Wa norĩ hã 'Re ihâimana u'âsi mono 'ra, wa 're wanomro
3
Ma'ãpé ãma rosa'rata pese za'ra wa'aba, Wamama 'Re ihâimana u'âsi mono, tinhimizawizé isa'ẽtẽ uptabi te te wama ihâi'ré za'ra zém na hã. Isimizawizé hã sa'ẽtẽ uptabi wa, ma tô ti'ra na te te 're wa'anhisi. Tahawa, wa norĩ hã tô, 'Re ihâimana u'âsi mono 'ra, wa 're wanomro. Tahawa duré ti'ai ãma siwa'ru 're idahâimana za'ra mono hã te te wawaihu'u za'ra õ di, 'Re ihâimana u'âsi mono hã da te waihu'u za'ra õ wa. 2 Ĩsiwaihu'u norĩ, ĩma i'asawi pese za'ra wa'aba norĩ, ãhã na hã 'Re ihâimana u'âsi mono 'ra, wa 're wanomro. Tane nherẽ, zahadu wama waihu'u za'ra õ di, niha za 're iwahâimana za'ra mono zé hã. Tane nherẽ, wama waihu'u pese za'ra di, ãne hã: Niwa Cristu hã apâ wei morĩ wamhã, isine wa za 're wahâimana za'ra, niha 're ihâimana mono zé hã wa te wasiwi 'madâ'â wa za. 3 Ni'wam norĩ ma, ã hã to sina siwawãi ãna Cristuhu zô 're idanhopré mono zé hã tãma 're hâimana za'ra mono wamhã, te za 're sihâiba pese za'ra, Cristu hã wasété ãna 're ihâimana mono ne.4 Ni'wa hã tiwasédé te te 'manharĩ wamhã, 'Re ihâimana u'âsi mono nhimiroti zahi te tô siwi wẽ'õ. E marĩ wa. Dawasété 'manharĩ hã 'Re ihâimana u'âsi mono nhimiroti zahi wẽ'õzé, dasiwi hã te wasu'u. 5 Aima waihu'u pese za'ra wa'aba di, Cristu hã we imorĩ na, wawasédé hã te te wa'ãma 're ab'madâ'â mono tõ da oto, duré taha ãma iwasédé hã ãma ihâimana õ na hã. 6 Tahawa, ni'wa hã Cristuhu ãma 're morĩ wamhã, tiwasété 'manharĩ na te te ãma 're uzusi waihu'u mono õ di za. Tazahã, ni'wa hã tiwasété 'manharĩ na te te ãma 're uzusi u'âsi mono wamhã, ta hã niwa te te 'madâ'â õ di, Cristu hã. Duré niwa te te waihu'u õ di.
7 Ĩ'ra norĩre, ma'ãpé asi'madâ'â pese za'ra wa'aba, ni'wa hã te te aima rob'rãmi za'ra wa'aba tõ da. Ni'wa hã marĩ i'uwaibaba si te te 're i'ab'manharĩ mono hã, tô i'uwaibaba na te 're hâimana, Cristu hã i'uwaibaba wẽ uptabi na 're ihâimana mono ne. 8 Ni'wa hã tiwasédé te te 're ab'manharĩ u'âsi mono wamhã, ta hã Wa'uburé te hã. E marĩ wa. Wa'uburé hã te 're wasété u'âsi, romna'rata hawim haré. Taha da, ma tô 'Re ihâimana u'âsi mono 'ra hã wei mo ti'ai u, Wa'uburé nhimiromhuri hã te te prub da.
9 'Re ihâimana u'âsi mono 'ra hã tiwasédé te te 're 'manharĩ u'âsi mono õ di za. E marĩ wa. 'Re ihâimana u'âsi mono, ihâimanazé te te tãma isõmri hã tãma 're hâimana u'âsi mono wa. Duré tiwasété 'manharĩ na te te ãma uzusi waihu'u õ di za, 'Re ihâimana u'âsi mono hã Imama na tãma 're hâimana mono wa. 10 Ãne na wa za wa te 're waihu'u za'ra, e 'wam norĩ hã te 'Re ihâimana u'âsi mono 'ra na 're nomro. Duré e 'wam norĩ hã te Wa'uburé 'ra na 're nomro: Ni'wa hã marĩ i'uwaibaba te te 're ab'manharĩ mono õ wamhã, duré isisãnawã tãma sawi õ wamhã, ta hã 'Re ihâimana u'âsi mono 'ra õ di.
'Re asisawi pese za'ra wa'aba mono
11 Isaze na'rata za'ra wa'aba hawim haré, 'Re ihâimana u'âsi mono nhimiroti 're iwapari za'ra wa'aba mono hã, ã hã: 'Re iwasisawi pese za'ra mono da si, iwẽ hã. 12 Caĩhĩ ne, 're wahâimana za'ra mono tõ, Iwasété uptabi te na 're ihâimana mono hã. Ta hã ma tô tisisãnawãi uptabi nherẽ, tino hã tĩwĩ. E marĩ wa, ma tô tiwĩ. Caĩ hã marĩ iwasété si te te 're ab'manharĩ mono wa. Tanei õ di ino hã. Marĩ iwẽ si ma tô te te 're ab'manharĩ.
13 Ĩsisãnawã norĩ, ti'ai ãma siwa'ru 're idahâimana za'ra mono hã te te 're aiwẽ'õ za'ra wa'aba mono wamhã, tãma 're a'rãmi za'ra wa'aba mono tõ. 14 Wama waihu'u pese za'ra di, wadâ'â hawi oto iwawairébé na hã, dahâimanazé isi'utõrĩ'õ u, wasisãnawã norĩ hã wa te 're sawi za'ra mono wa. Ni'wa hã simizawi õ wamhã, zahadu te dâ'â u'âsi 're hâimana. 15 Ni'wa hã tisisãnawã te te 'ruiwapari wamhã, ta hã dapãrĩ'wa. Aima waihu'u pese za'ra wa'aba di, ã hã: Dapãrĩ'wa hã dahâimanazé isi'utõrĩ'õ hã tãma hâimana waihu'u õ di, si'ãma hã. 16 Wa tô waihu'u za'ra ni, ãne u'âbâ si, dazawi hã: Cristu ma tô tihâiba hã tisõ, wazada za'ra. Tahawa, wa norĩ zama wa za wanhimiza'rese 're wahâimana za'ra, wasisãnawã norĩ zawi te, 're wasisãmra mono da hã. 17 Ni'wai ma ti'ai ãma isibro hã tãma 're hâimana za'ra mono nherẽ, isisãnawãi wi marĩ zô tiwi irowaptâ'â na te te 'madâ'â nherẽ, ãma siwamri õ wamhã, e niha te za tawamhã 'Re ihâimana u'âsi mono nhimizawizé hã ãma 're hâimana. 18 Ĩ'ra norĩre, wamreme na si wa te 're dazawi za'ra mono õ di za duré robzanhamri na si. Tô sena wa za wa te 're dazawi za'ra, wahâimanazé iwẽ na wa te 're ihâi'ré za'ra mono zém na hã.
'Re ihâimana u'âsi mono nho're, dasina dahâtâ'â ãna 're idanomro mono zé
19 Tawamhã ãne na wa za 're wasiwaihu'u za'ra, 'Re ihâimana u'âsi mono nhimiroti zarina, tô sena na 're iwanomro mono na hã. Ãne na, wa za duré rowẽ sina 're wahâimana za'ra, 'Re ihâimana u'âsi mono nho'remhã. 20 Wapẽ hã wawasédé te te wa'ãma 're sa'ra mono nherẽ, 'Re ihâimana u'âsi mono hã sa'ẽtẽ uptabi di, wa'ãma 're isiwamri mono da hã, wapẽ'ẽ nhipai u. Taha ma duré uburé marĩ hã waihu'u pese di. 21 Ĩsisãnawã norĩ, ĩma i'asawi pese za'ra wa'aba norĩ hã, wapẽ hã wawasédé te te wa'ãma 're sa'ra za'ra mono õ wamhã, wasiwawãi ãna, wa za 're wanomro 'Re ihâimana u'âsi mono nho'remhã. 22 Tahawa, uburé marĩ hã te za te te wama 're anhomri, isimiroti norĩ hã wa te 're 'madâ'â pese za'ra mono wa, duré marĩ te te tãma 're irowẽ mono zép si, wa te 're 'manharĩ za'ra mono wa.
23 Tawamhã ã hã isimiroti: I'ra Zezu Cristu wa te saze za'ra da, duré 're iwasisawi pese za'ra mono da si, Cristu te te wama i'ru za'ra zéb zarina. 24 Ni'wa hã 'Re ihâimana u'âsi mono nhimiroti te te 're ab'madâ'â pese mono wamhã, taha ãma te za 're hâimana. Tawamhã 'Re ihâimana u'âsi mono hã te za duré ãma 're hâimana. Duré 'Re ihâimana u'âsi mono Pẽ'ẽzani te te wama isõmri za'ra na, wa za wa te 're waihu'u za'ra, 'Re ihâimana u'âsi mono, wa'ãma 're ihâimana za'ra mono na hã.