17
Bze̱ naga chiꞌa, Xran.Ben xanneꞌ da dxuláwizraꞌ Lueꞌ.
Guzíꞌ da dxenabaꞌ Lueꞌ, nacaꞌ du lazraꞌ.
2 Be̱nna lataj xeláꞌa lauꞌ chee̱ guchiꞌu chiaꞌ,
laweꞌ da dxeléꞌenuꞌ xúgute̱ cáte̱ze zaj naca na.
3 Lueꞌ dxennáꞌ xánniuꞌ xichaj lázrdawaꞌ
ne dxeléꞌenuꞌ nedaꞌ chizrela.
Gunnáꞌ xánniuꞌ da dxunaꞌ, naꞌ quebe bi da cale̱la bléꞌenuꞌ.
Ba nunaꞌ quebe bi dizraꞌ cale̱la nniaꞌ.
4 Dxuzúaꞌ dizraꞌ ca naca da dxennáuꞌ,
naꞌ quebe dxunaꞌ ca da dxelún benneꞌ we̱n da zrinnaj caꞌ.
5 Bxue nedaꞌ lu neza chaweꞌ chiuꞌ,
chee̱ quebe cheajcháziaꞌ lu da cale̱la.
6 Dxuláwizraꞌ Lueꞌ, Dios, laweꞌ da dxennuꞌ chiꞌa.
Bze̱ naga chiꞌa, naꞌ bene da dxenníaꞌ.
7 Bleꞌe ca dxexache lázrele̱ꞌu bénneache.
Bselá benneꞌ caꞌ dxuluxrén lazre̱ꞌ Lueꞌ lu naꞌ benneꞌ
dxeledábague̱ꞌ le̱ꞌ.
8 Bxue nedaꞌ ca dxun benneꞌ dxuxúe̱ꞌ xiaj lawe̱ꞌ.
Gude̱zre nedaꞌ ca dxun bedxuj dxé̱zrebaꞌ zríꞌinebaꞌ zran xrílabaꞌ
9 chee̱ quebe bi xelún chiaꞌ benneꞌ caꞌ dxelune̱ꞌ da cale̱la,
benneꞌ dxeledábague̱ꞌ nedaꞌ, ne dxelaca lazre̱ꞌ xelútie̱ꞌ nedaꞌ.
10 Quebe dxelexache lazre̱ꞌ le saꞌ ljwezre̱ꞌ,
naꞌ dute̱ xel-laꞌ dxulucáꞌana szren cuine̱ꞌ dxuluchálaje̱ꞌ.
11 Gátete̱ze dxedáꞌ dxeléchaje̱ꞌ nedaꞌ.
Dxelaca lazre̱ꞌ xeline̱ꞌ nedaꞌ xu.
12 Zaj naque̱ꞌ ca tu be̱zre xíxreꞌdauꞌ dxaca lázrebaꞌ bi gágubaꞌ.
Zaj naque̱ꞌ ca tu be̱zre xixreꞌ,
ba nucache cuínabaꞌ chee̱ qué̱l-labaꞌ béadu caꞌ.
13 Gudá, Xran, gudábagaꞌ benneꞌ caꞌ dxelune̱ꞌ da cale̱la,
naꞌ bchiche̱ꞌ lu xu.
Bselá nedaꞌ lu naꞌ benneꞌ caꞌ dxelune̱ꞌ da cale̱la,
guchínenuꞌ xia chiuꞌ.
14 Bselá nedaꞌ lu naꞌ benneꞌ caꞌ nen niꞌa náꞌquezuꞌ, Xran.
Bselá nedaꞌ lu naꞌ bénneache, benneꞌ caꞌ zaj dxeꞌe̱ gunne xue
chee̱ xe̱zr la xu nigaze,
benneꞌ caꞌ dxeláguqueze̱ꞌ da zácale̱ꞌe̱ chiuꞌ.
Da nigáqueze dxulugawe̱ꞌ zríꞌine̱ꞌ caꞌ,
ne dxexegáꞌanaqueze da dxelágu zriꞌine zre sue̱ꞌ.
15 Leꞌedaꞌ nedaꞌ lau Lueꞌ laweꞌ da nacaꞌ xrlátaje.
Xezaca ba lazraꞌ gacaꞌ ca nácaquezuꞌ Lueꞌ gate xebanaꞌ.