19
Dxuléꞌe lau zran xabáa ca naca xel-laꞌ szren chee̱ Dios.Dxuchálajqueze na ca zaj naca da nune̱ꞌ.
2 Tu zra tu zra dxuzén na zra xula da nigá,
naꞌ tu zreꞌ tu zreꞌ dxe̱ na zreꞌ xula da náꞌqueze.
3 Quebe dxuluchine na xrtizraꞌ bénneache,
ne quebe nu dxen chiꞌi na,
4 san dxezriluj da dxelenná na du gabíꞌi xe̱zr la xu,
ne dxelezrín xrtizraꞌ na dapa saca chee̱ xe̱zr la xu.
Dios be̱ne̱ꞌ xabáa ca tu xuꞌu naga zua gubizra.
5 Che zílala dxalaj na ca tu benneꞌ wechaga naꞌ.
Dxebé na ca tu benneꞌ dxezá chégüe̱ꞌ lu witja.
6 Dxedxuaj na chaláꞌa naga dxalaj na,
naꞌ dxezrín na chaláꞌa naga dxebía na.
Dxucháꞌa na xúgute̱ da zaj de̱.
7 Du lazreꞌ naca da nadxixruj bea Xránadxu,
ne dxuzé̱ chacha na bénneꞌdu xúꞌudxu.
Li lazreꞌ naca da dxexeche̱be Xránadxu,
ne dxunezruj na xel-laꞌ sina chee̱ benneꞌ caꞌ
quebe zaj nape̱ꞌ na.
8 Da líqueze zaj naca da nadxixruj bea Xránadxu,
naꞌ dxelebéle̱ꞌe̱ benneꞌ caꞌ dxelune̱ꞌ ca zaj naca na.
Du lazreꞌ zaj naca da dxuzéajniꞌi Xránadxu dxiꞌu,
da dxuluzúa na dxiꞌu lu xel-laꞌ naxaníꞌ.
9 Cháwedauꞌ naca zrébedxu Xránadxu,
da gun na súadxu chadía chacanna.
Da líqueze zaj naca da dxuchiꞌa Xránadxu chee̱dxu,
ne zaj naca na chaweꞌ.
10 Zaj naca na da dxezá lázredxadxu ca oro,
ne ca oro zrente̱ da zácale̱ꞌe̱ na.
Zaj naca na zíxredxa ca bzrínaꞌdauꞌ, da nácale̱ꞌe̱ na zixre.
11 Dxulusizre na nedaꞌ, we̱n zrin chiuꞌ.
Laweꞌ da dxunaꞌ ca zaj naca na, da zrente̱ dxeziꞌa.
12 Netú benneꞌ quebe gaca léꞌene̱ꞌ da cale̱la da dxune̱ꞌ.
Bselá nedaꞌ, Xran, lu da cale̱la da quebe dxéquebeꞌedaꞌ dxunaꞌ.
13 Bucache chaweꞌ nedaꞌ, we̱n zrin chiuꞌ,
chee̱ quebe bi dul-la gunaꞌ du lazraꞌ.
Quebe guꞌu lataj nna beꞌe dul-la nedaꞌ.
Nadxa gacaꞌ du lazraꞌ, ne quebe bagaꞌ zria chee̱ dul-la naꞌ.
14 Gaca da dxuchálajaꞌ, ne da dxulaba lazraꞌ
da dxezaca ba lazruꞌ Lueꞌ, Xran
Nacuꞌ Benneꞌ dxuxúe̱ꞌ nedaꞌ, ne Benneꞌ dxexáꞌue̱ꞌ nedaꞌ.