Rob'rãsutu u, ropire na za 're iromhâimana mono zé
3
Ma'ãpé, ãne na ãma 're aipo're pu'u u'âsi mono za: Rob'rãsutu u bâdâ isi'utõrĩ mono na hã, ropire uptabi di za. 2 E marĩ wa. Dasima si te za 're dahâimana za'ra. Duré rob'uiprazéb zawi'wa te za 're dahâimana za'ra. Duré 'râwi dapẽ'ẽ na te za dasina 're dawata za'ra. 'Râwi te za duré 're dasi'madâ'â ze za'ra. Te za duré 're dasiwasu za'ra, marĩ na. 'Re ihâimana u'âsi mono ãma te za da te 're wasété za'ra. Duré damama norĩ nhimiroti hã da te 're 'madâ'â pese za'ra mono õ di za. Duré marĩ, da te dama 're 'manharĩ wẽ za'ra mono nherẽ, iwa'rãmi da te 're dazawi wẽ za'ra mono õ di za. Duré marĩ 'Re ihâimana u'âsi mono te, 're ihâimana za'ra mono na te za 're dawa'ẽ za'ra. 3 'Re dasisawi za'ra mono õ di za. Duré marĩ, da te ãma dasima 're i'upa za'ra mono zé hã te za da te dasi'ãma 're 'madâ'â u'âsi za'ra. Te za duré senai'õ nherẽ 're dasiwasu'u wasété za'ra. Duré marĩ iwasété wi 're dasitété waihu'u za'ra mono õ di za. Dawasété uptabi na te za 're dahâimana za'ra, da'ãma dasiwamri waihu'u ãna. Duré marĩ iwẽ nhitob'ru na te za 're dahâimana za'ra. 4 Te za 're dasihâiba za'ré za'ra. Te za duré rosa'rata ãna waptu na marĩ hã da te 're 'manharĩ za'ra. Te za duré 're idasi'madâ'â ze za'ra mono zép si dama 're hâimana za'ra. 'Re ihâimana u'âsi mono upana te za duré marĩ, da te dasima 're iwẽ za'ra mono si, da te dasima 're sawi za'ra. 5 'Re ihâimana u'âsi mono ma si 're dahâimana za'ra mono newamhã te za 're dasi'madâ'â ze za'ra. Tazahã dahâimanazé imana wawim na si te za 're dahâimana za'ra. Tane nherẽ, dahâimanazém na te za da te 're udâ za'ra, danhiptete sina isazei'wa na 're idahâimana za'ra mono zé hã. Ãne 're idahâimana za'ra mono norĩ nhiti, romhâ na 're aihâimana mono. 6 Nima norĩ isiré norĩ hã hâimana nhipese na te za 're sisisi, pi'õ ihâimana nhib'uwa norĩ nhorõwa u. Tawamhã te za te te ãma 're ai'uté za'ra, wasété za'ẽtẽ na 're inomro mono norĩ ãma, uburé marĩ iwasédé te te sima 're iwẽ za'ra mono zarina 're ihâimana za'ra mono norĩ ãma. 7 Ta norĩ hã sima sô 're isõpré mono, te te 're waihu'u za'ra mono da, siwa'ru rowasu'u hã. Tane nherẽ, niwa te te iwaihu'u za'ra õ, tô sena Rowasu'uwẽ hã. 8 Zãni norĩ Zãbresihi me Mozésihi zada ihâimana zahuré ne, tane te duré ã hã aibâ norĩ hã 're simasa, tô sena Rowasu'uwẽ da. Ta norĩ hã 'rã nhimiza'rese wẽ na 're ihâimana za'ra mono zé hã ma simini za'ra. Ma duré ab'uwa za'ra, isazei'wa na 're ihâimana za'ra mono zém na hã. 9 Tane nherẽ, ãma ronomro za'ra õ di za, za da te waihu'u za'ra wa, i'rã nhimiza'rese õ za'ra na hã. Ãne ma tô tãma tiromhâimana zahuré tô, Zãni norĩ ma Zãbresihi me hã.Paulu hã, Timotiu ma te te iroti 'rãsutu zé
10 Tazahã, a hã te 'râwi 're i'madâ'â mo, te 're irowahutu mono zé hã, duré 're ĩhâimana mono zé, duré ĩhâimanazém na rowa'õno, duré 'Re ihâimana u'âsi mono te ĩsina 're i'umnhasi mono zé, duré ĩnhimi'ẽi hâ na 're ĩhâimana mono zé hã, duré ĩnhimizawizé, duré marĩ ahâ na ĩzada 're hâimana za'ra mono nherẽ, te 're i'a'wapéi hâ mono na hã, 11 duré Cristuhu zazei'wai 'ru te rob'manharĩ wasété zé ĩzada 're ihâimana za'ra mono zé duré te 're irobzépata mono zéb zama. Duré aima waihu'u pese di, uburé ĩma iromhâimanazé Ãtioquia ãma hã, duré Iconiu ãma duré Listra ãma, tame ĩma rob'manharĩ wasété uptabi nherẽ, te i'a'wapé na hã! Tane nherẽ, uburé ã norĩ wi ma tô Wanhib'apito hã te te 're ĩzani. 12 Cristu Zezusihi ãma 're nomro mono da, uburé te te sima 're iwẽ za'ra mono norĩ ma, te za tô tãma 're hâimana za'ra, rob'manharĩ wasédé hã. 13 Tanei õ di iwasété norĩ hã, duré dama rob'rãmi'wa norĩ hã. Ta norĩ hã te za iwasété uptabi u 're nomro. Te za te te dama 're rob'rãmi za'ra. Te za duré da te tãma 're rob'rãmi za'ra. 14 Tazahã oto a hã, ma'ãpé asiptete sina ãma 're aihâimana mono, tô sena rowaihu iwaihu'u na duré asiptete sina isaze na. E marĩ wa. Aima waihu'u pese wa, ni'wam norĩ ãma i'awaihu'u na hã. 15 Ibaihâ Iwazé pese na rob'ui'éré hã aima waihu'u pese di, asapore hawim haré. Ta hã te za rowaihu hã aima tisõ, asõ'reptuzé asina i'uwaimramizéb u za te te i'ai'ãwisi da hã, Cristu Zezusi hã asina 're umnhasi mono wa. 16 Uburé Ibaihâ Iwazé pese na rob'ui'éré hã, 'Re ihâimana u'âsi mono zadawa hawim na si, te 're hâimana za'ra. Tahawa, wẽ uptabi di, tô sena 'Re ihâimana u'âsi mono nhimiroti na rowahutu da hã, duré dawasété 'manharĩ wa, dama ãma ipẽtẽzéb da hã, duré dahâimanazé pese zéb da hã, duré i'uwaibaba na dahâimanazéb da, dama rowahutuzéb da hã, 17 taha da, 'Re ihâimana u'âsi mono ma romhuri'wa hã sa'ra wẽ uptabi na 're hâimana mono da, duré simiza'rese 're hâimana mono da, imono bâ dahâimanazé iwẽ hã te te 're ab'manharĩ mono da.