste̱be chee̱ xel-laꞌ gute,
naꞌ guca da cale̱la ca tu xe̱gu nisa da bchebe na nedaꞌ.
5 Guzúaꞌ lu da ste̱be chuꞌa lataj ba xaꞌ
laweꞌ da zuaꞌ lu da ste̱be chee̱ xel-laꞌ gute.
6 Lu da ziꞌ da xaꞌ bláwizraꞌ Xranaꞌ Dios, ne gunné̱quezaꞌ Dios chiaꞌ.
Le̱ꞌ benne̱ꞌ chiꞌa naga zue̱ꞌ lataj láꞌazxa chee̱ꞌ,
ne bze̱ nague̱ꞌ da bchálajaꞌ lawe̱ꞌ.
7 Nadxa guzrúꞌ lu xe̱zr la xu nigá.
Gulezrize lane xiꞌa caꞌ.
Gulezrízele̱ꞌe̱ na laweꞌ da bzraꞌa Leꞌ.
8 Bdxuaj zren chee̱ xiꞌ lu zrine̱ꞌ,
ne bdxuaj xiꞌ lu dxuꞌe̱ da bzezxe na da de̱ lawe̱ꞌ,
naꞌ xiꞌ naꞌ gudel-la na bau caꞌ.
9 Bzéxruje̱ꞌ da zria zran xabáa, naꞌ bétaje̱ꞌ,
naꞌ guzúa da chul-la zran niꞌe̱.
10 Gudée̱ꞌ lu beꞌ zrie̱ꞌ tu da nazí le na querubín.
Chadí gudée̱ꞌ lu beꞌ bdunuꞌ.
11 Gúcue̱ꞌ da chul-la, da bcache na Le̱ꞌ,
da naꞌ naca na beuj bza da xuzru na nisa.
12 Lu da dxácatite legala chee̱ꞌ da xuꞌu lu beuj bza,
naꞌ beledxúaj bau dxelala, ne xiaj bezxeꞌ.
13 Zran xabáa gunné̱ guziuꞌ chee̱ chiꞌi Xránadxu,
naꞌ ben chiꞌi Dios szrente̱ ládujla bau dxelala caꞌ,
ne xiaj bezxeꞌ naꞌ.
14 Bsane̱ꞌ xaga nalá xécheꞌze chee̱ꞌ caꞌ,
naꞌ be̱se dínnaje̱ꞌ benneꞌ caꞌ dxeledábague̱ꞌ nedaꞌ.
Bsane̱ꞌ xesa guziuꞌ caꞌ, ne bzria xiꞌe̱ benneꞌ caꞌ.
15 Nadxa beleláꞌ da zaj de̱ lu situj chee̱ nísadauꞌ,
ne bleꞌe lau lane xe̱zr la xu da zua na zran nísadauꞌ,
gate naꞌ gudil-luꞌ benneꞌ caꞌ dxeledábague̱ꞌ nedaꞌ, Xran,
ne lu xel-laꞌ dxezráꞌa chiuꞌ bzaguꞌ benneꞌ caꞌ.
16 Bétaje̱ꞌ lu da sibe, ne bequé̱ꞌe̱ nedaꞌ.
Bebéaje̱ꞌ nedaꞌ lu da naca ca tu nisa zila.
17 Bselé̱ꞌ nedaꞌ lu naꞌ benneꞌ wal-la dxeledábague̱ꞌ nedaꞌ,
ne lu naꞌ benneꞌ caꞌ dxelecuídene̱ꞌ nedaꞌ,
benneꞌ zaj nácadxe̱ꞌ wál-la ca nedaꞌ.
18 Buluzague̱ꞌ nedaꞌ gate naꞌ zuaꞌ lu da sté̱bele̱ꞌe̱,
san Xranaꞌ Dios gúcale̱ne̱ꞌ nedaꞌ.
19 Bebéaje̱ꞌ nedaꞌ naga xuꞌa, ne bzue̱ꞌ nedaꞌ tu lataj zren.
Bselé̱ꞌ nedaꞌ laweꞌ da bezaca ba lazre̱ꞌ chiaꞌ.
20 Xránadxu Dios bexunne̱ꞌ chiaꞌ cáte̱ze naca
da xrlátaje da nunaꞌ.
Cáte̱ze naca da xrlátaje da nunaꞌ bexunne̱ꞌ chiaꞌ
21 laweꞌ da dxunaꞌ ca da dxuse̱de Xranaꞌ nedaꞌ,
ne quebe guleaj xíchajaꞌ Dios chiaꞌ.
22 Dxunaꞌ ca naca da dxenná béꞌene̱ꞌ nedaꞌ,
ne quebe bsanaꞌ da caꞌ nadxíxruj beꞌe̱.
23 Gucaꞌ li lazreꞌ lau Le̱ꞌ,
ne bxue cuinaꞌ chee̱ quebe gunaꞌ da cale̱la.
24 Chee̱ le̱ naꞌ bexunna Xránadxu Dios chiaꞌ
cáte̱ze naca da xrlátaje da be̱naꞌ,
cáte̱ze naca da xrlátaje da nunaꞌ lau Le̱ꞌ.
25 Dxexache lazruꞌ chee̱ benneꞌ dxexache lazre̱ꞌ le saꞌ ljwezre̱ꞌ,
ne nacuꞌ li lazreꞌ nen benneꞌ naque̱ꞌ li lazreꞌ.
26 Dxunuꞌ da naca chaweꞌ chee̱ benneꞌ naque̱ꞌ chaweꞌ,
naꞌ gacuꞌ snia nen benneꞌ we̱n da cale̱la.
27 Guseláuꞌ benneꞌ zaj zue̱ꞌ lu da ziꞌ da xaꞌ,
san guzéxrujuꞌ benneꞌ dxulucáꞌana szren cuine̱ꞌ.
28 Luéꞌqueze guzaljuꞌ xiꞌ chiaꞌ.
Xranaꞌ Dios, guzaniꞌu chiaꞌ naga zuaꞌ lu da chul-la.
29 Nen xel-laꞌ waca chiuꞌ guzría xiꞌa benneꞌ zante̱
dxeledíl-lale̱ne̱ꞌ nedaꞌ.
Che Lueꞌ, Dios, súale̱nuꞌ nedaꞌ
waca guchínnajaꞌ zeꞌe da zaj naxechaj xe̱zre caꞌ.
30 Li lazreꞌ zaj naca da dxun Dios, naꞌ du lazreꞌ naca xrtizre̱ꞌ.
Dxucuꞌuje̱ꞌ xúgute̱ benneꞌ caꞌ dxelebeza lazre̱ꞌ Le̱ꞌ.
31 Tuze Xránadxu naque̱ꞌ Dios.
Tuze Dios chee̱dxu naque̱ꞌ Benneꞌ dxucuꞌuje̱ꞌ dxiꞌu.
32 Dios naque̱ꞌ Bénneaꞌ dxune̱ꞌ nedaꞌ benneꞌ wal-la,
ne Benneꞌ dxune̱ꞌ li lazreꞌ da dxunaꞌ nedaꞌ.
33 Dxune̱ꞌ niꞌa ca zaj naca niꞌa bzrinaꞌ xixreꞌ
ne dxuzúa chúchue̱ꞌ nedaꞌ lu xiꞌa Sión chee̱ꞌ.
34 Dxusé̱dene̱ꞌ nedaꞌ chee̱ gaca chaꞌa lu wedil-la,
ne̱ chee̱ gaca guchínedaꞌ xaga nalá xécheꞌze
da naca na xia gacheꞌ.
35 Lu xel-laꞌ weselá chiuꞌ bcuꞌujuꞌ nedaꞌ,
ne nen naꞌu xabe̱la gúcale̱nuꞌ nedaꞌ.
Xel-laꞌ zriꞌi lazreꞌ chiuꞌ ba nucáꞌana szren na nedaꞌ.
36 Be̱n chawuꞌ neza naga teaꞌ,
chee̱ quebe cuilaꞌ lu neza naꞌ.
37 Blagaꞌ benneꞌ dxeledábague̱ꞌ nedaꞌ, naꞌ xeajzrenaꞌ le̱ꞌ,
naꞌ quebe bebiꞌa cadxa bé̱teteaꞌ benneꞌ caꞌ.
38 Be̱naꞌ benneꞌ caꞌ we̱ꞌ, naꞌ quebe guca xelexase̱ꞌ.
Xeajlecházie̱ꞌ zran niꞌa.
39 Btipuꞌ lazraꞌ chee̱ chaꞌa lu wedil-la.
Bzéxrujuꞌ benneꞌ dxeledábague̱ꞌ nedaꞌ zran niꞌa.
40 Be̱nuꞌ buluzrunnuj benneꞌ dxeledábague̱ꞌ nedaꞌ lawaꞌ,
chee̱ bzria xiꞌa benneꞌ caꞌ dxelecuídene̱ꞌ nedaꞌ.
41 Gulenné̱ꞌ nu benneꞌ gácale̱ne̱ꞌ le̱ꞌ san quebe nu chiláꞌ.
Gulenné̱ꞌ Xránadxu Dios, san quebe benne̱ꞌ chee̱ꞌ.
42 Bzúzrujaꞌ benneꞌ caꞌ ca bxrte xu da dxua beꞌ.
Bléajaꞌ le̱ꞌ ca dxuléajaꞌ gunaꞌ la neza caꞌ.
43 Bseláuꞌ nedaꞌ lu naꞌ benneꞌ caꞌ dxeledábague̱ꞌ,
naꞌ be̱nuꞌ nedaꞌ benneꞌ xíchaje̱ xe̱zr la xu caꞌ,
naꞌ benneꞌ caꞌ quebe núnbeꞌa dxelune̱ꞌ zrin chiaꞌ.
44 Gate belenne̱ꞌ chiaꞌ, naꞌ buluzúe̱ꞌ xrtizraꞌ.
Benneꞌ zaj zraꞌ xe̱zr la xu caꞌ belune̱ꞌ ca gunná beꞌedaꞌ.
45 Benneꞌ zituꞌ caꞌ gulate niꞌa ne̱ꞌe̱,
naꞌ beledxúaje̱ꞌ dxelezrízie̱ꞌ lu xe̱zre zrentauꞌ chee̱ꞌ caꞌ.
46 Gaca ba láꞌazxa Xránadxu Dios.
Gaca ba Bénneaꞌ dxucuꞌuje̱ꞌ nedaꞌ.
Xegáꞌana szrénqueze Dios, Bénneaꞌ dxuselé̱ꞌ nedaꞌ.
47 Naca Dios Bénneaꞌ dxebéaj lazre̱ꞌ benneꞌ dxeledábague̱ꞌ nedaꞌ,
ne dxuzúe̱ꞌ benneꞌ caꞌ zran niꞌa.
48 Naque̱ꞌ Bénneaꞌ dxuselé̱ꞌ nedaꞌ lu naꞌ benneꞌ caꞌ
dxeledábague̱ꞌ nedaꞌ.
Dxune̱ꞌ dxenná beꞌedaꞌ benneꞌ caꞌ guledábague̱ꞌ nedaꞌ.
Bselé̱ꞌ nedaꞌ lu naꞌ benneꞌ xichaj zraꞌa caꞌ.
49 Chee̱ le̱ naꞌ xeche̱baꞌ chiuꞌ, Xran, lau benneꞌ xe̱zr la xu caꞌ,
naꞌ gúl-laquezaꞌ chee̱ Lauꞌ Lueꞌ.
50 Dxun Dios dxenná bea bénneaꞌ waláz chee̱ꞌ,
ne dxexache lazre̱ꞌ bénneaꞌ guqué̱ꞌe̱, bénneaꞌ naque̱ꞌ David,
ne zriꞌine zre sue̱ꞌ chadía chacanna.