Zezu Cristu hã wa'wawi 're isimapa mono zé
2
Ĩ'ra norĩre, ãne hã wa aima rob'ui'éré za'ra wa'wa, aiwasédé hã 're 'manharĩ za'ra wa'aba mono tõ da. Tane nherẽ, ni'wa hã tiwasédé te te 'manharĩ wamhã, wate za'ra iré hã wa'wawi 're isimapa mono 'wa hã, Timama nho 're. Ta hã Zezu Cristu, marĩ i'uwaibaba si te te 're i'ab'manharĩ mono. 2 Ta hã ma tô 'Re ihâimana u'âsi mono hã tisõ, wazada dâ'â da, wawasédé hã te te wama 're apari mono da. Tazahã wawasété da si õ di. Uburé ti'ai ãma 're idahâimana za'ra mono norĩ wasété da zama.3 'Re ihâimana u'âsi mono nhimiroti, wa te 're 'madâ'â pese za'ra mono wamhã, taha na wa za 're wasiwaihu'u za'ra, wasiwawãi ãna, wama iwaihu'u pese za'ra na hã. 4 Ni'wa hã te te nharĩ wamhã, ãne: “Ta hã ĩma waihu'u pese di”, tane nherẽ, isimiroti hã te te 're ab'madâ'â pese mono õ wamhã, ta hã ni'wa hã isadawa nhipe. Duré 'Re ihâimana u'âsi mono nhimiroti tô sena hã tãma 're hâimana mono õ di. 5 Tazahã oto, 'Re ihâimana u'âsi mono nhimiroti hã wa te 're 'madâ'â pese za'ra mono wamhã, wa za 're wasiwaihu'u za'ra, uburé wapẽ'ẽ na 'Re ihâimana u'âsi mono, wama isawi pese za'ra na hã. Ãne na wa za 're wasiwaihu'u za'ra, wasiwawãi ãna 'Re ihâimana u'âsi mono ãma 're iwahâimana za'ra mono na hã. 6 Ni'wa hã ãma 're ihâimana mono na, 're siwasu'u mono wamhã, ma'ãpé 're morĩ, Zezusi hã 're imorĩzém ne.
'Re ihâimana u'âsi mono nhimiroti zahi ité
7 Ĩsisãnawã norĩ, ĩma i'asawi pese za'ra wa'aba norĩ hã, ã hã 'Re ihâimana u'âsi mono nhimiroti zahi itém na te aima rob'ui'éré za'ra wa'aba õ di. Tazahã, 'Re ihâimana u'âsi mono nhimiroti zahi i'rada duréihã, 're isaze na'rata za'ra wa'aba mono zém hawim haré 're iwapari za'ra wa'aba mono. 'Re ihâimana u'âsi mono nhimiroti zahi i'rada hã ma tô duréihã 're iwapari za'ra wa'aba mo. 8 Tane nherẽ, 'Re ihâimana u'âsi mono nhimiroti zahi na ãhã na te aima irob'ui'éré za'ra wa'aba zé hã, tô ité duré. E marĩ wa. Ã hã 'Re ihâimana u'âsi mono nhimiroti zahi hã tô sena duré dahâimanazé tô sena hã te za da te ai'ãma 're 'madâ'â za'ra wa'wa, Cristuhu ãma da te 're i'madâ'â za'ra mono ne. Tahawa robra hã ma tô aima ai'utõrĩ za'ra wa'wa, rowa'a tô sena uptabi si te oto rob'uiwẽ, aihâimanazéb 'reb za'ra wa'aba hã.
9 Ni'wa hã rowa'a na 're imorĩ na siwasu'u nherẽ, tisisãnawã te te 're 'ruiwapari mono wamhã, te zahadu robra ãma 're hâimana. 10 Ni'wa hã tisisãnawã te te 're sawi pese mono wamhã, ta hã te rowa'a na 're mo. Tawamhã taha ma, marĩ hã hâimana õ di, ihâimanazéb 'remhã te te i'morowĩrĩ da hã. 11 Tazahã, ni'wa hã tisisãnawã te te 'ruiwapari wamhã, robra ãma te ta hã tihâiba. Robra ãma te 're mo. Duré nimomo imorĩ na hã te te waihu'u õ di, robra hã te te tob'a wa.
12 Ĩ'ra norĩre, wa aima rob'ui'éré za'ra wa'wa, 'Re ihâimana u'âsi mono hã aiwasédé te te oto ai'ãma 're ab'madâ'â aba mono õ wa, Cristuhu u'âbâ.
13 Damama norĩ, wa aima rob'ui'éré za'ra wa'wa, romna'rata hawim haré 're ihâimana mono hãa aima waihu'u pese za'ra wa'aba wa.
Ipréduptém norĩ, wa aima rob'ui'éré za'ra wa'wa, Iwasété uptabib ãma ai'uté za'ra wa'aba wa. 14 Ĩ'ra norĩre, wa aima rob'ui'éré za'ra wa'wa, Wamama hã aima waihu'u pese za'ra wa'aba wa.
Damama norĩ, wa aima rob'ui'éré za'ra wa'wa, romna'rata hawim haré 're ihâimana mono hã aima waihu'u pese za'ra wa'aba wa.
Ipréduptém norĩ, wa aima rob'ui'éré za'ra wa'wa, asiptete za'ra wa'aba wa, duré 'Re ihâimana u'âsi mono nhimiroti na ãma 're aihâimana za'ra wa'aba mono wa, duré Iwasété uptabi ãma 're ai'uté za'ra wa'aba mono wa.
15 Ti'ai ãma uburé marĩ iwasédé 're ihâimana za'ra mono hã asima 're sawi za'ra wa'aba mono tõ. Ti'ai ãma marĩ iwasédé 're ihâimana za'ra mono hã asima 're sawi za'ra wa'aba mono wamhã, 'Re ihâimana u'âsi mono Aimama 'wa hã 're sawi waihu'u za'ra wa'aba mono õ di za. 16 Uburé marĩ iwasédé ti'ai ãma 're ihâimana za'ra mono hã, Wamama hawib õ di. 'Râwi marĩ iwasédé dasima iwẽ hã duré datõmo na marĩ 'madâ'â ze zarina dama 're ihâimana za'ra mono da hã duré uburé marĩ ti'ai ãma dama 're ihâimana za'ra mono na 're idasi'madâ'â ze za'ra mono zé hã, uburé ã norĩ hã Wamama hawib õ di. Tazahã, ti'ai ãma marĩ iwasédé 're ihâimana za'ra mono.
17 Ti'ai ãma uburé marĩ, 're ihâimana za'ra mono hã te 're si'utõrĩ za'ra duré uburé marĩ na danhiminho'ru zama. Tanei õ di, 'Re ihâimana u'âsi mono te te sima 're iwẽ mono zé te te 're i'manharĩ za'ra mono norĩ hã. Ta norĩ hã te za õne u'âsi 're hâimana za'ra.
Cristuhu zada, 're ihâimana za'ra mono norĩ
18 Ĩ'ra norĩre, rob'rãsutu u hã romhuture di oto. Ma tô iwapari za'ra wa'wa, Cristuhu zada 're Ihâimana mono hã ti'ai ãma za oto isihâi'ré na hã. Tane nherẽ, ãhã na hã ahâ na ma tô sihâi'ré za'ra, Cristuhu zada 're ihâimana za'ra mono norĩ hã. Taha na wa tô waihu'u za'ra ni, rob'rãsutu u oto iromhuture na hã. 19 Ta norĩ hã wahawib za'ra ma tô wairé, wasiré õ wa tô. Wasiré uptabi 'wa'âhã, te aré wasiré 're hâimana u'âsi za'ra. Tane nherẽ, ma tô wahawi wairé, wahawi iwairébé norĩ 'remhã ni'wa wasiré ihâimana uptabi za'ra õ na, wa te oto waihu'u pese za'ra da.
20 Tazahã, a norĩ wa'wa hã ma tô Cristu 're imorĩ wẽ uptabi hã aipisutu za'ra wa'wa, Timama Pẽ'ẽzani te te aima sõmri za'ra wa'aba da. Tahawa aima waihu'u pese za'ra wa'aba di, 'Re ihâimana u'âsi mono nhimiroti tô sena uptabi hã. 21 Tahawa, wa aima rob'ui'éré za'ra wa'wa, e 'Re ihâimana u'âsi mono nhimiroti aima iwaihu'u za'ra wa'aba õ zarina. Mare di. Isimiroti aima waihu'u pese za'ra wa'aba wa, duré dazadawa nhipe hã 'Re ihâimana u'âsi mono nhimiroti tô sena 're ihâimana mono hawib õ na aima waihu'u pese za'ra wa'aba wa.
22 Tawamhã bété, e 'wa hã isadawa nhipe. Isadawa nhipe hã Zezusi, Cristu õ na te te 're iwasu'u mono. Ãne ni'wa hã te te 're rowasu'u mono wamhã, ta hã te Cristuhu zada 're hâimana. Ta hã te Imama hã te te 're udâ duré I'ra zama. 23 Ni'wam norĩ hã I'rac te te 're udâ za'ra mono wamhã, Imama hã isiré 're hâimana za'ra mono õ di za. Tazahã, ni'wa hã Zezusi, 'Re ihâimana u'âsi mono hawi we imorĩ na te te isaze na tô sena dama 're siwasu'u mono wamhã, Imama hãd te isiré 're hâimana.
24 Tahawa ma'ãpé, aipẽ'ẽ 'remhã asima 're 'madâ'â pese za'ra wa'aba mono, isaze na'rata za'ra wa'aba hawim haré 'Re ihâimana u'âsi mono nhimiroti 're iwapari za'ra wa'aba mono zé hã. Isaze na'rata za'ra wa'aba hawim haré 'Re ihâimana u'âsi mono nhimiroti 're iwapari za'ra wa'aba mono hã, aipẽ'ẽ 're asima 're tété u'âsi za'ra wa'aba mono wamhã, I'ra ãma te za 're aihâimana u'âsi za'ra wa'aba mo duré Imama ãma zama. 25 Cristu hã ma tô ãhã na wama ropisutu siromo za'ra: Dahâimanazé isi'utõrĩ'õ hã te za te te wama 're anhomri.
26 Ãne hã wa aima rob'ui'éré za'ra wa'wa, te te aima 're rob'rãmi za'ra wa'aba mono da, te te sima 're iwẽ za'ra mono norĩ wasu'u na. 27 Tazahã, a norĩ wa'wa hã ma tô Cristu hã 'Re ihâimana u'âsi mono Pẽ'ẽzani na aihâiba ubu za'ra wa'wa. Tahawa ni'wa sô hã 're asimnhasi za'ra wa'aba mono õ di za, te te ãma aima irowahutu za'ra wa'aba da hã. 'Re ihâimana u'âsi mono Pẽ'ẽzani iwaibui wa'wa hã te za uburé marĩ na te te ãma aima 're rowahutu pese za'ra wa'wa, tô sena na hã, mare di i'uptabi õ na hã. Tahawa ma'ãpé, a norĩ wa'aba zama Cristuhu ãma 're aihâimana u'âsi za'ra wa'aba mono, ãma aima isisanho za'ra wa'aba ne.
28 Ĩ'ra norĩre, tahawa ma'ãpé Cristuhu ãma si 're aihâimana u'âsi za'ra wa'aba mono, niwa apâ wei morĩ wa, wa te wasina umnhasi za'ẽtẽ za'ra da, tãma wanhiséb za'ra tõ da, taha bâtâ na isõ're wasimasa wamhã. 29 Ãhã na hã aima waihu'u pese za'ra wa'aba di oto, Cristu hã marĩ i'uwaibaba si te te 're i'ab'manharĩ mono na hã. Tahawa duré waihu'u za'ra wa'aba, ni'wa hã marĩ i'uwaibaba si te te 're ab'manharĩ mono wamhã, ta hã te 'Re ihâimana u'âsi mono 'ra na 're mo.