16
Bxue nedaꞌ, Dios, laweꞌ da dxuxrén lazraꞌ Lueꞌ.2 Lu xichaj lázrdawaꞌ guchaꞌ Xranaꞌ Dios:
“Lueꞌ nacuꞌ Xranaꞌ.
Quebe bi xetú da xrlátaje de̱ chiaꞌ da quebe naca na chiuꞌ.”
3 Tuze benneꞌ caꞌ zaj naque̱ꞌ chee̱ Dios lu xe̱zr la xu,
ne benneꞌ caꞌ zaj naque̱ꞌ du lazreꞌ dxezaca ba lázrele̱naꞌ.
4 Waxánqueze da dxelezaca benneꞌ caꞌ dxelape̱ꞌ ba láꞌana
tu dios quebe bi zaca.
Quebe gunaꞌ le̱ꞌ tu zren gate dxuluzríe̱ꞌ zren lau dios naꞌ,
ne quebe guchínedaꞌ la dios naꞌ.
5 Xránadxu Dios dxugawe̱ꞌ nedaꞌ, ne naque̱ꞌ da ba neza chiaꞌ.
Lueꞌ, Dios, nuxruꞌ ca da naca chiaꞌ.
6 Ca da nuzúꞌ chiaꞌ zaj naca na da dxeziꞌa ba neza,
ne xrtante̱ zaj naca da nunnuꞌ chiaꞌ.
7 Tu gucáꞌana szrénzquezaꞌ Xránadxu Dios,
Bénneaꞌ dxusé̱dene̱ꞌ nedaꞌ.
Chizrela gate ne dxasiaꞌ dxuzéajniꞌine̱ꞌ nedaꞌ lu xichaj lázrdawaꞌ.
8 Xránadxu Dios nuxrén lazraꞌ gusiꞌe̱ nedaꞌ.
Laweꞌ da zue̱ꞌ cuitaꞌ, quebe bi sequeꞌ guchebe na nedaꞌ.
9 Chee̱ le̱ naꞌ gubé lázrdawaꞌ, ne gubéle̱ꞌe̱quezdaꞌ,
naꞌ zra gachaꞌ lu xe̱dxu ba cueza lazraꞌ
10 laweꞌ da quebe gucáꞌanuꞌ bénneꞌdu xuꞌa lu lataj ba xaꞌ,
ne quebe guꞌu lataj guzru nu benneꞌ nácaqueze̱ꞌ chiuꞌ.
11 Guléꞌenuꞌ nedaꞌ da gunaꞌ chee̱ gataꞌ chiaꞌ xel-laꞌ nabán.
Naga zuꞌ Lueꞌ wabéle̱ꞌe̱quezdaꞌ,
naꞌ cuituꞌ Lueꞌ súatequeze da ba neza chiaꞌ.