3 Pi'õi mrotõ norĩ pawapto'wa da, ni'wa hâimana õ wamhã, 're apawapto mono, 're awazé pese mono sina. 4 Tazahã, pi'õi mrotõ i'ra norĩ, niwamhã isihudu norĩ hã iré wamhã, ta norĩ hã te za imorĩ'rata na te te 're waihu'u za'ra, te te 're uwaimrami za'ra mono da, 'Re ihâimana u'âsi mono wazébzé hã, sipoto hawi a'uwẽ norĩ te te 're i'a'madâ'â wẽ mono zéb zarina. Ãne wamhã, timama norĩ ma, duré ti'rata norĩ ma zama te za te te tãma 're 'manharĩ wẽ za'ra asa, ta norĩ hã zahadu ré te te 're i'madâ'â wẽ za'ra mono zé wa'rãmi, ãne hã 'Re ihâimana u'âsi mono ma, wẽ uptabi wa. 5 Pi'õi mrotõ sena hã ta hã ni'wa tãma ihâimana õ, te te 're i'madâ'â mono da hã, 'Re ihâimana u'âsi mono si te te sina 're i'umnhasi mono, siwawãi ãna, duré te te tiwi 're irowaptẽrẽ mono, bâtâ na duré mara na zama, te te 're pawaptob u'âsi mono da. 6 Tanei õ di, pi'õi mrotõ siwa'ru marĩ te te sima 're i'awẽ mono zéb zô si 're ihâimana mono hã. Ta hã hâiba ré 're morĩ nherẽ, te za dâ'â na 're hâimana, ipẽ'ẽ 'remhã. 7 Ãne na pi'õi mrotõ norĩ ma 're aroti pese mono, iwasédé, da te ãma 're sa'ra waihu'u za'ra mono tõ da. 8 Tazahã, ni'wa hã tisiwadi norĩ te te 're a'madâ'â mono õ wamhã, duré danhipai u sipoto hawi a'uwẽ norĩ te te 're a'madâ'â mono õ wamhã, ta hã te tô udâ, isazei'wa na 're ihâimana mono zé hã. Tahawa ta hã isazei'õ'wa norĩ nhipai u wasété uptabi di.

9 Pi'õi mrotõ norĩ nhisi zu ihâimana za'ra da hã, 60 nhipai u ãma iwahum norĩ si te za isisi za'ra hã dazu tihâimana za'ra, sena na timro ma si 're ihâimana za'ra mono norĩ si, 10 duré hâimana wẽ na dama iwaihu'u wẽ norĩ si, ti'ra norĩ te te 're iprédu wẽ za'ra mono duré tinhorõwa u te te 're idawaibui wẽ za'ra mono duré 'Re ihâimana u'âsi mono nhib'a'uwẽ norĩ 're ihâimana za'ra mono norĩ ma, wapu na te te 're iromhuri za'ra mono, duré marĩ zô tiwi 're irowaptâ'â za'ra mono norĩ te te 're ipawaptob za'ra mono, uburé ã norĩ te te 're i'manharĩ wẽ za'ra mono norĩ hã.

11 Tazahã, pi'õi mrotõ ihâiba tém norĩ nhisi hã dazu hâimana za'ra tõ. E marĩ wa. Ta norĩ ma, siptete na dasina dahâimanazé te te sima 're iwẽ za'ra mono zé hã, Cristuhu ma 're ihâimana za'ra mono zém nhipai u 're hâimana za'ra mono wamhã, te za te te sima 're wẽ za'ra, apâ 're mro zahu za'ra mono da. 12 Ãne wamhã, i'upai'wa na te za oto 're hâimana za'ra, imorĩ'rata na isazei'wa norĩ ma, te te sina 're iropisutu za'ra mono zé hã te te 're rẽme za'ra mono wa. 13 Taha siré hã, tiwa'a na te za te te ãma 're romhõsi za'ra. Te za duré 'ri babap si datẽme 're nomro. Taha si õ di. Taha nhipai u iwasédé hã ãne: Te za duré daza're'ra te te 're dawasu'u wasété za'ra. Te za duré dawasu'u na 're sinharĩ pese za'ra, titei õ nherẽ. 14 Tahawa, ĩma wẽ di aré, pi'õi mrotõ ipréduptém norĩ hã tô 're mro za'ra mono da, 're 'ra za'ra mono da, duré tinhorõwa hã te te 're 'madâ'â za'ra mono da, wanhitob'ru norĩ ma, niha te te 're iwawasu'u wasété za'ra mono zé hã tãma 're hâimana za'ra mono tõ da. 15 E marĩ wa, wa ãne aima roti. Nima norĩ pi'õi mrotõ norĩ hã ma tô sina tipahâ za'ra, Satanasi nhirã zarina si oto 're nomro mono da.

16 Nimahã pi'õ isazei'wai ma, imama sipoto hawi a'uwẽ 're, pi'õi mrotõ tãma 're hâimana za'ra mono wamhã, te te tô 're apawapto mono. Iwẽ hã isazei'wa norĩ ma, ã hã ropire te te hiri ãna da hã, isazei'wa norĩ hã pi'õi mrotõ ni'wa ãma 're isina mono õ norĩ si te te 're 'madâ'â za'ra mono da.

17 Aibâ norĩ isazei'wa norĩ 'madâ'â'wa norĩ, isazei'wa norĩ siré 're isi'rã'õtõ mono te te 're i'madâ'â wẽ za'ra mono norĩ hã, marĩ iwẽ na tô ãma isisiwi na danhipai u da te 're ipawapto wẽ za'ra mono da hã i'uwaibaba, aimawi danhipai u ibaihâ na dapawaptom na isimiromhuri za'ra norĩ hã duré isazei'wa norĩ ma rowahutu na zama. 18 E marĩ wa. Ibaihâ Iwazé pese na rob'ui'éré hã, nomro siromo wa, ãne: “Powawẽ, amnho trigu tipara na te te sub ré hã, wata wazi tõ, sa tõ da hã.” Ãne duré rob'ui'éré hã: “Romhuri'wa, da te ipawa'âbâ da hã, tô i'uwaibaba.”

19 Wapari tõ, ni'wa hã isazei'wa norĩ 'madâ'â'wai ãma iwasédé te te hiri wamhã, isiré iwasu'u'wa da hã maparane niwamhã duré si'ubdatõ dahâimana õ nherẽ. 20 Isazei'wa norĩ 'madâ'â'wa, tiwasédé te te 're i'manharĩ za'ra mono norĩ ma hã, danho'a aimreme hã tãma 're pẽtẽ za'ra mono, isiré da'madâ'â'wa norĩ zama sina 're hâtâ'â za'ra mono da.

21 'Re ihâimana u'âsi mono nho'a duré Cristu Zezusihi nho'a duré hâiwa ãma romhuri'wa norĩ wẽ uptabi na 're ihâimana za'ra mono norĩ nho'a zama, wa ãma aiwi waptẽ ĩzadawa za'réi ãna, ãne: Ma'ãpé ã hã te ãma aima irotizé hã 're ab'madâ'â pese mono, aiwapsi daba'a ãna 're ida'a'madâ'â mono na. 22 Ai'aba'ré na asib'rada ni'wai ãma hã hiri tõ, rowahutuzéb 're te te 're romhuri mono da hã. Duré dawasédé, da te 're i'manharĩ za'ra mono zém na dasiré 're aiwasété mono tõ. Aiwasété wi 're asi'madâ'â pese mono.

23 Â si 're hâsi mono tõ. Suru na uva 'rãi wa'u isé zama 're hâsi mono, anomo u'âbâ 're i'aihâzé u'âsi mono wi.

24 Ni'wam norĩ 're iwasété za'ra mono zé hã te sõ'awi da te 're 'madâ'â za'ra, ãma rowairébé hã 're hâimana za'ra mono wana ré. Tazahã, ni'wam norĩ aimawi hã tiwasédé te te 're i'manharĩ za'ra mono zé hã, tâibâ parip si te da te 're waihu'u za'ra. 25 Tane duré ni'wam norĩ marĩ iwẽ, te te 're i'manharĩ za'ra mono zé hã te za sõ'awi da te 're 'madâ'â za'ra. Duré ni'wam norĩ, marĩ iwẽ te te 're i'manharĩ za'ra mono zé, sõ'awi da te 're i'madâ'â waihu'u za'ra mono õ hã, pi'uriwi õne u'âsi 're hâimana za'ra mono õ di za.