Paulu hã Timotiuhu ma te te irotizé, romhuri da, 're siptete mono da
2
Tahawa, a hã Timotiu ĩ'ra uptabi ne ĩma 're i'aihâimana mono, ma'ãpé 're asiptete mono, 'Re ihâimana u'âsi mono rowaihu te te aima isõmri na, Cristu Zezusihi ãma 're wahâimana za'ra mono wa, wama 're ihâimana za'ra mono na. 2 Ma'ãpé ĩnhimirowahudu da'ahâ nho'a ãma ĩwapari hã, aibâ norĩ i'umnhasi norĩ ma, ãma 're rowahutu mono, ta norĩ ma zama duré tãma 're ihâimana za'ra mono da si i'rãiwaihu hã, te te ãma dama 're rowahutu za'ra mono da.3 Ma'ãpé ĩsiré 're aihâimana mono, te 're irobzépata mono na, Cristu Zezusihi te dasi'wapéi 'manharĩ'wa iwẽ ne. 4 Dasi'wapéi 'manharĩ'wa hã dasi'wapéi 'manharĩ'wa na 're hâimana mono ré hã, rowi tihâimanazém na a'â te te rosa'rata õ di za, isib'apito hã ihâimanazém na te te wẽsãmri da wamhã. 5 Tane duré dawara na iwara'wa hã, dawara na roti zarina hâimana õ nherẽ, da te sõpre õ di za, dawi watobro nherẽ. 6 Duré buru na romhuri pire na romhuri'wa hã amnho tehâri parimhã, imorĩ'rata na tô te te waibu, tite i'apo hã. 7 Te aima irotizém na, ma'ãpé ãma 're rosa'rata u'âsi mono. Ãne wamhã, Wanhib'apito te za aima hâi'ré, uburé marĩ 're awaihu'u mono da.
8 Zezu Cristuhu ãma 're aipo're pu'u u'âsi mono, dâ'â nherẽ, Imama te te ihâiwa'udu, duré Davihi nhihudu. Ã hã Rowasu'uwẽ, te dama 're i'mahârâ mono. 9 Ã hã te dama 're iwasu'u mono u'âbâ, wa te te 're robzépata. Wa duré dazazéb 'remhã za, isi'uwazi nhorõ rutu na ĩpawasisi ré, rowasété 'manharĩ'wa ne. Tane nherẽ, 'Re ihâimana u'âsi mono nhimiroti hã pawasisi ré hâimana õ di. 10 Tahawa, wa uburé marĩ hã ĩnhimi'ẽ na te 're a'wapéi hâ, 'Re ihâimana u'âsi mono tinhib'a'uwẽ da, te te sima ipisutu za'ra norĩ zawi te. Ãne hã wa te te 're 'manharĩ, õ norĩ zama tinho'reptuzé te te waibu da, Cristu Zezusihi ãma 're ihâimana mono, duré rowẽ isi'utõrĩ'õ zama. 11 Tô sena uptabi ã hã rowasu'u hã:
“Cristuhu siré 're wadâ'â za'ra mono wamhãa, isiré wa za duré 're wahâimana za'ra.
12 Wanhimi'ẽ na robzépada, wa te 're 'wapéi hâ za'ra mono wamhã, Cristuhu siré wa za wapire na dama 're wahâimana za'ra, apito na.
Wa te 're udâ za'ra mono wamhã, Õhõ zama te za duré te te 're wa'a'udâ.
13 Wa norĩ hã Cristuhu ma, sena na 're wahâimana za'ra mono õ nherẽ, te ta hã sena u'âsi 're hâimana. E marĩ wa. Õ hã hâimana si'ahâ na sima hâimana waihu'u õ wa.”
14 Ã norĩ na ãma 're apo're pu'u u'âsi mono, uburé 're i'a'madâ'â mono hã. Duré uburé ma 're a'rui mono 'Re ihâimana u'âsi mono nho'a, marĩ wasu'u u'âbâ 're sisada'âbâ za'ra mono tõ da. Dasisada'âbâ hã marĩ dai õ uptabi di. Taré te za dawi ro'wa'rutu, iwapari'wa norĩ wi hã.
'Re ihâimana u'âsi mono, romhuri'wa te te 're i'awẽsãmri mono
15 Asima sô 're airĩtĩ mono, 'Re ihâimana u'âsi mono te te i'aiwẽsãmri na isõ're asab da, romhuri'wa hã te te upai õ wa, marĩ ma siséb ãna ihâimana ne, duré i'uwaibaba na si tô sena 'Re ihâimana u'âsi mono nhimiroti na te te dama 're rowahutu mono wa. 16 Robzanhamri iwasété wi romhâ na 're aihâimana mono, ti'ai 're marĩ na da te dasima 're irobzanhamri za'ra mono wi. E marĩ wa. Ta norĩ hã 'Re ihâimana u'âsi mono nhiti dasina 're dapahâ za'ra mono da, te te dama 're 'manharĩ za'ra mono wa. 17 Rowahutu'wa senai'õ norĩ te te 're irowahutu za'ra mono zé hã te waptu na te te 're ropé, gangrena na da'wa're isisi ne. Maparane rowahutu'wa senai'õ norĩ dasiré ihâimana zahuré nhisi hã, Imeneu duré Filetuhu me. 18 Ta norĩ hã ma tô apa zahuré, tô sena 'Re ihâimana u'âsi mono nhimiroti wi hã. Ta norĩ hã te te 're rowahutu zahuré, 're idahâiwa'utu pari za'ra mono na. Ãne na te ni'wam norĩ wi te te 're a'uprosi zahuré, Wanhib'apito te te sina 're i'umnhasi za'ra mono zé hã. 19 Tane nherẽ, 'ri na'rata nhana'rada 'Re ihâimana u'âsi mono te te isãrĩ hã marĩ te te rési waihu'u õ di. Ãhã 'ri na'rata nhana'rata nhisiwi te ãne rob'ui'éré hã nomro, ã hã: “Uburé Danhib'apito hã te te waihu'u pese di, tite norĩ hã.” Duré ãne ihâiba amo hã: “Uburé Danhib'apito nhib'a'uwẽ na 're isiwasu'u za'ra mono norĩ hã, tiwasédé te te 're rẽme pese za'ra mono.”
20 'Ri za'ẽtẽ 'ri 'remhã, piza hã ẽtẽ waipo pré oru 'manharĩ na si duré ẽtẽ waipo prã prata 'manharĩ na si 're simasa mono õ di. Tazahã, wede 'manharĩ na zama duré zé'a 'manharĩ na zama te 're simasa, piza hã. Nima norĩ hã bâdâ ipire na da si hã duré nima norĩ, bâtâ sidâpâ da hã. 21 Tane duré, ni'wa hã marĩ iwasédé te te 're i'a'manharĩ mono zé wi sihâiba pese wamhã, ta hã te za romhuri iwẽ uptabi da, aimawi 're hâimana, piza iwẽ uptabi ne, tite Rowahutu'wai ma sena na duré wẽ uptabi na 're hâimana mono wa, duré simiza'rese 're hâimana mono wa, marĩ iwẽ te te 're i'a'manharĩ mono da hã.
22 Ma'ãpé, dahâiba téb ré marĩ iwasédé da te dasima iwẽ zarina dahâimanazém nhiti 're aihâimana mono. I'uwaibaba na 're i'aihâimana mono zéb zô si asima sô 're airĩtĩ u'âsi mono, duré 'Re ihâimana u'âsi mono asina 're i'umnhasi u'âsi mono zô duré asimizawizéb zô duré rowẽ na si dasiré 're i'aihâimana mono zéb zô, pẽ'ẽ wẽ na Uburé Danhib'apito zô 're ihãsi mono norĩ siré. 23 Marĩ dai õ na duré iwasété na 're idasisada'âbâ za'ra mono nhiti 're aihâimana mono. E marĩ wa. Aima waihu'u pese wa, taha zarina dasi'ahâri pusizém na hã. 24 Uburé Danhib'apito ma romhuri'wa hã simihâ zei u'âsi tô 're morĩ õ di za. Simiwazé wẽ na si te za tô uburé dama 're hâimana. Rowahutu'wa iwẽ na si te za tô 're hâimana, duré simi'ẽi hâ na. 25 Duré ta hã atãma na te te tô 're apawapto mono tinhimiroti wẽ na, sada 're ihâimana za'ra mono norĩ hã. Ãté tawamhã te za 'Re ihâimana u'âsi mono hã te te tãma 're awaprosi, iwasété wi 're sipizari za'ra mono da, tô sena isimiroti 're ihâimana mono, te te oto 're waihu'u za'ra mono da. 26 Ãne wapsi, te za apâ isimirosa'rata 're tãma 're romnho'a za'ra. Wa'uburé nhimimramizém hawi te za duré 're wairébé, ta hã marĩ te te sima 're iwẽ mono zép si te te 're 'manharĩ za'ra mono da, te te aré 're i'awaibui mono hã.