'Re ihâimana u'âsi mono, za da te isazei utõrĩ za'ra zé rob'rãsutu u hã
4
'Re ihâimana u'âsi mono Pẽ'ẽzani hã ma tô sõ'awi waihu'u siro, ãne: Rob'rãsutu u bâtâ mono na hã, ni'wam norĩ te za rẽme za'ra, Cristu te te sina 're i'umnhasi za'ra mono zé hã. Ta norĩ hã te za tirĩtĩ nho'õmo za'ra, wa'uburé norĩ hawi dama rob'rãmi na si roti senai'õ na si. 2 Ã hã roti senai'õ hã, hâimana si'amoi pese na duré sadawa nhipese na 're ihâimana za'ra mono norĩ hawi te te 're ropé, ta norĩ nhimirosa'rada hã dâ'â na 're hâimana za'ra mono wa. Tahawa 're sisãmri waihu'u za'ra mono õ di, i'upa na te te 're irowasu'u za'ra mono hã. 3 Ta norĩ hã te te dawi 're sawi zahi za'ra, dasina damro hã. Te duré te te dama 're rowahutu za'ra, nima norĩ dasa da te 're huri mono tõ da, 'Re ihâimana u'âsi mono ã norĩ mra hã te te apoto mono nherẽ, uburé te te sina 're i'umnhasi za'ra mono norĩ hã duré isimiroti tô sena 're ihâimana mono tãma iwaihu'u pese za'ra norĩ zama, 'Re ihâimana u'âsi mono ãma 're wata za'ra mono sina ãma 're saihuri mono da. 4 E marĩ wa. Uburé marĩ 'Re ihâimana u'âsi mono te te i'apoto mono hã, iwẽ uptabi si. Tahawa nima hã dasa norĩ hã da te dasiwi 're wẽ'õ za'ra mono tõ, 'Re ihâimana u'âsi mono ãma 're dawata za'ra mono sina, ãma 're dasaihuri mono wamhã. 5 E marĩ wa. 'Re ihâimana u'âsi mono mreme hã duré rowaptẽrẽ na ãma dawada hã te za te te 're ab'manharĩ, uburé dasa hã aimawi wazé pese na tãma 're hâimana za'ra mono da.Cristuhu te romhuri'wa iwẽ
6 Ãne na wasiré isazei'wa norĩ ma, 're rowahutu mono. Ãne wamhã, tô sena Wanhib'apito da te dasina 're i'umnhasi za'ra mono zém na roti na duré tô sena roti iwẽ ãma 're i'aimorĩ na zama te za ãma 're asai u'âsi mo. Ãne zarina Cristu Zezusihi te romhuri'wa iwẽ na te za 're aihâimana mo. 7 Tazahã, asiwi 're wẽ'õ mono, rob'rãzarõtõ 'rada 're dapoto za'ra mono sidâpâ, 'Re ihâimana u'âsi mono wazéb ãna da te dasima 're i'rãzarõtõ za'ra mono hã marĩ dai õ nherẽ. Isazei'wai hâimanazém na ãma 're sa'ẽtẽ u'âsi mono da, aipẽ'ẽ 're, sô 're asiwasutu u'âsi mono, 're i'asiwairob u'âsi mono ne. 8 E marĩ wa. Dasiwairob u'â hã tô marĩ da hã. Tane nherẽ, isipai u te 're hâimana, 'Re ihâimana u'âsi mono nhimiroti zô dasiwasutu u'â hã tô uburé marĩ da hã, taha zarina 'Re ihâimana u'âsi mono iwẽ hã te te dama 're apisutu mono wa, awa'awi bâtâ na dahâimanazéb 're duré romhutu'õ dahâimanazéb 'reb zama. 9 Ã hã roti hã tô sena uptabi. Tahawa, da te tô 're isaze pese za'ra mono da si. 10 Ãne hã ihâimana zarina, wa wa te 're romhuri pese. Wa duré sada 're wasisapẽtẽ, 'Re ihâimana u'âsi mono ihâiba ré hã wasiwawãi ãna wa te wasina 're umnhasi mono wa. Ta hã uburé Da'anho'reptui'wa da, te 're hâimana, isazei'wa norĩ nho'reptui'wa si 're hâimana mono nherẽ tô.
11 Tahawa, ma'ãpé ã norĩ hã dama 're 'rui mono, duré ãma dama 're rowahutu mono. 12 Ni'wa hã te te aiwazéb õ tõ, aipréduptébre wa. Tazahã, isisanho'wa na 're aihâimana mono isazei'wa norĩ ma hã, 're i'aimreme mono zém na duré aihâimanazém na duré asimizawi pese zém na duré Wanhib'apito asina 're i'umnhasi mono zém na duré aiwasété ãna 're i'aihâimana mono zém na zama. 13 Tahawa, ĩzô asimipari ré hã, tô ãma uzusi u'âsi, Ibaihâ Iwazé pese na rob'ui'éré hã, sõ'awi dama isõré na hã duré Rowasu'uwẽ na dama rowasu'u na hã duré isazei'wa norĩ ma rowahutu na zama. 14 Ãma aipo're si'âri tõ, 'Re ihâimana u'âsi mono tinhoprubzé iwẽ uptabi te te aima isõmri na ãma iromhuri da hã, ni'wa hã 'Re ihâimana u'âsi mono Pẽ'ẽzani te te tãma iwaihu'u zarina, te te aima ipisutuzém na isazei'wa norĩ 'madâ'â'wa norĩ tinhib'rada te te ai'ãma sa'ra wamhã.
15 Asimi'ẽ na ã norĩ te ãma aima irotizém na hã ãma 're aihâimana mono, ãma 're i'aihâimana mono na, uburé da te 're ai'madâ'â za'ra mono da, Wanhib'apito asina 're i'umnhasi mono zé hã ãma 're isa'ẽtẽ u'âsi mono na. 16 'Re asi'madâ'â pese mono. Duré ãma 're pibui pese mono, dama 're irowahutu mono zém na hã. Ã norĩ 'manharĩ na hã ãma 're uzusi u'âsi mono. E marĩ wa. Ãne wamhã, te za 'râwi asisõ'reptua. Te za duré aiwapari'wa norĩ zama isõ'reptu za'ra.