1 Zuwã
Isazei'wa norĩ ma, Zuwã te te irob'ui'éré na'rata zé
Imreme na isisi hã, dahâimanazém nhomri'wa na 're ihâimana mono zé
1
Wa ãma aima rob'ui'éré za'ra wa'aba ni, Imreme na isisi hã Dahâimanazém nhomri'wai wasu'u na. Ta hã romna'rata hawim haré ma tô 're hâimana. Ta hã wa tô wa te 're wapari za'ra. Watõmo na, wa tô wa te duré wasiwi 're 'madâ'â. Tawamhã wa tô duré wa te wasiwi 're 'madâ'â za'ra, 're ihâimana mono zé hã. Duré wanhib'rata na wa tô wa te wasiwi 're upi. 2 Dahâimanazém nhomri'wa hãa sihâiba wamhã, wa tô wasiwi 'madâ'â ni. Tahawa wa ãhã na hã wa te 're wasu'u za'ra. Dahâimanazé isi'utõrĩ'õ hã wa duré aima wasu'u za'ra wa'aba ni, Imama ãma 're ihâimana mono hã, te te wama ihâi'ré za'ra hã. 3 Wa aima wasu'u za'ra wa'aba ni, watõmo na wa te 're i'madâ'â za'ra mono zéb zarina, duré wa te 're iwapari za'ra mono zéb zarina, wasiré 'râwi 're aihâimana za'ra wa'aba mono da, Imama siré 're iwahâimana za'ra mono ne duré i'ra Zezu Cristuhu siré. 4 Ãne na wa aima rob'ui'éré za'ra wa'aba ni, watoi uptabi na 're iwahâimana za'ra mono zé hã wahuré wama hâimana za'ra da.'Re ihâimana u'âsi mono hã rowa'a
5 Zezu Cristuhu nhimiroti, wa te 're iwapari za'ra mono hã duré ãhã na wa te aima iwasu'u za'ra wa'wa hã, ã hã: 'Re ihâimana u'âsi mono hã rowa'a. Robra hã ãma hâimana waihu'u õ di. 6 Tahawa, 'Re ihâimana u'âsi mono siré 're iwahâimana za'ra mono na, dama 're wasiwasu'u za'ra mono wamhã, robra na 're wahâimana za'ra mono nherẽ. Tawamhã, wamreme na wa za sadawa hapese za'ra ni, duré wahâimanazém na zama. 7 Tazahã, 'Re ihâimana u'âsi mono hã rowa'a na 're ihâimana mono ne, rowa'a na oto 're wahâimana za'ra mono wamhã, wa za wasiré 're wahâimana za'ra. Tawamhã Zezusihi wapru, I'ra wapru hã te za te te 're wa'a'upsõ, uburé wawasédé hã wa te 're i'manharĩ za'ra mono zém hawi.
8 Wawasété ãna 're iwahâimana za'ra mono na dama 're wasiwasu'u za'ra mono wamhã, 'râwi wa za wasima 're wazadawa nhipese za'ra. Tawamhã dahâimanazé tô sena hã wama 're hâimana waihu'u za'ra mono õ di za, ãne wamhã. 9 Tazahã oto, 'Re ihâimana u'âsi mono ma, wawasété na 're wasiwẽ'õ za'ra mono wamhã, te te wa'ãma 're ab'madâ'â mono õ di za. Te za te te 're wa'ahâiba pese, uburé marĩ iwasédé wa te 're i'manharĩ za'ra mono zé wi, õ hã umnhasi za'ẽtẽ wa, duré i'uwaibaba na si te te 're ab'manharĩ mono wa. 10 Wawasédé wa te 're i'manharĩ za'ra mono õ na, 're wasiwasu'u za'ra mono wamhã, tawamhã 'Re ihâimana u'âsi mono ãma wa za wa te 're sa'ra isadawa nhipe. Duré tawamhã isimiroti hã wapẽ'ẽ 'remhã wama 're hâimana za'ra mono õ di.