'Re ihâimana u'âsi mono wi, da te 're irowaptẽrẽ za'ra mono zém na roti
2
Uburé marĩ nhipai u wa za ãma waptẽ, ãne: 'Re ihâimana u'âsi mono wi uburé da te 're rowaptẽrẽ za'ra mono, uburé marĩ dawi sô 're irowaptâ'â za'ra mono na duré ãma 're dawata za'ra mono da, marĩ te te 're i'ab'manharĩ mono zém na, uburé dama. 2 Duré da te 're rowaptẽrẽ za'ra mono, apito norĩ daro mono bâ 're ihâimana za'ra mono ãma duré uburé dama ipire na 're ihâimana za'ra mono norĩ ãma, wasima iwẽ na rowẽ sina duré rowẽ za'ẽtẽ u'âsi ré, 'Re ihâimana u'âsi mono ma si 're wahâimana za'ra mono da, duré uburé dawazép sina. 3 Ã hã iwẽ uptabi. Duré 'Re ihâimana u'âsi mono Wanho'reptui'wai ma, te te 're irowẽ zani mono. 4 Te te sima 're wẽ, uburé danho'reptuzé da te dasina 're uwaimrami za'ra mono da, duré tô sena isimiroti hã da te 're waihu'u za'ra mono da zama.5 E marĩ wa. Misire te 'Re ihâimana u'âsi mono hã 're hâimana. Duré misire da'ãma isito'wa, 'Re ihâimana u'âsi mono siré 're dahâimana za'ra mono da hã. Ta hã Cristu Zezusi ti'ai ãma a'uwẽ na ipodo. 6 Ta hã ma tô dazada sisõ, dawasété hawi uburé te te 're da'awa'âbâ mono da. Ã hã ãma iwaihu'uzé, bâdâ i'uwaibaba na 'Re ihâimana u'âsi mono te te sima iwẽ uptabi na hã, uburé danho'reptuzé da te dasina 're uwaimrami za'ra mono da. 7 Taha da, 'Re ihâimana u'âsi mono hã ma tô ĩpisutu, Cristuhu zadawa wasu'u'wa da, duré Zudeu'õ norĩ ma rowahutu'wa na 're ĩhâimana mono da, da te dasina 're i'umnhasi mono zém na rowasu'uwẽ hã duré tô sena isimiroti hã te tãma 're 'mahârâ za'ra mono da. Ĩzadawa nhipese õ di. Tô sena wa ĩsiwasu'u.
8 Tahawa, wa ĩsima wẽ, uburé aibâ norĩ ropâ 're ihâimana za'ra mono hã te te 're rowaptẽrẽ za'ra mono da, hâimo 're simiwẽ za'ra mono sina, 'Re ihâimana u'âsi mono ma si 're sisõmri za'ra mono sina, 're siti'ru za'ra mono ãna duré te te 're dawasu za'ra mono ãna.
9 Tane, wa duré ĩsima wẽ, pi'õ norĩ hã i'uza uburé ihâiba te te 're i'ubu za'ra mono na 're si'uza za'ra mono da, aibâ norĩ hã te te sima 're 'madâ'â ze za'ra mono zô 're si'uza wamnarĩ za'ra mono ãna. Duré 're siséré tété wamnarĩ pese za'ra mono õ di za, da te 're 'madâ'â ze za'ra mono zô. Duré ẽtẽ waipo pré oru na 're siwamnarĩ pese za'ra mono õ di za, duré a'é tõmo wawẽ ne pérola na isisi na. Duré da'uza iwa'âbâ za'ẽtẽ na 're si'uza za'ra mono õ di za. 10 Tazahã, tihâimana wẽ na si 're siwamnarĩ za'ra mono, 'Re ihâimana u'âsi mono ma si 're ihâimana wẽ za'ra mono na, 're isiwasu'u za'ra mono norĩ ne.
11 Pi'õ norĩ hã ari'iwi na te za te te 're rowaihu'u za'ra, isazei'wa norĩ siré 're isi'rã'õtõ mono 'remhã, rowahutu'wa norĩ zahâpâ 're isi'madâ'â za'ra mono zarina. 12 Te 'rui õ di, pi'õ norĩ hã te te 're irowahutu za'ra mono da hã. Duré aibâ norĩ ma, simiroti pire na 're ihâimana za'ra mono da hã, te 'rui õ di. Ari'iwi te za tô 're hâimana za'ra, da te 're rowahutu za'ra mono ré hã. 13 E marĩ wa. Adãhã uimrehẽne 'Re ihâimana u'âsi mono hã te te poto na'rata wa. Taha parip si Eva hã te te duré poto wa. 14 Duré Adãhã ma, Wa'uburé hã te te rob'rãmi õ di. Pi'õi ma si ma tô sadawa hapese. Tahawa ta hã ma tô 'Re ihâimana u'âsi mono nhimiroti zahi hã tirẽ. 15 Tane nherẽ, pi'õ norĩ hã 'Re ihâimana u'âsi mono te za te te 're anho'reptu, i'ra tãma 're rere'e mono da, iwasã ãma 're sépu'u za'ra mono wamhã. Ãne hã te za tãma 're romhâimana za'ra, Cristu hã te te 're isaze za'ra mono zém na te te ãma 're uzusi za'ra mono wamhã, duré te te 're idazawi za'ra mono zém na duré 'Re ihâimana u'âsi mono te te sima 're iwẽ mono zé te te 're i'manharĩ za'ra mono zém na duré i'uwaibaba na 're ihâimana za'ra mono na, da te 're i'madâ'â ze za'ra mono zém na zama.