Isazei'wa norĩ 'madâ'â'wa norĩ
3
à hã roti hã tô sena uptabi: Ni'wa hã isazei'wa norĩ 'madâ'â'wa da, te te sima wẽ wamhã, romhuri iwẽ uptabi te tô sima wẽ. 2 Isazei'wa norĩ 'madâ'â'wa da hã, ni'wai ãma iwasédé, da te ãma ihiri waihu'u õ, 're ihâimana mono. Misi imro hã tãma 're ihâimana mono duré sena na 're ihâimana mono duré waimri na ihâimana i'uwaibaba si 're hâimana mono da, duré dama iwazé wẽ duré dawaihu'u õ nherẽ, tinhorõwa u te te 're ida'awaibui wẽ mono duré 'Re ihâimana u'âsi mono nhimiroti zahi na rob'ui'éré tãma iwaihu'u pe te te ãma dama 're irowahutu mono da hã. 3 Duré âzé te te 're ihâsi za'ẽtẽ mono õ, ãma 're isi'rãiwamnarĩ pese mono zéb u, duré isimi'ahâri zei õ. Tazahã, simizawi pese sina 're ihâimana mono, duré waimri na. Mare di, rob'uiprazé zawi pese 'wa hã. 4 Sipoto hawi a'uwẽ norĩ te te 're i'a'madâ'â wẽ mono duré ti'ra norĩ te te 're i'a'rãiwaihu'u wẽ mono, te te 're wapari pese za'ra mono da, wazép sina. 5 E marĩ wa. Ni'wa hã sipoto hawi a'uwẽ norĩ te te 're a'madâ'â wẽ waihu'u mono õ wamhã, e niha te za bété 'Re ihâimana u'âsi mono zazei'wa norĩ zama te te 're a'madâ'â wẽ. 6 Isazei'wa norĩ 'madâ'â'wa da hã mare di, ni'wa hã ãma ronomro prã na te te isaze, 're si'madâ'â zei mono tõ da, 're si'madâ'â zei mono wa, Wa'uburé ãma iwasété na rowairébé ihâimana ne, tãma romhâimana tõ da. 7 Isazei'wa norĩ 'madâ'â'wa da hã, i'ru zahi, isazei'õ'wa norĩ rowi 're ihâimana za'ra mono te te siwi 're iwazé pese mono na 're ihâimana mono da hã, da te dasiwi 're wazé mono ãna 're hâimana mono tõ da, duré niwa waptã'ã tõ da, Wa'uburé nhimimramizém na hã.Isazei'wa norĩ pawapto'wa norĩ
8 Tane duré, isazei'wa norĩ pawapto'wa na 're ihâimana za'ra mono da hã, ihâimana wẽ duré timreme na te te ãma 're i'uwaimrami za'ra mono duré sima toi ãna 're ihâimana za'ra mono. Duré âzé hã sa'ẽtẽ na te te 're i'âhuri mono õ. Duré hâimana nhipese na rob'uiprazé te te 're i'ubumro za'ra mono õ. 9 Te za te te sima 're tété tete za'ra, tô sena 'Re ihâimana u'âsi mono nhimiroti, Cristu, da te dasina 're i'umnhasi za'ra mono zém na te te dama 're i'ahâi'ré mono hã. I'uwaibaba na te za duré marĩ hã te te 're 'manharĩ za'ra, 'râwi tipẽ'ẽ na 're siwẽ'õ za'ra mono ãna. 10 Aibâ norĩ hã isazei'wa norĩ pawapto'wa da wamhã, uimrehẽne te za a'â da te 're pibu za'ra. Taha pari, marĩ ãma 're hâimana za'ra mono õ wamhã, tô 're hâimana za'ra mono, dapawapto'wa na. 11 Tane duré, dapawapto'wa norĩ mro hã dama wazé pese na 're ihâimana za'ra mono. Mare di, te te 're idawasu'u wasété za'ra mono hã. Tazahã hâimana prédum na 're ihâimana za'ra mono. Duré sena na 're ihâimana za'ra mono timro ma si. Duré uburé marĩ na umnhasi na dama 're ihâimana za'ra mono. 12 Dapawapto'wa da hã, misi imro tãma 're ihâimana mono. Duré ti'ra norĩ te te 're i'madâ'â wẽ za'ra mono, duré isõrõwa 're uburé 're isi'ubumroi mono norĩ zama. 13 E marĩ wa. Dapawapto'wa norĩ romhuri wẽ na te te 're i'manharĩ za'ra mono hã, wazé pese na 're ihâimana za'ra mono zé hã te za te te 're sõpẽtẽ za'ra, isazei'wa norĩ 'remhã. Te za duré tãma 're hâimana za'ra, sib'ru na 'rãi waihu'u wẽ sina 're isiwasu'u za'ra mono zé hã Cristu Zezusi te te sina 're i'umnhasi za'ra mono zém na.
Zezu Cristuhu ãma tô sena rowaihu, 'Re ihâimana u'âsi mono te te dama ihâi'rézé
14 Ã hã, wa ãma aima rob'ui'éré, te ãma asabu su'u da, te ĩsima rob'madâ'â nherẽ. 15 Tane nherẽ, ãma ĩwisi su'u õ wamhã, ã hã rob'ui'éré hã te za aipawapto, 'Re ihâimana u'âsi mono 'ra norĩ, niha 're ihâimana za'ra mono zéb da hã. Ta norĩ hã isazei'wa norĩ, siré 're isi'rã'õtõ mono 'Re ihâimana u'âsi mono idâ'â'õ te hã. Ta hã 'ri uparizém nho'u ẽtẽ 'manharĩ, duré tô sena rowaihu'u na 'ri nhana'rada. 16 Wawãi waihu'u õ di tô, 'Re ihâimana u'âsi mono wazép sina 're idahâimana za'ra mono zé, aré dama sa'rese õ nherẽ, ta hã te te oto dama ihâi'ré hã, wẽ uptabi di, ã hã:
“Ti'ai ãma a'uwẽ na ma tô podo.
'Re ihâimana u'âsi mono Pẽ'ẽzani hã ma tô wẽsã.
Hâiwa hawi romhuri'wa norĩ hã ma tô titõmo na siwi 'madâ.
Dapoto mono bâ ma tô da te dasima 're wasu'u za'ra, daro mono bâ.
Ma tô duré da te 're saze za'ra, ropâ.
Imama hã apâ ma tô duré sitẽme ti'â, rowẽ uptabi u.”