Wamama 'Re ihâimana u'âsi mono nhimizawi pese zé duré ihawi rowẽ u'â hã duré Zezu Cristu Wanho'reptui'wa te hã asiré 're ihâimana mono da si, iwẽ hã.

3 Rowaptẽrẽ na ai'ãma 're ĩpo're pu'u mono sidâpâ, 'Re ihâimana u'âsi mono ãma wa 're ĩwata u'âsi, mara na duré bâtâ na zama, marĩ na 'râwi ĩpẽ'ẽ na 're ĩsiwẽ'õ mono ãna, te tãma 're iromhuri mono ma, wahi'rata norĩ hã te te tãma 're iromhuri za'ra mono ne. 4 Aiwa'õi wa atõmo u na wa ãma 're ĩsipo're pu'u u'âsi. Wa ĩsima wẽ pese, te duré asabu zahu da, ĩtoi uptabi na ĩhâimana da. 5 Wanhib'apito sena na asina 're i'umnhasi mono zém na wa ãma 're ĩpo're pu'u u'âsi, ai'rada Loidi duré ana Eunisihi zama te te sina 're i'umnhasi zahuré mono ne, asina 're umnhasi mono wa. Tahawa tô ĩma hã, isine zahuré te aima 're hâimana, 'Re ihâimana u'âsi mono asina 're i'umnhasi mono zé hã. 6 Tahawa, wa ĩsima wẽ, ãma 're aipo're pu'u mono da, 'Re ihâimana u'âsi mono hã sõpru wa, te te aima isõmrizém na, dapawaptom na tãma 're iromhuri mono da hã, ĩnhib'rada te ai'ãma hiri wamhã. 7 E marĩ wa. 'Re ihâimana u'âsi mono, Tipẽ'ẽzani te te wama 're i'anhomri mono hã te te 're wa'a'manharĩ mono õ di, wapahi na 're wahâimana za'ra mono da hã. Tazahã Ipẽ'ẽzani hã te wanhiptede te te wama 're anhomri, duré wanhimizawizé duré wawaimri na i'uwaibaba na 're iwahâimana za'ra mono zé hã.

8 Tahawa, 're asisé mono tõ, Wanhib'apito wasu'uwẽ dama 're iwasu'u mono da hã. Duré ĩ'u'âbâ 're asisé mono tõ, dazazéb 're ĩza wa, te tãma 're iromhuri mono u'âbâ. Iwa'rãmi 'Re ihâimana u'âsi mono hawi asiptede aima 're ihâimana mono na si, asimiza'rese 're aihâimana mono, ĩsiré 're robzépata mono da, Rowasu'uwẽ u'âbâmhã. 9 'Re ihâimana u'âsi mono hã ma tô wa'anho'reptu. Ma tô duré wa'apisutu, isib'a'uwẽ na 're wanomro mono da. Mare di, marĩ iwẽ, wa te 're i'manharĩ za'ra mono u'âbâmhã. Tazahã, tô ã hã ite rowa'õtõ wa, duré isimizawi pese u'âbâ. Õ hã ma tô ã hã tinhimizawizé wama sõmri za'ra Cristu Zezusihi u'âbâ, uburé te te aropoto mono wana ré. 10 Ta hã isimizawizé hã, ãhã na si ma tô oto wama sihâi'ré za'ra, wẽ uptabi na Cristu Zezusi Wa'anho'reptui'wa we isihâi'rézém na hã. Õ hã ma tô dadâ'â nhiptetezém na ãma ai'uté. Duré Rowasu'uwẽ na ma tô hâi'ré, dahâimanazé isi'utõrĩ'õ hã.

11 Ta hã Rowasu'uwẽ 'mahârâ'wa da, ma tô 'Re ihâimana u'âsi mono hã ĩpisutu, duré isadawa wasu'u'wa da duré rowahutu'wa da zama. 12 Tahawa, wa ã hã marĩ hã te 're azépata. Tane nherẽ, zahadu wa ĩsiwawãi ãna te 're rob'umnhasi. E marĩ wa. Ĩma waihu'u pese wa, te isaze hã. Duré ĩma waihu'u pese di, Õ hã iwaihu'u pese uptabi na te te 're ĩ'madâ'â mono da hã, te 're 'manharĩ mono da, te te ĩma ipisudu hã bâdâ iwa iwaptã'ãzéb u. 13 Aima 're hâimana mono, roti tô sena ĩ'ãma iwaihu hã, ãma aima ĩsisanho zarina. Ãne hã asiptete sina ãma 're aihâimana mono, asina 're i'umnhasi mono zém na, duré asimizawi pese zém na, Cristu Zezusihi ãma 're aihâimana mono wa. 14 'Re ihâimana u'âsi mono Pẽ'ẽzani siptete uptabi na wa'ãma 're ihâimana za'ra mono zarina, ma'ãpé asima 're 'madâ'â pese mono, danhibro iwẽ uptabi ne, da te aima isõmri hã.

15 Aima waihu'u pese di, Azia na danhipti'a nho'õmo nhisi ãma wasisãnawã norĩ 're isi'ubumroi mono norĩ te te siwi ĩrẽme na hã. Fizelu norĩ Emozenihi me ma tô dame ĩrẽme zahuré. 16 Wanhib'apito hã, Onezifuru sipoto hawi a'uwẽ norĩ ãma 're isiwamri mono da si, ta hã te te 're ĩnhiptete mono wa, duré ĩ'u'âbâ siséb õ wa, dazazéb 're ĩza wa! 17 Tazahã, ta hã Roma u wei wisi wamhã, ma tô ĩzô 're rĩtĩ, te te ĩnhopẽtẽzéb u. 18 Wanhib'apito hã te te tãma i'manharĩ da si, bâdâ Da'ãma Rowairébézé iwa waptã'ã wamhã, isiwamrizé te te isõpẽtẽ da si! Éfézu ãma romhuri hã te te 'manharĩ wa, ĩ'ãma isime za'ẽtẽ na hã aima waihu'u pese di, ĩnhipai u.