4
Ãne wa za aima roti, 'Re ihâimana u'âsi mono nho'a duré Cristu Zezusihi nho'a zama, hâiba ré ihâimana za'ra norĩ ãma duré idâ'â norĩ ãma zama za te te i'arowairébé hã, apâ za we isihâi'rézéb u'âbâ duré za te te 're ida'a'madâ'â mono zéb u'âbâ zama: 2 Ma'ãpé Cristuhu wasu'u wẽ na dama 're rowahutu mono. Duré asimiza'rese 're aihâimana mono, ãma dama 're rob'mahârâ mono da, õne u'âsi duré da te 're wapari za'ra mono da, da te dasima 're wẽ za'ra mono õ nherẽ. Dama 're apẽtẽ mono. Duré 're da'apawapto mono, i'uwaibaba na 're dahâimana za'ra mono da. Duré dama 're aroti mono. Duré asimi'ẽ na dama 're rowahutu mono. 3 E marĩ wa. Bâdâ hã te za wi za, sena na roti, da te oto 're iwapari za'ra mono õ zé hã, da te dasima 're iwẽ za'ra mono zéb zarina si, za oto 're dahâimana za'ra mono wa. Duré 'râwi rowahutu'wa norĩ na te za 're dasi'uirĩ za'ra ahâ na, ta norĩ hã da te 're wapari za'ra mono da, da te dasima 're iwẽ za'ra zéb zarina, te te dama 're rowasu'u za'ra mono wa. 4 Tawamhã te za dasiwi rẽme ni za, tô sena 'Re ihâimana u'âsi mono nhimiroti da te 're iwapari za'ra mono zé hã, 're dapoto za'ra mono sidâpâsi rob'rãzarõno senai'õ si, da te 're wapari za'ra mono da oto. 5 Tazahã, a hã uburé marĩ wi 're asi'madâ'â pese mono. 'Re irobzépata mono zé hã asimi'ẽ na 're a'wapéi mono. Romhuri hã 're 'manharĩ mono, Rowasu'uwẽ 'mahârâ na. Duré asimiromhuri hã 're ab'manharĩ wẽ mono, 'Re ihâimana u'âsi mono ma romhuri'wa na 're i'aihâimana mono zém na hã.6 Tazahã wa hã, 'Re ihâimana u'âsi mono ma, danhoprubzé rob'rãi wa'u da te 're isa'wari za'ra mono ne, wa oto ĩhâiba. Duré bâdâ hã ma tõ iwa waptãrã, ã hã 're ĩhâimana mono zé, te irẽme da hã. 7 Dawara na ĩwatobro wẽ da hã, wa tô 're ĩsiwasutu wẽ pese. Tahawa, dawara 'rãsutu u wa tô ĩwisi wẽ. Wa tô duré ĩsima tété tete, isazei'wa norĩ te te 're isaze za'ra mono zé hã. 8 Tahawa, ãhã na hã aimawi te oto ĩzô nomro, danhoprezé i'uwaibaba na da te 're iwaibui mono hã, Wanhib'apito, I'uwaibaba na da'ãma Rowairébé'wa, za te te ĩma isõmri hã. Ta hã bâdâ wisi wamhã, ĩma si õ di. Tazahã duré, apâ we imorĩzéb zô uburé sô 're isimipari za'ra mono norĩ ma zama, sawi sina.
Paulu hã, Timotiuhu ma hâiba pisutu te te irotizé
9 Ma'ãpé, we asima rowairébé su'u, we ĩzabui hâ. 10 E marĩ wa. Demasi hã ma tô sima sawi'â, ã hã ti'ai ãma isazei'õ'wa norĩ 're ihâimana za'ra mono zé hã. Tahawa ma tô ĩrẽ. Ma tô mo, 'ri nho'u Tesalonica u. Cresẽti hã ma tô mo, Galasia na danhipti'a nho'õmo nhisi u. Duré Titu hã Daumasia na ti'a nhisi u ma tô mo. 11 Lucasihi si te ĩ'rata tihâiba. Tahawa Marcus hã we asiré saprõni. E marĩ wa. Ta hã wẽ di za, romhuri na ĩ'ãma isime da hã. 12 Tiquicu hã wa tô satõ, Éfézu u morĩ da hã. 13 We aimorĩ wamhã, ĩ'uza ihâpa hã we ĩma âri za, Troadi ãma te ihiri hã, Carpuhu nhorõwa ãma. Danhipai'u ipire ibaihâ norĩ romhâ 'manharĩ na, we ĩma iduri da hã. Tane nherẽ, we duri duré, ibaihâ aimawi norĩ zama.
14 Alesãdri, isi'uwazi na marĩ 'manharĩ'wa hã ma tô ĩwi ro'wa'rutu. Tane nherẽ, Wanhib'apito si te za ãma tãma wa'rã za, te te i'manharĩzéb zarina, iwa'rãmi. 15 A hã duré tiwi asi'madâ'â pese. E marĩ wa. Ta hã ma tô sa'ẽtẽ sada 're hâimana, wanhimirowasu'u za'ra da hã.
16 Da'ãma rowairébézéb ãma, imorĩ'rata na ĩmreme na ĩsi'wawi ĩsimapa wamhã, ni'wa hã ĩniwĩ hâimana õ di. Uburé ma tô siwi ĩrẽ. Tane nherẽ, 'Re ihâimana u'âsi mono te te ãma i'madâ'â za'ra õ da si iwẽ hã, te te i'manharĩ za'ra zém na hã. 17 Tane nherẽ, Wanhib'apito si ma tô ĩsiré tihâiba. Ĩnhiptede ma tô ĩma tisõ, Zudeu'õ norĩ ma, ibâ na te 'mahârâ da, Wanhib'apito Zezu Cristuhu wasu'u wẽ hã. Ma tô duré ĩnho'reptu, hu'u zérépa zadai'ré wi hãa. 18 Wanhib'apito hã te za te te 're ĩzani, imono bâ Iwasété uptabi nhimiromhuri wi hã. Te za duré ĩzaprõ, marĩ te te ĩ'upi ãna apito na te te 're ida'a'madâ'â mono zé, ro iwẽ uptabi u hâiwa u. Tahawa, Õhõ ãma si wa za 're wawata za'ra, õne u'âsi! Tane tô!
Paulu hã i'rãi rẽme isazei'wa norĩ te te i'azawizé, rob'ui'éré na
19 Wa ãma sawi zahuré, Prisila norĩ Aquilaha me, duré Onezifuruhu nhorõwa 're, 're isi'ubumroi mono norĩ zama. 20 Erastu hã 'ri nho'u Corĩtu ãma te zahadu ĩza'u nhamra. Trofimu hã wa duré tirẽ hâzé na, 'ri nho'u Miletu ãma. 21 Ma'ãpé, we asima rob'madâ'â su'u, rowa'u'u wahâ wana ré, we aimorĩ da. Eubulu hã, duré Prudẽti hã duré Linu hã duré Claudia hã duré uburé wasisãnawã norĩ hã te ãma asawi za'ra.
22 Wanhib'apito hã, aipẽ'ẽ 're, 're ihâimana u'âsi mono da si, iwẽ hã.
Duré 'Re ihâimana u'âsi mono nhimizawizé hã ai'ãma 're ihâimana u'âsi za'ra wa'aba mono da si.